ሔለን ዘውዱ

የኢሳት ኖርዌይ የገቢ ማሰባሰቢያ ዝግጅት ዕሑድ የካቲት 3 ቀን 2005 ዓ.ም. (ፌብሩዋሪ 10 ቀን 2013 እ.ኤ.አ.) በዋና ከተማዋ በኦስሎ በደመቀ ሁኔታ ተከብሯል።

 

የኢትዮጵያ ህዝብ ለዘመናት የተጠማውን መረጃ የኢህአዴግን አፈና ተቋቁሞ ለኢትዮጵያ ህዝብ ተደራሽነቱን እያስመሰከረ ለሚገኘው ኢሳት (የኢትዮጵያ ሳተላይት ቴሌቭዥን) በሰባት አውሮፓ ሀገሮች የገቢ ማሰባሰቢያዎች ላይ በዋና ክብር እንግድነት እየተጓዘ ያለው አርቲስት ታማኝ በየነ ኦስሎን አድምቋት አምሽቷል።

 

አዳራሹን ሞልተው በጉጉት የጠበቁት የኖርዌይ ኢትዮጵያውያንም ተወዳጁ የኪነ ጥበብ ሰው ታማኝ በየነ ወደ አዳራሹ ሲገባ በጋለ ስሜት ደማቅ አቀባበል አድርገውለታል። የተለያዩ የእንኳን ደህና መጣህ ንግግሮች ተደርገዋል።

 

ተወዳጁ የኪነ ጥበብ ሰው ታማኝ በየነ በሃገርና በህዝባችን ላይ እየደረሰ ያለው የመብት ረገጣ አስመልክቶ በመረጃ የተደገፉ ትንታኔዎችን አቅርቧል።

 

በቀጣይ የጥበብ ሰው አርቲስት ታማኝ በየነ ወደ ዋናው የገቢ ማሰባሰቢያ የጨረታ መርሃ ግብር ተሸጋግሯል። ለጨረታ የቀረበው የኢትዮጵያ ሰንደቅ ዓላማ ሲሆን፣ ጨረታውን ለማሸነፍ የነበረው ፉክክር ሞቅ ያለ ነበር። ሞቅ አድርጉት እያለ ሞቅ ባለ ዋጋ ባለ ዕድሉ የኢትዮጵያ ሰንደቅ ዓላማ በክብር ተረክበውታል።

 

በአርቲስት እንዳለ እና በወጣቶች የተዘጋጀ የምርጫ 97 ”ድምፃችን ይመለስ!” በሚል ሰላማዊ ሰልፍ ወጥተው የተገደሉ ወጣት ሰላማዊ ሰልፈኞችን ሁኔታ ያስታወሰ ታሪካዊ ድራማ እና በየዝግጅቱ ጣልቃ አዝናኝ ሙዚቃዎች ቀርበዋል። ኢትዮጵያዊነት አንድነት እና ፍቅር የታየበት የተዋጣለት ዝግጅት ነበር።

አዲስ ቪዲዮ

ዜና እና ፖለቲካ

ኪነ-ጥበብ

ቪዲዮ

መጻሕፍት

ስለእኛ

ይከተሉን!