አቶ አባይነህ ወ/ት ብርቱካን የተሸለመችውን መኪና እንደሚያስመልሱ ገለጹ

AEUP General Assembly20080622
 

Ethiopia Zare (እሁድ ሰኔ 15 ቀን 2000 ዓ.ም. June 22, 2008)፦ በኢንጂንየር ኃይሉ ሻውል የሚመራው ቅንጅት/መኢአድ ለጉባዔተኛውና ለጋዜጠኞች በቅንጅት ስም ጉባዔውን ጠርቶ፤ ለአዲስ አባባ መስተዳድር ለስብሰባ ማሳወቂያ ክፍል ደግሞ በመኢአድ (በመላው ኢትዮጵያ አንድነት ድርጅት) ስም የስብሰባ ፈቃድ ጠይቆ፤ ዛሬ እሁድ ሰኔ 15 ቀን 2000 ዓ.ም. ጠቅላላ ጉባዔውን አካሂዶ ኢ/ር ኃይሉ ሻውልን በፕሬዝዳንትነት መረጠ።

 

ከአምባሳደር ወደ ቴዎድሮስ አደባባይ በሚወስደው መንገድ ላይ ከሊሴ ገ/ማርያም ት/ቤት ጎን በሚገኘው የመኢአድ ቢሮ ከዓርብ ጀምሮ ከየክልሉ ከመጡ የጉባዔው ተጋባዦች ጋር ውይይት ማድረግ ጀምረው ነበር። በዕለቱም የቀድሞው ቅንጅት መተዳደሪያና የፓርቲው ፖሊሲ ላይ ተነጋግረው ለማጽደቅ ቢሞክሩም የተሻለ ሃሳብ የሚያቀርብ በመጥፋቱ ውሳኔ ላይ ሳይደረስ፣ የሥራ ሪፖርት አቅርበዋል።

 

AEUP General Assembly 20080622

 

የጉባዔው አባላት እነወ/ት ብርቱካንን ጨምሮ ከሌሎች አባላት ጋር ለምን ተግባብተው እንደማይሰሩ ጥያቄ ቀርቦላቸው ረዘመ ላለ ጊዜ ውይይት አድረገዋል።

 

ኢ/ር ኃይሉ ከእነ ወ/ት ብርቱካን ጋር ተግባብቶ ለመሥራት የተሞከረው ሙከራ አለመሳካቱን ገልጸው፣ ካሁን በኋላ እነሱም የራሳቸውን ፓርቲ ስላቋቋሙ የሚያደራርሳቸው ነገር እንደሌለ ተናግረዋል።

 

ዛሬ በተደረገው ጉባዔም ምርጫ የተካሄደ ሲሆን፣ ኢ/ር ኃይሉ ሻውል ፕሬዝዳንት፣ ሻለቃ ጌታቸው መንግሥቴ ም/ሊቀመንበርና የምስራቅ ኢትዮጵያ ቀጠና ኃላፊ፣ አቶ አባይነህ ብርሃኑ ም/ሊቀመንበርና የሰሜን ኢትዮጵያ ቀጠና ኃላፊ፣ ዶ/ር ታዲዮስ ቦጋለ ም/ሊቀመንበርና የደቡብ ኢትዮጵያ ቀጠና ኃላፊ፣ አቶ አሰፋ ሀብተወልድም ሊቀመንበርና የምዕራብ ኢትዮጵያ ቀጠና ኃላፊ ሆነው ተመርጠዋል።

 

AEUP General Assembly 20080622

 

ኢንጂንየር ኃይሉ ለፕሬዝዳንትነት እንደተጠቆሙ ጠቅላላ ጉባዔው ደማቅ ጭብጨባ በማሰማት እንደመረጣቸው ታውቋል። ኢ/ር ኃይሉ ባደረጉት ንግግር “አንካሳ ሰው ምን ያደርግላችኋል?” ሲሉ ተደምጠዋል።

 

ዋና ፀሐፊ አቶ ወንደሰን ተሾመ፣ የህዝብ ግንኙነት ኮሚቴ ኃላፊ ወ/ት በመሶበወርቅ ቅጣው፣ የገንዘብና ንብረት ጉዳይ ኮሚቴ ኃላፊ ዶ/ር በዛብህ ደምሴ፣ የሴቶች ጉዳይ ኃላፊ ወ/ሮ ዓለማየሁ ሞገድ፣ የወጣቶች ጉዳይ ኃለፊ አቶ ማሙሸት አማረ እና በሌሎች ዘርፎችም ምርጫ ተደርጉዋል።

 

አቶ አባይነህ ብርሃኑ፣ ወ/ት መሶበወርቅ ጣሰው እና አቶ ወንድወሰን ተሾመ ከአምስት የተለያዩ ሚዲያዎች ለመጡ ጋዜጠኞች ጋዜጣዊ መግለጫ ሰጥተዋል። በጋዜጣዊ መግለጫው ላይ የጉባዔውን አጠራር አስመልክቶና ፈቃድ የተጠየቀው በመኢአድ ስም መሆኑን በሚመለከት ለቀረበው ጥያቄ፤ መኢአድ ከቅንጅት መስራቾች ውስጥ አንዱ በመሆኑ፣ በስሙ ፈቃድ መጠየቁ ምንም ችግር እንደማያስከትል ተናግረዋል።

 

በዚሁ ጋዜጣዊ መግለጫ ላይ ጠቅላላ ጉባዔው ለሥራ አስፈጻሚው ሥልጣን መስጠቱን ገልጸዋል። ከተቻለና ፈቃዱ ከተገኘ በቅንጅት ስም፣ ካልተቻለ ግን ሥራ አስፈጻሚው በሚወስነው ስም እና ዓርማ ፓርቲውን በሕጋዊ መንገድ ይዞ ለመሄድ በዛሬው ዕለት የተሰበሰበው ጠቅላላ ጉባዔ ለሥራ አስፈጻሚው ሥልጣን እንደሰጠውና ውሳኔ እንዲሰጥ እንደፈቀደለት አብራርተዋል።

 

አቶ አባይነህ ብርሃኑ በጋዜጣዊ መግለጫው ላይ በቅንጅት ስም በሀገር ውስጥም ሆነ በውጭ ሀገር የተሰበሰበውንና የተዋጣውን ገንዘብ ፓርቲያቸው በውዴታም ሆነ በሕግ እንደሚያስመልስ ገልጸዋል።

 

AEUP General Assembly 20080622

 

ይህንን ጉዳይ አስመልክቶ ከአንድ ጋዜጠኛ “በሀገር ውስጥም ስትሉ የብርቱካንንም መኪና ይጨምራል ወይ?” የሚል ጥያቄ ቀርቦላቸው ነበር። አቶ አባይነህ ለዚህ ጥያቄ ሲመልሱ፣ እስካሁን ድረስ አላሰብንበትም፣ ከአሁን በኋላ ተነጋግረንበት በሕግ አግባብ የሚመለስበት ሁኔታ ሊኖር ይችላል ብለዋል።

 

በዚህ ጠቅላላ ጉባዔ ላይ ተሳታፊ የነበሩት 800 ሰዎች እንደነበሩ ታውቋል። ከእነዚህም ውስጥ አብዛኞቹ ከየክፍለ ሀገሩ እንደመጡ ለመረዳት ተችሏል።

 

ከክፍለ ሀገራቱ የተሰባሰቡት አብዛኞቹ ጉባዔተኞች ችግረኞችና የኢኮኖሚ አቅማቸው ዝቅተኛ እንደነበር፣ የውሎ አበል ይታሰብላችኋል ተብለው የመጡ ሲሆን፤ በዚህም መሠረት ከምሳ በስተቀር ምንም አይነት ወጪ እንዳልተደረገላቸውና በቀን የሃምሳ ብር የውሎ አበል እንደተከፈላቸው ለማወቅ ችለናል። በዚህም ምክንያት አብዛኞቹ ሲነጫነጩና ሲበሳጩ ተስተውለዋል።

 

አዲስ ቪዲዮ

ዜና እና ፖለቲካ

ኪነ-ጥበብ

ቪዲዮ

መጻሕፍት

ስለእኛ

ይከተሉን!