Eng. Hailu Shawelበመኢአድ ስም ሊቀጥሉ ይችላሉ

Ethiopia Zare (ማክሰኞ ሐምሌ 15 ቀን 2000 ዓ.ም. July 22, 2008)፦ የቅንጅት አመራሮች ከእስር ከተፈቱ በኋላ በተፈጠረው ልዩነት ኢ/ር ኃይሉ ሻውል የሚመሩት ቡድን ”ቅንጅት ለአንድነትና ለዲሞክራሲ ፓርቲ” ይገባኛል በማለት ምርጫ ቦርድን ከስሶ ሲከራከር የነበረ ሲሆን፣ በዛሬው ዕለት የዋለው ችሎት ለምርጫ ቦርድ ወስኖ እነኢ/ር ኃይሉ ሻውልን ”ቅንጅት” የሚለውን ስም መከልከሉን ለኢትዮጵያ ዛሬ የደረሰው መረጃ ጠቆመ። 

 

”ምርጫ ቦርድ እኛ ቅንጅት ለአንድነትና ለዲሞክራሲ ፓርቲ እንዲሰጠን አመልክተን እስር ቤት በመግባታችን ለማይመለከተው ለአየለ ጫሚሶ ሰጥቶብናል፤ ስለዚህ ስሙ የሚገባው ለእኛ ነው” በሚል ነበር የኢ/ር ኃይሉ ሻውል ቡድን ክሱን መስርቶ ሲከራከር የነበረው። ዛሬ በዋለው ችሎት ኢ/ር ኃይሉ በችሎቱ ተገኝተው ውሳኔውን መስማታቸውን የደረሰን መረጃ ይጠቁማል።

 

ምንም እንኳን በዛሬው ችሎት በስሙ ጉዳይ እነኢ/ር ኃይሉ ሻውል ቢረቱም፤ ይግባኝ ማለት እንደሚችሉ ለመረዳት ችለናል።

 

እንደአንዳንድ የፖለቲካ ተንታኞች ግምት ከሆነ እነኢ/ር ኃይሉ ጠቅላላ ጉባዔው ለሥራ አስፈጻሚው በሰጠው የድርጅቱን ስምና ዓርማን የመወሰን ሥልጣን ተጠቅመው በመኢአድ ስም ፈቃድ ለማውጣት በቅርቡ ማመልከቻ ሊያስገቡ እንደሚችሉ ገልጸዋል። በ”ቅንጅት ለአንድነትና ለዲሞክራሲ ፓርቲ” ስም ጉዳይ ላይ ክርክሩን ለመቀጠል ቢወስኑና ቢቀጥሉ በክርክር ብቻ ብዙ ጊዜ ሊፈጁ እንደሚችሉ እነዚሁ የፖለቲካ ተንታኞች ለኢትዮጵያ ዛሬ አስረድተዋል።

 

ኢ/ር ኃይሉ የሚመሩት ይኸው ቡድን ባለፈው ሰኔ 13 እና 14 ቀን 2000 ዓ.ም. ጠቅላላ ጉባዔ ማድረጉ አይዘነጋም። የጠቅላላ ጉባዔው ጥሪ ለአባላቱም ሆነ ለተጋባዥ እንግዶች የተላለፈው በቅንጅት ለአንድነትና ለዲሞክራሲ ፓርቲ ስም ሲሆን፣ የአዲስ አበባ ከተማ አስተዳደር የስብሰባ ማሳወቂያ ክፍልና ምርጫ ቦርድ በመኢአድ ስም እንዲደረግ ብቻ በመፍቀዱ ጉባዔው በመኢአድ ስም መከናወኑ አይዘነጋም። ነገር ግን ስብሰባው የተመራውም ሆነ ምርጫ ተደረገው፣ መግለጫ የተሰጠው በቅንጅት ለአንድነትና ለዲሞክራሲ ስም እንደነበር ይታወቃል።

 

አዲስ ቪዲዮ

ዜና እና ፖለቲካ

ኪነ-ጥበብ

ቪዲዮ

መጻሕፍት

ስለእኛ

ይከተሉን!