በአዲስ አበባ ኀዘኑን ለመግለጽ የወጣው ህዝብ ድብደባ ደረሰበት

ISIS massacre on Ethiopian Christians in Libya

Ethiopia Zare (ማክሰኞ ሚያዝያ 13 ቀን 2007 ዓ.ም. April 21, 2015)፡- ሚያዝያ 11 ቀን 2007 ዓ.ም. በሊቢያ የሚኖሩ 30 ኢትዮጵያውያንን በጥይት በመደብደብ እና በካራ በማረድ አይሲስ (ISIS) የተባለው አሸባሪ ቡድን በፈፀመው ግድያ በሀገር ቤትና በውጪ የሚኖሩ ኢትዮጵያዊያን ሁሉ ከፍተኛ ኀዘን ላይ ወድቀዋል። ይህንን ግድያ አስመልክቶ የኢትዮጵያ መንግሥት ዘግይቶ የኀዘን መግለጫ ያወጣ ሲሆን፣ በመግለጫውም በመላው ሀገሪቱ ለሦስት ቀናት ብሔራዊ ኀዘን ሆኖ እንዲቆይ እንዲሁም በኢትዮጵያና በኤምባሲዎች ጭምር የሚገኙ ባንዲራዎች ዝቅ ብለው እንዲውለበለቡ አዟል።

ይህ ከፍተኛ ኀዘን ያደረሰው አሰቃቂ ግድያ የተፈጸመው በደቡብ አፍሪካ በኢትዮጵያውያን ላይ የተፈጸመው የቃጠሎ ግድያ፣ የንብረት ማውደም ጥቃት ውሎ ሳያድር በመሆኑ ለሀገራችን ህዝብ ተደራራቢ ኀዘን ሆኖበታል።

ISIS massacre on Ethiopian Christians in Libya

በሊቢያ አሸባሪ ቡድኑ በሚንቀሳቀስበት አቅራቢያ የቤታቸውን በር ዘግተው የሚገኙት ሌሎች ከ90 በላይ ኢትዮጵያውያን መጨረሻቸው ምን እንደሚሆን ሊታወቅ ባለመቻሉ ሌላው አሳሳቢ ችግር መሆኑ ታውቋል። እነዚሁ ከአይሲስ ተደብቀው የሚገኙ ኢትዮጵያውያን የድረሱልኝ ጥሪ እያቀረቡም ይገኛሉ። እነዚሁ ሴቶችና ወንዶች ሆነው በተለያየ ክፍል ተደብቀው የሚገኙ ወገኖች ላለፉት ሦስት ቀናት ምግብ ማግኘት እንዳልቻሉ ለመረዳት ተችሏል።

Addis Ababa: Protest on ISIS massacre on Ethiopian christians in Libya

ዛሬ ረፋዱ ላይ ብሶትና ኀዘን የፈነቀለው የአዲስ አበባ ነዋሪ ድንገተኛ ሰልፍ አድርጎ ወደ መስቀል አደባባይ ተሟል። ሰልፈኛው የሟች ልጆቹንና ወገኖቹን ፎቶ በመያዝ ጩኸቱን እያሰማ የወጣ ሲሆን፣ በዚህ ባልታሰበ ሰልፍ ያልተደሰቱት የመንግሥት ባለሥልጣናት የፖሊስ ኃይል በማሰማራት አደባባይ የወጣውን ህዝብ በዱላ እየደበደቡ በመኪና ሲጭኑት ተስተውለዋል። እስካሁን ድረስ ሰልፈኛውን ለመበተን በተደረገው እርምጃ የቆሰለውንና ታፍሶ የተወሰደውን ቁጥር ለማወቅ አልተቻለም።

Addis Ababa: Protest on ISIS massacre on Ethiopian christians in Libya

ከዚህ ጋር ተያይዞ በተለያዩ የውጪ አገር ከተሞች ኢትዮጵያውያን በየአካባቢያቸው ቤተክርስቲያናት በመሰብሰብ ወገኖቻቸውን በጸሎት አስበዋል። ከዚህም በተጨማሪ የዋሽንግተን ነዋሪዎችን ጨምሮ በግሪክና በሌሎችም አገሮች የሚገኙ ኢትዮጵያውያን በሳውዲ ዐረቢያና በደቡብ አፍሪካ ኤምባሲ ጽ/ቤቶች በመሰለፍ የተደረገውን ግድያ በማውገዝ፤ በጭፍጨፋው የተሰማሩት ለፍርድ እንዲቀርቡ እና እርምጃም እንዲወሰድ ጠይቀዋል።

ይህ በእንዲህ እንዳለ የኢትዮጵያ ኦርቶዶክስ ቤተክርስቲያን ግድያውን በማውገዝ መግለጫ አውጥታለች። ቤተክርስቲያኗ በማንኛውም የሰው ልጅ ላይ የሚደርስን ጥቃት እንደማትፈቅድና እንደምትቃወም ገልጻ፤ ይህ የአሸባሪዎች እርምጃም ማንኛውንም ኃይማኖት የማይወክል በመሆኑ ኢትዮጵያውያን ሁሉ በአንድነት ማውገዝ ይገባቸዋል ብላለች። ከዚህም ሌላ ይኸው በሀገር ውስጥ የሚገኘው የኢትዮጵያ ኦርቶዶክስ ቅዱስ ሲኖዶሱ ከነገ ሚያዝያ 14 ቀን 2007 ዓ.ም. ጀምሮ ለሰባት ቀናት ፀሎተ ምህላ እንዲደረግ አዝዟል።

”ድምጻችን ይሰማ!” በሚል የሚታወቁትና በአገር ውስጥ ያሉ ኢትዮጵያውያን ሙስሊሞች፣ ”በክርስቲያን ወገኖቻችን ላይ በደረሰው ጭካኔ የተመላበት ግድያ አዝነናል” የሚል መግለጫ በማውጣት ድርጊቱን ማውገዛቸው ታውቋል። በተለያዩ አገራት በስደት የሚገኙ ኢትዮጵያውያን ሙስሊሞችም በተለያዩ የማኅበራዊ ድረገጾች በወገኖቻቸው ላይ በደረሰው አሰቃቂ ግድያ የተሰማቸውን ጥልቅ ኀዘን ከመግለጻቸውም ባሻገር፤ አይሲስ እስልምናን አይወክልም ሲሉ ተደምጠዋል።

የአሜሪካ መንግሥት ይንንኑ ግድያ በማውገዝ መግለጫ ያወጣ ሲሆን፣ በሀገር ውስጥና በውጪ የሚገኙ ኢትዮጵያዊ የፖለቲካ ድርጅቶች የተቃውሞ መግለጫ አውጥተዋል። በአውሮፓና በአሜሪካ የተለያዩ ከተሞች ከሐሙስ ጀምሮ የተቃውሞ ሰልፎች ለማድረግ ጥሪ ተላልፏል።

ከዚሁ ጋር በተያያዘ፣ ኢትዮጵያ በዜጎቿ ላይ ለደረሰው ጥቃት የአፀፋ እርምጃ በአሸባሪው ቡድን ላይ የምትወስድ ከሆነ ግብጽ ለእርምጃው ተባባሪ እንደምትሆን በኢትዮጵያ የግብጽ አምባሳደር መሐመድ ኢድሪስ አሳውቀዋል። ከደቡብ አፍሪካና ከሊቢያ ግድያ ውጭ በየመን ከፍተኛ አደጋ እያንዣበበባቸው የሚገኙ ኢትዮጵያውያንም እንዳሉ አይዘነጋም። ይህ ሣምንት በኢትዮጵያውያን ዘንድ ጭለማው ሣምንት የሚል ስያሜ ተሰጥቶታል።

አዲስ ቪዲዮ

ዜና እና ፖለቲካ

ኪነ-ጥበብ

ቪዲዮ

መጻሕፍት

ስለእኛ

ይከተሉን!