Ethiopia Zare (እሁድ ሐምሌ 20 ቀን 2000 ዓ.ም. July 27, 2008)፦ ኢትዮጵያውያን ባለሥልጣኖች የተለያዩ ፕሮጀክቶችን ወስደው ሥራ ለመሥራት ኢትዮጵያ ከሚገቡ የቻይና ድርጅቶች ጋር በከፍተኛ ሙስና ተሳስረዋል። ቻይናውያን ከሚወስዱዋቸው በቢሊዮን በሚቆጠር ገንዘብ የሚያወጡ ፕሮጀክቶች መካከል የመንገድ ሥራ፣ የቴሌ ኔትዎርክ ግንባታ፣ የመብራት ኃይል ሥራዎች ተጠቃሽ ናቸው።

 

ምንጮች እንደሚሉት ቻይናውያኑ ከትርፋቸው ላይ በሚሊዮን የሚቆጠር ገንዘብ ለባለሥልጣናቱ ስለሚያካፍሉ በተደጋጋሚ ጨረታዎችን ያሸንፋሉ። ሰሞኑን ይንንኑ በሚመለከት ጉቦ ለመቀበል ሲደራደሩ ተደርሶባቸዋል የተባሉ የሥራ ኃላፊ ታስረዋል።

 

ለጉዳዩ ቅርብ የሆኑ ምንጮች ስለሁኔታው እንደገለጹት በቢሊዮን ብር የሚቆጠር ገንዘብ የሚወጣባቸው የኢትዮጵያ ቴሌኮሙዩኒኬሽን ኮርፖሬሽን ፕሮጀክቶችን እንዲሠራ የተዋዋለው የቻይና ኩባንያ ኃላፊዎች ለሥራ ወደ ኢትዮጵያ ሲመጡ፣ የቴሌ ባለሥልጣን ወደ መኖሪያ ቤታቸው ወስደው እራት ይጋብዙዋቸውና ከጠቅላላ ፕሮጀክቱ የኮሚሽን ክፍያ ጥያቄ ያቀርቡላቸዋል።

 

ጥያቄው ሲቀርብ አብሮ ነበረ አንድ ቻይናዊ ምልልሱን ይቀርጽና ያስቀምጣል። ከጊዜ በኋላ ቻይናዊው ጉቦ ሲቀባበል ተይዞ በድርጅቱ እርምጃ ይወሰድበትና ከኩባንያውና ከኢትዮጵያ ይባረራል። ወደአገሩ ከተመለሰ በኋላ የቀረጸውን የድርድር ቪዲዮ በሲዲ አድርጎ ለቴሌ ሠራተኞች መበተኑን ምንጮች ይጠቅሳሉ።

 

በሲዲው አማካኝነትም የቴሌ የሥራ ኃላፊዎች ባለፈው ረቡዕ ሊታሰሩ ችለዋል። ዜድ.ቲ.ኢ. (ZTE) የተሰኘው የቻይና ኩባንያ በርካታ ሥራዎችን የሠራና እያሠራ የሚገኝ ሲሆን፣ ለቴሌ ብድር እየሰጠ ጭምር የሚያሰራ ኩባንያ ነው።

 

ለጉዳዩ ቅርብ የሆኑ የኢትዮጵያ ዛሬ ምንጮች እንደሚሉት ከሆነ ቻይናውያኖቹ ያለሙስና ምንም እንደማይሠራ ስለሚያውቁ ለሚሠሩት የፕሮጀክት ሂሳብ ሲጠይቁ ከነጉቦው ነው። በተዘዋዋሪ ጉቦውን የሚከፍለው ከመንግሥት ገንዘብ ላይ ነው፤ የፕሮጀክቱን ሂሳብ መንግሥት ስለሚከፍል።

 

እነዚሁ የኢትዮጵያ ዛሬ ምንጮች አክለው እንደሚሉት ከሆነ ቻይናውያኖቹ ሁሌም ጉቦ ለመስጠት በተጠንቀቅ ተዘጋጅተው ነው ወደ ሀገር ቤት የሚሄዱትም ሆነ ሀገር ውስጥ የሚንቀሳቀሱት። ምንጮቻችን ለምሣሌ ብለው ሲጠቅሱ፤ ቻይናዎቹ ሞባይሎች፣ ዲጂታል ካሜራዎች፣ ዩ.ኤስ.ቢ.ዎችና በርካታ ገንዘብ በቦርሳ ይዞ የሚዞር ለዚሁ ሥራ ተዘጋጀ ሰው አላቸው። እናም ላስቸገራቸው ሰው ወዲያውኑ ጉቦ በመስጠት ይታወቃሉ።

 

ምንጮቻችን እንደሚሉት ከሆነ በዚሁ በጉቦና ተያያዥ ምክንያቶች አንዳንድ ሥራዎች ከኢትዮጵያውያኖች እየተቀሙ ለቻይናውያን ይሰጣሉ። ከኢትዮጵያዊ ኮንትራክተር ላይ ሥራ ተቀምቶ ለቻይናዊ መስጠት የተለመደ እንደሆነ ጠቁመዋል።

 

የዛሬ ዓመት (በ1999 ዓ.ም.)፤ አዲስ አበባ ውስጥ ከሳር ቤት መካኒሳ እና ከሳር ቤት ገብርኤል መንገድ ለመሥራት ጨረታውን አሸንፎ ሥራውን ጀምሮ ከነበረው ”በርታ ኮንስትራክሽን” ከሚባል የአገር ውስጥ ኩባንያ ላይ ተቀምቶ ሲ.አር.ቢ.ሲ. (CRBC) ለሚባል የቻይና ኩባንያ መሰጠቱ ይታወቃል። በወቅቱ የተሰጠው ምክንያት ”በርታ ኮንስትራክሽን በተሰጠው ጊዜ ለማጠናቀቅ አይችልም” የሚል እንደነበር ታውቋል።

 

አዲስ ቪዲዮ

ዜና እና ፖለቲካ

ኪነ-ጥበብ

ቪዲዮ

መጻሕፍት

ስለእኛ

ይከተሉን!