Xerox Ethiopia Zare (ማክሰኞ ሐምሌ 22 ቀን 2000 ዓ.ም. July 29, 2008)፦ ኢንጂንየር ናርዶስ ሙሉጌታ ነዋሪነቱ በእንግሊዝ አገር ሲሆን፣ የ40 ዓመት ጎልማሳ ነው። የሚሠራው በታዋቂው የፎቶ ኮፒ ማሽን አምራች በሆነው ዜሮክስ (Xerox) ኩባንያ ውስጥ ነበር። 

 

ኢትዮጵያዊው ኢንጂንየር ናርዶስ ከጊዜ ወደ ጊዜ በሚሠራበት መ/ቤት ውስጥ በሚገኙ ጓደኞቹ፣ የሚደርስበት ዘረኛ ስድብና መገለል ምክንያት፣ ሁለት ጊዜ ራሱን እስከ ማጥፋት ደረጃ ደርሷል።

 

በነዚህ ዘረኝነትን በሚያራምዱ ሠራተኞች የተለያየ በደል ሲደርስበት የቆየው ኢንጂንየር ናርዶስ፣ በነዚሁ ዘረኛ ሠራተኞች ”ጥፋልን፤ አንተ ዕድለኛ ነህ ከኛ ጋር አብረህ ለመሥራት ችለሃል፣ የአንተ አያቶችና ቅድመ አያቶች የኛ ገረዶችና አገልጋዮች ነበሩ” በማለት ይዘልፉት ነበር።

 

በመሥሪያ ቤቱ ባጋጠመው የዘር መድልኦ የገጠመው ችግር፣ ከዕለት ወደ ዕለት በጤናው ላይ እክል እየፈጠረበት የመጣው ኢንጂንየር ናርዶስ፣ ሕክምና ማድረግ ቢጀምርም እነዚሁ ዘረኞችና አለቆቻቸው አማካይነት የሕክምና ቀጠሮውን በትክክል እንዳይከታተል መሰናክል ሊፈጥሩበት ችለዋል።

 

መደበኛው የሕክምና ቀጠሮ የተስተጓጎለበት ኢንጂንየር ናርዶስ፣ ከሐኪም ትዕዛዝ ውጪ፣ ከመጠን ያለፉ መድኃኒቶች እየወሰደ በመምጣቱ፣ የጤንነቱ ሁኔታ እየባሰበት ሊመጣ ችሏል።

 

የሕክምና ባለሙያዎች ኢንጂንየር ናርዶስ ሕክምናውን መከታተል ወደሚያስችለው የሥራ ቦታ እንዲዘዋወር ቢፈቅዱለትም፣ የመሥሪያ ቤቱ ኃላፊዎች ሊፈቅዱለት አልቻሉም።

 

ኢንጂንየር ናርዶስ በእንግሊዝ አገር በሚገኘው ሮስትራትፎርድ የሠራተኞች ጉዳይ በሚሰማ ፍ/ቤት ባቀረበው ክስ፣ ዜሮክስ ኩባንያ ላደረሰበት ጉዳት ከ160 ሚሊዮን ብር በላይ (8 ሚሊዮን የእንግሊዝ ፓውንድ) ካሣ እንዲከፍለው ጠይቋል።

 

በችሎቱ ላይ የቀረቡትን ክሶችና የካሣ ጥያቄ፣ የዜሮክስ ኩባንያ ሙሉ በሙሉ ያጣጣለው ቢሆንም ችሎቱ በቀጣይ መታየቱ የማይቀር ሆኗል።

 

አዲስ ቪዲዮ

ዜና እና ፖለቲካ

ኪነ-ጥበብ

ቪዲዮ

መጻሕፍት

ስለእኛ

ይከተሉን!