Ethiopia Zare (ቅዳሜ ነኀሴ 3 ቀን 2000 ዓ.ም. August 09, 2008)፦ ሐሙስ ዕለት የግብርናና ገጠር ልማት ሚኒስቴር ሚኒስትር ዴኤታ ዶክተር አበራ ደሬሣ እና የአደጋና መከላከል ዝግጁነት ኤጀንሲ ዳይሬክተር ስምኦን መቻሌ ለዓለም አቀፍ የሚዲያ ሰዎች በሰጡት መግለጫ የረሃብተኛው ቁጥር መጨመሩንና አስቸኳዋይ የምግብ ዕርዳታ እንደሚስፈልግም ገለጹ።

 

ለዚህም በቁጥር ሲያስቀምጡ በእጃቸው ላለው 4 ነጥብ 6 ሚሊዮን የተራበ ህዝብ 278 ሺህ ሜትሪክ ቶን ምግብ እንደሚያስፈልጋቸው፤ ያላቸው ግን 20 ሺህ ሜትሪክ ቶን መሆኑን ገልጸው፤ ምግብ ነክ ላልሆኑ ዕርዳታዎች ደግሞ ሦስት ሚሊዮን ዶላር እንደሚያስፈልጋቸው ገልጸዋል።

 

ጠ/ሚኒስትር መለስ ዜናዊ በዚህ ሣምንት ከተነበበው ታይም መጽሔት ጋር ባደረጉት ቃለምልልስ ላይ ኢትዮጵያ በተደጋጋሚ በረሃብ የምትጠቃ መሆኑን ገልጸው፤ ችግሩ ሊከሰት እንደሚችል አለመገመት ደደብነት ነው ብለዋል።

 

ጠ/ሚ/ር መለስ የአስቸኳይ ዕርዳታን በሚመለከት ለቀረበላቸው ጥያቄ ችግሩን አቃልለው መልሰዋል። እርዳታ ቢያስፈልግም ረሃብ ግን የለም ብለዋል። ከዚህም ሌላ እነዩኒሲኤፍ የሚሰጡትን የረሃብተኛ እና የሚያስፈልገውን ዕርዳታ በሚመለከት አኀዙ ሐሰት መሆኑን ገልጸዋል።

 

በኢትዮጵያ በተደጋጋሚ የተከሰቱትን አደገኛ የድርቅና የረሃብ አደጋዎች የኋላ ታሪክ እንደሚያሳዩት ከሆነ የአጼውም ሆነ የደርግ መንግሥታት የተራበውን ህዝብ ቁጥርና የሚያስፈልገውን የእህልና የገንዘብ ዕርዳታ በመደበቃቸው ምክንያት በመቶ ሺህዎች የሚቆጠሩ ሕፃናት፣ ሴቶች፣ አረጋውያን፣ ... ለሞት መዳረጋቸውና በረሃብ/በችጋር ማስጨረሳቸው አይዘነጋም።

 

አሁንም በዚህ በያዝነው ዓመት ከጥር ወር ጀምሮ (ከሰባት ወር በፊት) ድርቅና ረሃብ እንደሚከሰት በተደጋጋሚ ከተለያዩ መንግሥታዊ ካልሆኑና ዓለም አቀፍ ድርጅቶች ማስጠንቀቂያ እየሰጡና እያሳሰቡ የነበሩ ቢሆንም መንግሥት ግን እነዚህ ወገኖች የሚሰጡት ቁጥር ላይ ብቻ በማተኮር ሙግት መግጠሙ ዋጋ እንደሌለው በርካታ ወገኖች እየገለጹ ይገኛሉ።

 

በተለይ ከመንግሥት የሚጠበቀው እንዳለፉት መንግሥታት በቁጥር ላይ አተኩሮ አላስፈላጊ ክርክር ውስጥ ተገብቶ የሰዎች በተለይም የሕፃናት ሕይወት እንዳይጠፋ በግልጽ በረሃብ የተጎዳውን፣ ብሎም ወደፊት/በቅርቡ ሊራብ የሚችለውን ተጨማሪ የህዝብ ቁጥር ሳይቀር ለዓለም በይፋ በመናገርና በማሳወቅ ረሃብተኛውን ማዳን እንደሚጠበቅበት በርካቶች ይስማሙበታል።

 

አዲስ ቪዲዮ

ዜና እና ፖለቲካ

ኪነ-ጥበብ

ቪዲዮ

መጻሕፍት

ስለእኛ

ይከተሉን!