ESAT fundraising, Stockholm Nov. 19, 2016

ኢትዮጵያ ዛሬ (እሁድ ኅዳር ፲፩ ቀን ፳፻፱ ዓ.ም. Nov. 20, 2016)፦ በስዊድን ርዕሰ ከተማ ስቶክሆልም ለኢሳት መርጃ የሚሆን የገንዘብ ማሰባሰቢያ ዝግጅት ተደረገ። ዝግጅቱን ያስተባበረው የስዊድን የኢሳት ድጋፍ ኮሚቴ ሲሆን፣ በዝግጀቱ ላይ በእንግድነት ጋዜጠኛ መሳይ መኮንንና ጋዜጠኛ መታሰቢያ ቀፀላ ተገኝተዋል።

ትናንት በተዘጋጀው በዚሁ የገቢ ማሰባሰቢ ዝግጅት ላይ ብዛት ያለው የስቶክሆልምና አካባቢው ነዋሪ ተገኝቷል። ዝግጅቱ የተጀመረው ማምሻውን 19:00 ሰዓት ሲሆን፣ የመጀመሪያ ተናጋሪ የነበረው ጋዜጠኛ መሳይ መኮንን ነበር።

ጋዜጠኛ መሳይ የኢሳትን የአደረጃጀት፣ የሥራ መዋቅር፣ የፋይናንስ አቅሙንና ችግሩን፣ በገዥው ፓርቲ የሚደረግበትን ጫና አስረድቷል።

ጋዜጠኛ መሳይ ጉዳዩን ሲተነትን፣ ኢሳት በገዥው መንግሥት ከሃያ ጊዜ በላይ ጃም መደረጉን፣ የዲፕሎማሲ ጫና በየጊዜው እንደተቃጣበት፣ መረጃ የሚሰጡም እስራትና ማስፈራሪያ እንደሚደረግባቸው፤ እንዲሁም ታማኝነትን ለማሳጣት የተሳሳተ መረጃ እንዲደርሰው እንደሚያደርግ አሳውቋል።

በአገር ቤት ባለው ተመልካቾች ላይ ከፍተኛ ጫና እንዲደርስበት ከመደረጉም በላይ፤ በአዋጅ እንዳያይ መከልከሉን፣ የዲሽ መንቀል እርምጃ መወሰዱን ገልጾ፤ በዚሁም በውጭ አገር ኮምፒዩተሮችን ሃክ በማድረግ ኢሳትን እንዲያስተላልፉ የተዋዋልናቸውንም ካምፓኒዎች ውላቸውን እንዲያቋርጡ ማድረግ ሰፊ እንቅስቃሴ መንግሥት ማደረጉን አስረድቷል።

ሆኖም ኢሳት ይሄን ሁሉ ጫና በመቋቋም በአሁኑ ጊዜ ከጃሚንግ ነፃ በሆነ ሁኔታ እንዲሁም ሃክ እንዳይደረግ ማስተማመኛ በማግኘት መሥራት እንደቻለ ገልጿል።

በፋይናንስ በኩል ያለውን ሁኔታ ሲያስረዳም ኢሳትን የሚጠቀመው ሕዝብ ብዛት ከፍተኛ ሲሆን፣ የአገልግሎቱን መጠቀም ያህል ገቢ እንደማያገኝ፣ ወጪውና ገቢው እንደማይመጣጠን አሳውቋል።

ኢሳት በአሁኑ ጊዜ ሃምሳ ቋሚና ጊዜያዊ ሠራተኞች የያዘ የዜና አውታር እንደሆነና ዝግጅቱንም በማስፋት የእንግሊዝኛና የኦሮምኛ ፕሮግራሞች መዘርጋቱን አስታውቋል። ለዚህም ምንም እንኳን ተባባሪ ሠራተኞች ቢገኙም ወጪ መጨመሩ ግን እንዳልቀረ አሳውቋል።

ኢሳት እነዚህን ሥራዎች ለማከናወን ቢችልም፣ ቋሚ ዓመታዊ ገቢ ስለሌለው ከአባላቱም የሚሰበስበው ገቢ ስለሚዋዥቅ የሥራ ዕቅድ ለመያዝ እንደሚቸገር አልሸሸገም። ቋሚ ገቢ ለማግኘት አለመቻሉ ለምን እንደሆነ ሲያስረዳም፤ ገንዘብ በራስ ካርድ ለማስገባት ፍራቻ ስላለ፣ እንዲሁም ኢሳት የዳበረ ገቢ እንዳለው በማሰብና ይሄን በመሳሰሉ ምክንያቶች እንደሆነ ገልጿል።

ከጋዜጠኛ መሳይ ገለጻ በኋላ በተነሳው ሃሳብ ዙሪያ ጥያቄና መልስ የታከለበት ውይይት ተደርጓል። በመቀጠልም የገቢ ማስገኛ የጨረታ ዝግጅት በጋዜጠኛ መታሰቢያ ቀፀላ እና በወ/ሮ እመቤት ፋንታሁን መሪነት ተደርጎ በጨረታው ብቻ ከአንድ መቶ ሺህ የስዊድን ክሮነር በላይ ገቢ ተገኝቷል።

ከጨረታው በኋላ በድምጻዊት ማኅሌት ደመረ አቀንቃኝነት እስከ ሌሊቱ አንድ ሰዓት (በኢትዮጵያ ሰዓት አቆጣጠር ከሌሊቱ ሰባት ሰዓት) ድረስ የሙዚቃ ዝግጅት ተደርጓል። ኢሳት ከተቋቋመበት ጊዜ አንስቶ በስዊድን ይሄን የመሰለ ዝግጅት ሲያደርግ ይህ ለሰባተኛ ጊዜ መሆኑ ታውቋል።

አዲስ ቪዲዮ

ዜና እና ፖለቲካ

ኪነ-ጥበብ

ቪዲዮ

መጻሕፍት

ስለእኛ

ይከተሉን!