የቀድሞ ተማሪያቸውና የአሁኑ የውጭ ጉዳይ ሚ/ር ወርቅነህ ገበየሁ የአያት ስም ”ነገዎ” ሳይሆን ”ወልደኪዳን” እንደሆነ መሰከሩ

Prof Merera Gudina meeting with Ethiopian in Amsterdam, 20th Nov. 2016

"በውይይት የማይፈታ ችግር የለም። ስትወያዩ ግን የታሪክ ሂሳብ ማወራረዱ ላይ አታተኩሩ። ትኩረታችሁን አሁን የተጋፈጥናቸው ችግሮች ላይ አድርጉ።" ሲሉ ፕሮፌሰር መረራ ጉዲና አስታወቁ።

ፕሮፌሰሩ ይህንን የገለጹት በኢትዮጵያ ወቅታዊ ሁኔታ ላይ በኔዘርላንድ ከሚኖሩ ኢትዮጵያውያን ጋር በትላንትናው ዕለት (ኖቨምበር 20 ቀን 2016) በአምስተርዳም ባደረጉት ውይይት ላይ ነው። በውይይቱ የኦሮሞ አክቲቪስቶችም ተገኝተው ሃሳባቸውን አካፍለዋል።

ስለ አገሪቱ ፈታኝ ሁኔታ እና ስለወደፊቱ እጣ ፈንታ በስፋት ያብራሩት የኦሮሞ ፌደራሊስት ኮንግረስ መሪ ፕ/ር መረራ ጉዲና፤ ከተሰብሳቢው ለቀረቡላቸው በርካታ ጥያቄዎችም ምላሽ ሰጥተዋል።

"አዋጁ እና ኮማንድ ፖስቱ ሕዝባዊ አመጹን ያበርደዋል ወይ?" ተብለው ሲጠየቁ፣ አገሪቱ አሁን በመስቀለኛ መንገድ ላይ መሆንዋን ገልጸው፤ አሁን ያለው ሁኔታ ላይ እንዲህ ይሆናል ብሎ መናገር እንደማይቻል እና ነገሮች በሁሉም አቅጣጫ ሊሄዱ እንደሚችሉ ጠቁመዋል። ችግሮች እስካልተፈቱና የህዝብ ጥያቄዎች በአግባቡ እስካልተመለሱ ድረስ፤ ሁኔታው ወደ እርስ በርስ እልቂት ሊወስደንም ይችላል ይላሉ ፕ/ር መረራ።

በይፋ አልተነገረም እንጂ፤ ኮማንድ ፖስቱ ከአዋጁ በፊትም የነበረ የኢህአዴግ አሠራር እንደሆነ ፕሮፌሰሩ አክለው ገልጸዋል።

በኢትዮጵያ ፖለቲካ ምዕራባውያን ስላላቸው ሚና ተጠይቀው፤ እኛ የቤት ሥራችንን ካልሠራን ምዕራቡ ዓለም ምንም ሊረዳን አይችልም። እኛ ካልሠራን እንኳን ምዕራቡ ዓለም እግዚአብሔርም አይረዳንም ብለዋል።

Prof Merera Gudina meeting with Ethiopian in Amsterdam, 20th Nov. 2016በዚህ ወቅታዊ በአገር ጉዳይ ላይ በተዘጋጀው የውይይት ላይ ገለጻ ሲሰጡ፤ በዲፕሎማሲው እና በዓለም አቀፍ ሕብረተሰብ በአንድ በኩል፣ በአገር ውስጥ የተጀመሩት በርካታ የ"እርቅ" እንቅስቃሴዎችን በስፋት ቃኝተዋል።

በዓለም አቀፉ ሕብረተሰብ እና በምዕራባውያን አገሮች በኩል አሁን ለተቃዋሚዎች በር ተከፍቷል ይላሉ ፕ/ር መረራ ጉዲና። በጋራ ሆነን በአንድ ቋንቋ የመናገሩ ሕብረታችን ግን አሁንም ፈተና ላይ ነው።

በቅርቡ በአውሮፓ ሕብረት ጥሪ ተደርጎላቸው አገሪቱ ስላለችበት መስቀለኛ መንገድ በስፋት ተናግረዋል። አሜሪካ በነበሩበት ግዜም ከሠማያዊ ፓርቲ ሊቀመንበር ኢ/ር ይልቃል ጌትነት ጋር "አትላንቲክ ካውንስል" ከተባለው የአሜሪካ ቲንክ ታንክ ቡድን ጋር መወያየታቸውን ገልጸዋል። በዚህ ውይይት ሄርማን ኮኽን እና የቀድሞ በኢትዮጵያ የአሜሪካ አምባሳደር ዴቪድ ሺን የተገኙ ሲሆን፤ የተቃዋሚ ፓርቲዎች በሕብረት ያለመንቀሳቀስ ትኩረት ስቦ እንደነበር ይናገራሉ።

ገዥውን ፓርቲ ከተቃዋሚዎች ጋር ለማግባባት ሰባት የሚያህሉ የእርቅ እና ሰላም ቡድኖች በኢትዮጵያ ውስጥ እየተንቀሳቀሱ ነው ብለዋል። አብዛኞቹ የ"እርቅ" ቡድኖች ባህላዊውን የ"አንተም ተው ፣ አንተም ተው" ሚና እንኳን የማይጫወቱ አንድን ወገን ብቻ ለመጫን የተቋቋሙ መሆናቸውንም ይተቻሉ።

ስለ ቀድሞው ተማሪያቸው እና ስለ አሁኑ የውጭ ጉዳይ ሚኒስትር ስለ ወርቅነህ ገበየሁ ተጠይቀው፤ በምርጫ ውድድር ይጠቀምበት የነበረው ስም “ወርቅነህ ገበየሁ ነገዎ” ሲሆን፤ በትምህርት ቤት ያለው ፋይል ላይ ደግሞ “ወርቅነህ ገበየሁ ወልደ ኪዳን” እንደሆነ ገልጸዋል። ይህንን ጉዳይ በሁለተኛው መጽሐፋቸውም ላይ መጥቀሳቸውን ተናግረዋል።

በመጨረሻም በአገር ቤት በኦሮሞ እና በአማራው ሕብረተሰብ እየተፈጠረ ያለው ትብብር፤ እነ ጌታቸው ረዳን ሳይቀር በአደባባይ ወጥተው እንዲናገሩ ያደረገ ትልቅ የታሪክ አሻራ መሆኑን ገልጸው፤ በውጭ ያለውም ወገን የቀድሞ ሂሳብን ማወራረድ አቁሞ፣ በወደፊቱ የአገሪቱ ሁኔታ ላይ እንዲወያይ ምክር ሰጥተዋል።

በቪዲዮ የተቀረጸው ሙሉ ውይይት በቅርቡ ይለቀቃል።

አዲስ ቪዲዮ

ዜና እና ፖለቲካ

ኪነ-ጥበብ

ቪዲዮ

መጻሕፍት

ስለእኛ

ይከተሉን!