Sisi and Isaias met in Cairo

ኢትዮጵያ ዛሬ (ቅዳሜ ኅዳር ፳፬ ቀን ፳፻፱ ዓ.ም. Dec. 3, 2016)፦ የግብጹ ፕሬዝዳንት አብደል ፋታህ አልሲሲ ከኤርትራው አቻቸው ኢሳያስ አፈወርቂ ጋር በካይሮ ተገናኙ። የተገናኙት በኢትዮጵያ ላይ ጫና ለመፍጠር እና በቀጣይ ጉዟቸው ላይ ሊመክሩ እንደሆነ ተዘገበ።

ሁለቱ መሪዎች ማክሰኞ ዕለት አገሮቻቸው በጋራ ሊፈጽሟቸው በሚገቡና የጋራ ግንኙነት ላይ የመከሩ ሲሆን፣ ከተወያዩባቸው በርካታ ፕሮጀክቶች ውስጥ የአሣ እና የግብርና ዘርፎች እንደሚገኙበት ታውቋል።

ኢትዮጵያ በአባይ ወንዝ ላይ ተመሥርታ እየገነባች ባለችው የኅዳሴው ግድብ ላይ ግብጽ ከፍተኛ ስጋት እንዳላት ይታወቃል። የግብጽ ሕይወት በአባይ የተመሠረተ በመሆኑ፣ ኢትዮጵያ ውሃውን ከተቆጣጠረች አደጋ ላይ ይጥለኛል የሚል ምክንያቷ ነው ስጋት ውስጥ እንድትወድቅ ያደረጋት።

ለዘ ኒው ዐረብ ስማቸው እንዲጠቀስ ያልፈለጉ ለጉዳዩ ቅርበት ያላቸው አንድ ምንጭ፣ ”ከኢትዮጵያ ጠላት ጋር መገናኘትና መቀራረብ በኢትዮጵያ ላይ ጫና የሚያሳድር በመሆኑ፤ በኅዳሴው ግድብ ዙሪያ ኢትዮጵያን ሊያለሳልስ ይችላል፤ ከዚህ በተቃራኒው ደግሞ ጉዳዩን ወደከፋ ሁኔታ ሊቀይረው ይችላል” በማለት ስለጉዳዩ ገልጠዋል።

”የዚህ ውይይትና ግንኙነት ዋና ዓላማ ለኢትዮጵያ መልዕክት ለማስተላለፍ ነው። ከዚህ በፊት ግብጽ ኢትዮጵያን በመምታትዋ ጉዳይ ላይ ቀጥተኛ ያልሆኑ ንግግሮች ቢኖሩም፤ ይኽኛው ግን ለኤርትራ ወታደራዊ ድጋፍ ሊሰጥ ይችላል” በማለት ምንጩ አክለው ገልጠዋል።

የቀድሞው የግብጽ ዲፕሎማት ማሱም ማርዙቅ በበኩላቸው፤ ኤርትራን በመጠቀም ኢትዮጵያን የመቆስቆሱ ጉዳይ በጥንቃቄ ሊያዝ የሚገባው ነው ብለዋል።

ባለፈው መስከረም ፳፰ ቀን ፳፻፱ ዓ.ም. (ኦክቶበር 8 ቀን 2016) ኢትዮጵያ ለስድስት ወር የሚዘልቀውን የአስቸኳይ ጊዜ አዋጅ ለማወጅ ያስገደዳትን ሕዝባዊ አመጽ እና እምቢተኝነት ግብጽ እና ኤርትራ ድጋፍ ይቸሩት ነበር ስትል መወንጀልዋ አይዘነጋም።

አዲስ ቪዲዮ

ዜና እና ፖለቲካ

ኪነ-ጥበብ

ቪዲዮ

መጻሕፍት

ስለእኛ

ይከተሉን!