Ethiopia Zare (ቅዳሜ ነኀሴ 10 ቀን 2000 ዓ.ም. August 16, 2008)፦ ከቻይናው የቴሌኮምዩኒኬሽን ኩባንያ በሕገወጥ መንገድ ኮሚሽን ለመቀበል ሞክሯል በሚል ተጠርጥሮ በቁጥጥር ስር ውሎ የነበረው የኢትዮጵያ ቴሌኮምዩኒኬሽን ኮርፖሬሽን ባለሥልጣን ረቡዕ ነኀሴ 7 ቀን 2000 ዓ.ም. ተረኛ በነበረው የፌደራሉ ከፍተኛ ፍርድ ቤት 9ኛ ወንጀል ችሎት ቀርቦ በ10 ሺህ ብር ዋስ የተለቀቀና ከሀገር እንዳይወጣ እገዳ የተጣለበት መሆኑ ታወቀ።

 

ሐምሌ 16 ቀን 2000 ዓ.ም. በፌዴራሉ የሥነምግባርና ፀረ-ሙስና ኮሚሽን ፖሊስ በቁጥጥር ስር የዋለው አቶ ሰንበታ ወንድይራድ፣ በኢትዮጵያ ቴሌኮምዩኒኬሽን ኮርፖሬሽን ውስጥ የፋሲሊቲ ማናጀር ነው።

 

ፖሊስ በምርመራ መዝገቡ ላይ በቁጥጥር ስር የዋለበትን ምክንያት ሲገልጽ ከኢትዮጵያ ቴሌኮምዩኒኬሽን ኮርፖሬሽን ኮንትራቶችን እየወሰደ ከሚሠራው ዜድ.ቲ.ኢ. ከተሰኘው የቻይና የቴሌኮምዩኒኬሽን ኩባንያ ስሙ ካልተጠቀሰ የሥራ ኃላፊ ጋር ከሁለት ኮንትራቶች ጠቅላላ ዋጋ ሁለት በመቶ የኮሚሽን ክፍያ በሕገወጥ መንገድ ለመቀበል ሲዘጋጅ ተደርሶበታል ብሏል።

 

አቶ ሰንበታ ወንድይራድ ሐምሌ 16 ቀን በፌዴራሉ ከፍተኛ ፍርድ ቤት አንደኛ ወንጀል ችሎት ለመጀመሪያ ጊዜ ታስሮ ቀርቦ በነበረበት ወቅት የፀረ-ሙስና ኮሚሽን መርማሪ የ10 ቀን የጊዜ ቀጠሮ ጠይቆበት ነበር። ለሁለተኛ ጊዜ ሐምሌ 25 ቀን 2000 ዓ.ም. ፍርድ ቤት ሲቀርብ በድጋሚ ተጨማሪ የአንድ ሣምንት የጊዜ ቀጠሮ ተጠይቆበት፤ ለሦስተኛ ጊዜ ነኀሴ 1 ቀን 2000 ዓ.ም. ተቀጥሮ ነበር። ነኀሴ 1 ቀንም እንዲሁ የሰባት ቀን የጊዜ ቀጠሮ ተጠየቆበት ለነኀሴ 7 ቀን ለአራተኛ ጊዜ ተቀጥሮ ነበር።

 

የጊዜ ቀጠሮ መዝገቡ እንደሚያስረዳው ከሆነ አቶ ሰንበታ ከዜድ.ቲ.ኢ. የሚገኘው ሁለት በመቶው ኮሚሽን ለኢትዮጵያ ቴሌኮምዩኒኬሽን ኮርፖሬሽን የሥራ ኃላፊዎች እንደሚከፋፈል በመግለጽ፣ ስሙ ካልተጠቀሰው የዜድ.ቲ.ኢ. የሥራ ኃላፊ ጋር በሕገወጥ መንገድ ኮሚሽን ለማግኘት በእንግሊዝኛ ቋንቋ ሲደራደር የሚያስረዳ በሲዲ የተቀረፀ የድምፅ ማስረጃ ቀርቧል።

 

የጊዜ ቀጠሮ መዝገቡ ከላይ ከተጠቀሰው ሌላ ”… አቶ ሰንበታ ስሙ ካልተጠቀሰው የዜድ.ቲ.ኢ. የሥራ ኃላፊ ወጪ፣ የቻይና ቪዛ አስመትቶ፣ አውሮፕላን ቲኬት ተገዝቶለት፣ በሕገወጥ መንገድ የተመነዘረ በመቶ ሺህዎች የሚቆጠር የአሜሪካን ዶላር ይዞ ወደ ቻይና ሄዷል …” ሲል ይዘረዝራል።

 

ነኀሴ 7 ቀን 2000 ዓ.ም. ለአራተኛ ጊዜ ፍ/ቤት አቶ ሰንበታ እንዲቀርብ ታዝዞ በነበረው መሠረት፤ ከነኀሴ 1 ቀን ጀምሮ ለሁለት ወራት ከተዘዋዋሪ ችሎቶች በስተቀር ፍ/ቤቶች ዝግ በመሆናቸው የተነሳ፤ ነኀሴ 7 ቀን ተረኛ በነበረው የፌዴራሉ ከፍተኛ ፍርድ ቤት 9ኛ ወንጀል ችሎት በዋለው ችሎት ፖሊስ የምርመራ መዝገቡን አጠናቅቆ ለዓቃቤ ሕግ ማስተላለፉን ገልጿል።

 

አቶ ሰንበታ የዋስትና መብቱ እንዲጠበቅለት ሲጠይቅ መርማሪ ፖሊሱ የዋስትና መብቱ ቢሰጠው እንደማይቃወም፤ ነገር ግን ከሀገር እንዳይወጣ እንዲታገድ ጠይቋል። ፍርድ ቤቱም አቶ ሰንበታ ወንድይራድን በአስር ሺህ ብር ዋስ እንዲለቀቅ፣ ከሀገር እንዳይወጣ ደግሞ ለኢሚግሬሽን ደብዳቤ ይፃፍ በማለት ትዕዛዝ ሰጥቷል።

 

በፌዴራሉ ከፍተኛ ፍርድ ቤት ዘጠነኛ ወንጀል ችሎት ተሰይመው የነበሩት ዳኖች ዳኛ ፊሊፖስ ዓይናለም፣ ዳና ሰዒዳ ሁሴን እን ዳና ሙሉቀን ተሻለ ነበሩ።

 

አዲስ ቪዲዮ

ዜና እና ፖለቲካ

ኪነ-ጥበብ

ቪዲዮ

መጻሕፍት

ስለእኛ

ይከተሉን!