Ethiopian refugees in Egypt

ኢትዮጵያ ዛሬ (ማክሰኞ ኅዳር ፳፯ ቀን ፳፻፱ ዓ.ም. Dec. 6, 2016)፦ የኦሮሞ ብሔረሰብ ሆነው መንግሥትን በመቃወማቸው ምክንያት በደረሰባቸው አፈናና እንግልት አገር ለቀው የተሰደዱ ኢትዮጵያውያን በግብጽ ሌላ ችግር ገጥሟቸዋል። የተባበሩት መንግሥታት ድርጅት የስደተኞች መርጃ (ዩኤንኤችሲአር) ጉዳያቸውን ውድቅ እያደረገባቸው ወደ አገር ቤት ለመመለስም አስቸጋሪ ሆኖባቸው በሜዲትራኒያን ባህር መጓዝ ግድ ሆኖባቸዋል። በዚህም ብዙዎቹ ሕይወታቸውን በማጣት ላይ ናቸው።

ይህንን የድርጅቱን ተግባር የተቃወሙ በካይሮ የሚኖሩ ኢትዮጵያውያንም ከባለፈው ግንቦት ወር ጀምሮ በተደጋጋሚ የተቃውሞ ሰልፍ ያደርጉ ሲሆን፣ አንድ ኢትዮጵያዊም በድርጅቱ ዋና ቢሮ ፊት ለፊት ራሱን በነዳጅ ዘይት በማቃጠል ራሱን አጥፍቷል።

"ሆን ተብሎ የስደተኝነት ጥያቄያች ውድቅ እየተደረገ ነው" ያሉት ስደተኞቹ፤ ከፍተኛ መገለል እንደሚደርስባቸውም በአጽንኦት ገልጸዋል።

ይሁን እንጂ የዩኤንኤችሲአር የካይሮ ቢሮ ኅላፊዎች ቅሬታውን ውድቅ አድርገዋል። "ሁሉም ወደ አውሮፓ የሚሄዱ ቢፈልጉም እኛ ግን ሆን ብለን አቤቱታቸውን ውድቅ አናደርግም" ሲሉ የገለጹ ሲሆን፣ ከስደተኛው ብዛት አንጻር ሲታይ የሰው ኃይል ችግር እንዳለባቸውም ከመግለጽ አልተቆጠቡም።

የሆነ ሆኖ ኢትዮጵያውያኑ ወደ አገር ቤት ለመመለስም ሆነ የተሻለ ኑሮ ለመኖር ወደሚያስችላቸው አገር ለመሄድ ተቸግረው በአጣብቂኝ ውስጥ መሆናቸውን ሮይተር ዛሬ ባወጣው ዘገባ አትቷል።

አዲስ ቪዲዮ

ዜና እና ፖለቲካ

ኪነ-ጥበብ

ቪዲዮ

መጻሕፍት

ስለእኛ

ይከተሉን!