Fire fighter in addis ababa

ኢትዮጵያ ዛሬ (ማክሰኞ ታህሳስ ፲፰ ቀን ፳፻፱ ዓ.ም. Dec. 27, 2016)፦ ከዚህ በፊት ተከስቶ በማያውቅ ሁኔታው እና አዲስ ክስተት እንደሆነ የተነገረለት የእሳት አደጋ በአዲስ አበባ ውስጥ በሦስት ቦታዎች ተከሰተ። በአደጋው ያለፈ የሰው ሕይወት ባይኖርም፣ ስምንት ሚሊዮን ብር የሚያወጣ ንብረት ወደመ።

ስለ አደጋው መድረስና ስለሁኔታው መግለጫ የሰጡት የአዲስ አበባ የእሳትና ድንገተኛ አደጋዎች መከላከያና መቆጣጠሪያ ባለሥልጣን የኮሚኒኬሽን ኦፊሰር አቶ ንጋቱ ማሞ ናቸው።

አቶ ንጋቱ በመግለጫቸው ላይ ሲያስረዱ፤ የመጀመሪያው አደጋ የደረሰው ታህሳስ ፲፫ ለሊት በአራዳ ፖስታ ቤት ጀርባ እንደሆነና ሁለቱ አደጋዎች ደግሞ ታህሳስ ፲፬ ቀን ጠዋት እና በምሳ ሰዓት በአራዳ ወረዳ ሀብተ ጊዮርጊስ ድልድይ አካባቢና ጉለሌ ወረዳ ከመድኃኔዓለም ቤተ ክርስቲያን ጋር ተያይዘው በሚገኙ የቤተ ክርስቲያኑ ንብረት በሆኑ ቤቶች ላይ መሆኑን ገልጸዋል።

በሦስቱም ቦታዎች በሰው ላይ አደጋ አለመድረሱን፣ በንብረት አኳያ ግን በአጠቃላይ ወደ ስምንት ሚሊዮን ብር የሚያወጣ ንብረት መቃጠሉን አስረድተዋል። አቶ ንጋቱ ስለ አደጋው መነሻም ሲያስረዱ፤ ሰሞኑን ያለው የአየር ንብረት ሙቅና ነፋሻማ በመሆኑ ምክንያት እንደረሰ ይገመታል ብለዋል። አሁንም በሚቀጥሉት ሁለት ወራት ይሄው ሙቀት ስለሚኖር ሕብረተሰቡ ጥንቃቄ እንዲደርግ ማሳሰቢያ ሰጥተዋል።

በተጨማሪ አደጋ ለመቀነስ እሳት ከሚያስነሱ ነገሮች ጥንቃቄ ማደረግ ከሕብረተሰቡ እንደሚጠበቅ፤ እንዲሁም አደጋ ሲደርስ የጉዳት መጠንን መቀነስ እንጂ አደጋ እንዳይደርስ ማድረግ ስለማይቻል አደጋ በደረሰ ጊዜ እራስን ተከላክሎ እሳቱን ለማጥፋት ከሚደረገው ሙከራ ጋር በተቻለ ፍጥነት ለመሥሪያ ቤታችን ማሳወቅ ጠቃሚነት አለው ብለዋል።

አዲስ ቪዲዮ

ዜና እና ፖለቲካ

ኪነ-ጥበብ

ቪዲዮ

መጻሕፍት

ስለእኛ

ይከተሉን!