Habtamu Ayalew arrived in USA

ኢዛ (ዓርብ ጥር ፭ ቀን ፳፻፱ ዓ.ም. Jan. 13, 2017)፦ በአገር ውስጥ ታክሞ መዳን በማይችል ሕመም ሲሰቃይ የከረመው ፖለቲከኛ ሀብታሙ አያሌው አሜሪካ ገባ። በእስር ቤት ሳለ በሕክምና ክትትል ማጣት ሳቢያ በቀላሉ ሊድን ይችል የነበረ ሕመሙ ከተፈታም በኋላ ጸንቶበት ሆስፒታል ተኝቶ ነበር።

ምንም እንኳ የሕክምና ማዕከሉ ሀብታሙ በሀገር ውስጥ ሕክምና ሊድን እንደማይችልና ወደ ውጭ አገር ሄዶ የተሻለ ሕክምና እንዲያደርግ ቢወስንም፤ ከእስር ከተፈታ በኋላ ዳግም ፍርድ ቤት ሲያመላልሰው የነበረው የአቃቤ ሕግ አቤቱታ ሳቢያ ከሀገር እንዳይወጣ እገዳ ተጥሎበታል።

ከሣምንታት በፊት ከተከሰሰበት ወንጀል ነጻ ነው ብሎ ፍርድ ቤቱ ስለወሰነለት አሁን ሀብታሙ ወደ አሜሪካ ለማቅናት ችሏል።

መንግሥት የዜጎችን ጤንነት በእስር ባሉበት ወቅትም ቢሆን የመከታተልና አስፈላጊውን እንክብካቤ ማድረግ ግዴታ ያለበት ቢሆንም፣ ሀብታሙ ለባሰ ሕመም ተዳርጓል። ከዚህም ባሻገር በፍርድ ቤት ትዕዛዝ በሕመሙ እንዲሰቃይ ተደርጓል።

ሀብታሙ አያሌው የቀድሞው አንድነት ለዴሞክራሲና ለፍትህ ፓርቲ ውስጥ ሁነኛ አመራር ሲሆን፣ የኢህአዴግን መንግሥት በተለያዩ ፖሊሲዎቹ ላይ በመሞገት፣ እንዲሁም በሰላማዊ ሰልፎች ላይ በሚያሰማቸው ጠንከር ያሉ ትችቶችና መፈክሮች ይታወቃል።

ሀብታሙ ሕክምናውን መችና የት እንደሚጀምር ያልታወቀ ሲሆን፣ ወደ አገሩ በመመለሱና ባለመመለሱ ጉዳይ ላይ እስካሁን ምንም የተባለ ነገር የለም።

አዲስ ቪዲዮ

ዜና እና ፖለቲካ

ኪነ-ጥበብ

ቪዲዮ

መጻሕፍት

ስለእኛ

ይከተሉን!