Houston half marathon Feyisa Lilesa 2nd place

ኢዛ (ሰኞ ጥር ፰ ቀን ፳፻፱ ዓ.ም. Jan. 16, 2017)፦ ኢትዮጵያዊው አትሌት ፈይሳ ሌሊሳ ትናንት በሂዩስተን በተካሄደው የግማሽ ማራቶችን ውድድር ዳግም ታሪክ ሠራ። ውድድሩን ሁለተኛ ሆኖ ያጠናቀቀ ሲሆን፣ እንደለመደው እጆቹን በማመሳቀል በአገሩ ውስጥ መንግሥት እያካሄደ ያለውን የሰብዓዊ መብት ጥሰት አሳይቷል።

አትሌት ፈይሳ በዚህ ውድድር አንደኛ ለመሆን የሚችል ቢሆንም፤ በመጨረሻ ደቂቃዎች ላይ ሃሳቡ በመበታተኑ ሳቢያ በሊዮናርዶ ከሪር በሰኮንዶች ሽርፍራፊ ሊቀደም ችሏል። አትሌት ከሪር በትውልድ ኬንያዊ ሲሆን፣ ካለው እ.ኤ.አ. 2016 ጀምሮ ለዩናይትድ ስቴትስ ኦፍ አሜሪካ መሮጥ መጀመሩ ይታወቃል።

ባለፈው ክረምት በሪዮ ኦሎምፒክ ተመሳሳይ ድርጊት በመፈጸም ዓለምን ጉድ ያሰኝው አትሌቱ፣ ወደ አገር ቢመለስ መንግሥት እንደሚያስረው ፍርሀቱን በመግለጽ ከኢትዮጵያውያን በተደረገለት ትብብር ወደ አሜሪካ ማቅናቱ ይታወሳል።

ዓለም አቀፉ የኦሎምፒክ ኮሚቴ በወቅቱ አትሌት ፈይሳ በውድድሩ መጨረሻ ላይ እጁን ማጣመሩን ተከትሎ ሜዳሊያው ይሰረዝበት አይሰርዝበት፣ ቅጣት ይቀጣ አይቀጣ በሚለው ጉዳይ ላይ መክሮ ባለፈው ዓመት ኦገስት (እ.ኤ.አ. 2016) መጨረሻ ላይ ሜዳሊያውን እንዳጸደቀለት ማስታወቁ ይታወሳል።

ፈይሳ አሁን በሚኖርበት አገረ አሜሪካ የጥገኝነት ጥያቄ ያላቀረበ ሲሆን፣ በቅርቡ ኢትዮጵያን ወክሎ እንደሚሮጥ ተናግሯል። "ኢትዮጵያ በቅርቡ ከህወሓት አገዛዝ ነጻ ትሆናለች" ሲልም ተደምጧል።

አዲስ ቪዲዮ

ዜና እና ፖለቲካ

ኪነ-ጥበብ

ቪዲዮ

መጻሕፍት

ስለእኛ

ይከተሉን!