Theresa May
የእንግሊዝ ጠቅላይ ሚኒስትር ወ/ሮ ቴሬሳ ሜይ (ፎቶ AP)

ኢዛ (ኀሙስ የካቲት ፲፮ ቀን ፳፻፱ ዓ.ም. Feb. 23, 2017)፦ የእንግሊዝ መንግሥት ለኢትዮጵያ መንግሥት፣ በተለይም ለፖሊስ፣ ለመከላከያ፣ ለፍትሕ ሚኒስቴር እና ለዲፕሎማቲ አባላት እየሰጠችው ያለውና አንድ ቢሊዮን ፓውንድ ወጪ ያደረገችበት በድኅንነትና ማኔጅመንት የከፍተኛ ዲግሪ ሥልጠና ከፍተኛ ተቃውሞ የገጠመው ሲሆን፣ ጉዳዩ እያወዛገበ ይገኛል።

በዚህ ጉዳይ ላይ የመረጃ ነጻነት ዓለምአቀፍ የሰብዓዊ መብት ድርጅት (ሪፕሬፍ) ያወጣው ሪፖርት እንደሚያሳየው ከሆነ፤ በብሪታኒያ ዓለምአቀፍ እርዳታ ጽሕፈት ቤት እርዳታ ኢትዮጵያ ፖሊስ፣ ወታደር፣ የፍትሕ ሚኒስቴር እና የዲፕሎማት እጩዎች በደህንነት እና ማኔጅመንት የከፍተኛ ዲግሪ ሥልጠና እየወሰዱ ነው።

የውጭ ጉዳይ ቢሮ 500 ሺህ የእንግሊዝ ፓውንድ በደህንነት እና በአስተዳደር ከፍተኛ ሥልጠና ወጪ፤ ወደ 600 ሺህ የሚጠጋ ፓውንድ በእንግሊዝ መከላከያ ሚኒስቴር ባለፈው ዓመት ለተከፈተው ለኢትዮጵያ ሰላም አስከባሪ ኃይል ሥልጠና ማዕከል የተደረገ ወጪ ነው።

ከ18 ወራት በፊት ተመሳሳይ ፕሮግራም በኢትዮጵያ አለ በተባለ ስጋት እንዲሰረዝ የተደረገ ሲሆን፣ ከተወሰነ ጊዜ በኋላ ግን መልሶ፤ ”ግጭት፣ ደኅንነትና መረጋጋት” በሚል እንደገና የአንድ ቢሊዮን ፓውንድ እርዳታ ወጪ ተደርጓል።

የእንግሊዝ ግብር ከፋይ ሕዝብ ገንዘብ የሰውን ልጅ ሰብዓዊ መብት በማይከበርበት አገር ሰብዓዊ መብት ለማያከብር መንግሥት መዋሉ እጅግ አሳፋሪ መሆኑን ሪፕሬፍ ምክትል ዳይሬክተር ሐሪየት ማኮሊን ለጀርምን ድምጽ ገልጠዋል።

ዳይሪክተርዋ የእንግሊዝ መንግሥት ከኢትዮጵያ የፀጥታ ኃይል ጋር ያለው ግንኙነት እንዳሳሰባቸው ገልጠው፤ እንግሊዝ ብዙ መሥራት እንደሚጠበቅባት ጠቁመዋል። አክለውም የኢትዮጵያ መንግሥት አፋኝ ነው ሲሉ ተናግረዋል። የአቶ አንዳርጋቸው ጽጌ ከዓለምአቀፍ ኤርፖርት ተጠልፎ በኢትዮጵያ የፀጥታ ኃይል በሕገወጥ መንገድ ተጠልፎ ወደ ኢትዮጵያ እንዲሄድ መደረጉ ለዚህ አይነተኛ ማሳያ እንደሆነ ዳይሬክተርዋ ገልጠዋል።

የእንግሊዝ ዓለምአቀፍ የልማት ጽሕፈት ቤት ከአንድ ሚሊዮን የእንግሊዝ ፓዉንድ በላይ ወጭ በማድረግ ለኢትዮጵያን የሥለላ መስሪያ ቤት ኃላፊዎች ሥልጠና እንዲሰጥ ማድረጉ በተለይም በእንግሊዝ ያሉ ወገኖች ዘንድ በከፍተኝ ሁኔታ እያነጋገረ መሆኑ ታውቋል።

"ዴይሊ ሜል" የተባለው የእንግሊዝ ጋዜጣ የጽሕፈት ቤቱን ተግባር አሳፋሪ ሲል ወቅሷል። ዜናው ይፋ የተደረገው 53 የእንግሊዝ ምክር ቤት አባላት፣ የእንግሊዝ ውጭ ጉዳይ ሚኒስቴር፣ ኢትዮጵያ ውስጥ በእስር ላይ የሚገኙትን ትውልደ ኢትዮጵያዊውን አቶ አንዳርጋቸው ጽጌን እንዲያስፈታ ጥያቄ ባቀረቡበት ወቅት ነው። የእንግሊዝ የውጭ ጉዳይ ሚኒስቴር ቃል አቀባይ ለኢትዮጵያ የተሰጠው ድጎማ ለሰላም አስከባሪ ኃይሎች እገዛ የሚውል ነው በማለት ማስተባበላቸው ተዘግቧል።

አዲስ ቪዲዮ

ዜና እና ፖለቲካ

ኪነ-ጥበብ

ቪዲዮ

መጻሕፍት

ስለእኛ

ይከተሉን!