UDJ certificate
 

Ethiopia Zare (ዓርብ ነኀሴ 16 ቀን 2000 ዓ.ም. August 22, 2008)፦ ለወራት የፓርቲ ፈቃድ ለማግኘት ሲጠባበቅ የነበረው አንድነት ለዲሞክራሲና ለፍትህ ፓርቲ ዛሬ ከምርጫ ቦርድ ፈቃዱን በእጁ ያስገባ መሆኑን የአዲስ አበባ ምንጮቻችን አስታወቁ። (ከላይ የሚመለከቱት ለአንድነት ፓርቲ ከምርጫ ቦርድ የተሰጠው ሕጋዊ የምስክር ወረቀት ነው፤ የምስክር ወረቀቱን አሳድገው ለማየት ከፈለጉ እላዩ ላይ ይጫኑት!) 

 

አንድነት ፓርቲ በተለያዩ ጥቃቅን ምክንያቶች በምርጫ ቦርድ ጽሕፈት ቤትና በቦርዱ ሲቀርቡለትና ሲያስተካክል የነበረ ሲሆን፣ ዛሬ በአስተማማኝ ሁኔታ ፈቃዱን በእጁ አስገብቷል።

 

የምስክር ወረቀቱን የሰጠው በብሔራዊ የምርጫ ቦርድ የፖለቲካ ፓርቲዎች ምዝገባ ጽሕፈት ቤት ነው። በዚሁ የምስክር ወረቀቱ ላይ የሚከተለው ሠፍሯል።

 

”ስለፓለቲካ ፓርቲዎች ምዝገባ በወጣው አዋጅ ቁጥር 46/1985 (እንደተሻሻለ) ለብሔራዊ የምርጫ ቦርድ በተሰጠው ሥልጣን መሠረት ይህ የሀገር አቀፍ የፖለቲካ ፓርቲ የምዝገባና የሕጋዊ ሰውነት ማረጋገጫ የምስክር ወረቀት ለአንድነት ለዲሞክራና ለፍትህ (አንድነት) ዛሬ ነኀሴ አስራ ስድስት ቀን ሁለት ሺህ ዓ.ም. ተሰጥቶታል”

 

በዚህም መሠረት ”አንድነት ለዲሞክራሲና ለፍትሕ” እንዲሁም ”አንድነት” የሚለውን ስም ካለምንም ተቃውሞ ማግኘቱ ተረጋግጧል።

 

ከዚህ በፊት የፓርቲው መሥራቾች ረቡዕ ሐምሌ 2 ቀን 2000 ዓ.ም. የፈቃድ መጠየቂያ ማመልከቻ ካስገቡ በኋላ ኀሙስ ሐምሌ 10 ቀን የፓርቲውን መጠሪያ ስም ጨምሮ በ10 ነጥቦች ላይ ማሻሻያ አድርገው ቦርዱ ከማየቱ በፊት እንዲያቀርቡ የምርጫ ቦርድ ጽሕፈት ቤት ጠይቆ እንደነበር መዘገባች አይዘነጋም። በዚሁ መሠረት ኀሙስ ሐምሌ 17 ቀን 2000 ዓ.ም. ማስተካከያዎቹን አሟልተው ማቅረባቸው አይዘነጋም።

 

ቦርዱ ዓርብ ነኀሴ 2 ቀን 2000 ዓ.ም. ተሰብስቦ ተሻሽሎ የገባውን ማመልከቻ አይቶ ምላሽ ሰጥቶበታል። ይህንኑ ምላሽ በማግስቱ ቅዳሜ ”ለአንድነት ለዲሞክራሲና ለፍትህ (አንድነት) ፓርቲ” በሚል በተፃፈ ደብዳቤ ላይ ጥቂት ማስተካከያዎችን እንዲያደርጉ ጠይቋቸዋል።

 

ማሻሻያ እንዲደረግባቸው ከተጠቀሱት ውስጥ ”ፓርቲው የራሱ ባንዲራ እንዲኖረው” የሚል ይገኝበታል። ጽ/ቤቱ ሐምሌ 10 ቀን እንዲያሟሉ ከጠየቃቸው 10 ነጥቦች ውስጥ የባንዲራው ጉዳይ ይገኝበት ነበር። የአንድነት ፓርቲ መሥራቾች ሐምሌ 17 ቀን ባስገቡት ማስተካከያ ላይ ስለባንዲራው ምላሽ ሲሰጡ ”አዋጁ አያስገድድም” ብለው ነበር። ቦርዱ ግን ባንዲራችሁን ግዴታ አምጡ የሚል ምላሽ ሰጥቷቸው እንደነበር አይዘነጋም።

 

ስሙን በተመለከተ ምንም አይነት ተቃውሞ ከቦርዱ ያልቀረበባቸው ሲሆን፣ ቦርዱም ደብዳቤውን ሲጽፍ ”ለአንድነት ለዲሞክራሲና ለፍትህ (አንድነት) ፓርቲ” በማለቱ ስሙ ተቀባይነት እንዳገኘ ታምኖ እንደነበር መዘገባችን አይዘነጋም።

 

ከፓርቲውን ዓርማና ባንዲራ በተጨማሪ የገንዘብ ምንጩን በግልፅ እንዲያስቀምጥና መሥራች አባላት ከስምና ፊርማ ጋር በተያያዘ፣ በሰነዱ ላይ ያሉትን ችግሮች አስተካክሎ እንዲያቀርብ በታዘዘው መሠረት አንድነት ፓርቲ ምላሽ በመስጠትና ሰነዶችን በማሟላት ለቦርዱ ምላሽ መስጠቱንና ከቦርዱ የሚሰጠውን ዝርዝር መግለጫ/ምላሽ በመጠባበቅ ላይ እንደሆነ የፓርቲው ሊቀመንበር ወ/ት ብርቱካን ሚደቅሳ ማስረዳታቸውን ባለፈው ሰኞ መዘገባችን አይዘነጋም። 

 

አዲስ ቪዲዮ

ዜና እና ፖለቲካ

ኪነ-ጥበብ

ቪዲዮ

መጻሕፍት

ስለእኛ

ይከተሉን!