121th Adwa Victory Day Anniversary in Dallas Texas
121ኛው የአድዋ ድል መታሰቢያ በዓል በዳላስ ቴክሳስ፣ መጋቢት ፱ ቀን ፳፻፱ ዓ.ም.

የመላው ጥቁር ኩራት የሆነውን የአድዋ ድል 121ኛውን መታሰቢያ በዓል በርካታ ኢትዮጵያውያን በተገኙበት በዳላስ ቴክሳስ በደማቅ ሁኔታ ተከብሯል። የአድዋ ድል መታሰቢያ በዓሉን ያዘጋጀው በዳላስና ፎርትወርዝ የኢትዮጵያውያን ጉዳዮች የውይይት መድረክ ሲሆን፣ ዘንድሮ ሲያዘጋጅ ለሦስተኛ ጊዜ ነው።

ስብሰባው በዳላስ ቴክሳስ የሰዓት አቆጣጠር 4 ሰዓት የተጀመረ ሲሆን፣ ተጀምሮ እስኪያልቅ ድረስ ኢትዮጵያዊነት ወኔ የተሞላበትና ድል ድል የሚሸት ነበር። የዝግጅቱ መድረክ መሪ አቶ መንግሥቱ ሙሴ ስብሰባውን በቅርቡ ኢትዮጵያ ውስጥ ኮልፌ ቀራንዮ በተለምዶ ቆሼ ተብሎ በሚጠራው አካባቢ በወገኖቻችን ላይ በደረሰው እልቂት ህይወታቸው ያጡትንና የተጎዱትን እንዲሁም አጥንታቸው ከስክሰውና ደማቸውን አፍሰው ለአድዋ ድል ላበቁን ጀግኖች አባቶቻችንና እናቶቻችንን በማሰብ አስጀምረውታል። በመቀጠልም በዓሉ አዘጋጅ የሆነውን በዳላስና ፎርትወርዝ የኢትዮጵያውያን ጉዳዮች የውይይት መድረክ ሰብሰቢ አቶ ኃይሌ በመጋበዝ የእንኳን አደረሳችሁና እንኳን ደህና መጣችሁ መልዕክት አስተላልፈው የማኅበሩን ተግባራት አብራርተዋል።

በዳላስ የኢትዮጵያ ኮሚኒቲ የጋራ መረዳጃ ማኅበር የቦርድ ተወካይ የሆኑት አቶ ሙሉጌታ ቦርዱን ወክለው ንግግር ያደረጉ ሲሆን፤ ይህን ትልቅ በዓል ያዘጋጀውን የውይይት መድረክ አመስግነው፣ ከቅርብ ጊዜ ወዲህ የአድዋ ድል መታሰቢያ በዓል በኢትዮጵያውያን ዘንድ ትኩረት እየተሰጠው መምጣቱ እንዳስደሰታቸው ገልፀዋል። በመቀጠልም ወ/ሮ ራሔል እና ልጆቿ (ናሆም እና መቅደስ) "የአድዋ ድል" የተሰኘ ግጥም አቅርበዋል።

በዝግጅቱ መካከል ላይ ተጨማሪ ንግግሮችና ድል ድል የሚሸቱ አገራዊ ዘፈኖች የቀረቡ ሲሆን፣ የዝግጅቱ እንግዳ ሆነው የተጋበዙት ዶ/ር መስፍን ገናናው እና ፕ/ር ኃይሌ ላሬቦ የአድዋ ድል የተመለከተ ሰፊ የሆነ ትምህርታዊ ማብራሪያ ሰጥተዋል። ሁለቱም የዝግጅቱ እንግዶች ያደረጉትን ንግግር ለሁሉም ኢትዮጵያዊ ትምህርት ሰጪ በመሆናቸው በቅርቡ ለሁሉም እንዲደርስ እናደርጋለን። (የፕ/ር ኃይሌ ላሬቦን ንግግር ከዚህ ጽሑፍ በስተመጨረሻ ላይ ሊመለከቱት ይችላሉ)

ሌላው የፕ/ር ኃይሌ ላሬቦ ባለቤት ወ/ሮ እስከዳር አውላቸው፣ ባለቤታቸው ለአገራቸው ያላቸውን ፍቅር፣ የሚያደርጉት ትግል አድንቀው፤ ለቤታቸውም ፍቅር የሆኑ ጥሩ አባወራ መሆናቸውን ገልፀዋል። በቅርቡ በኢሳትና ዶቼቬሌ ራዲዮ ጣቢያ በሰጡት ቃለመጠይቅ ያልተደሰቱ ግለሰቦችና ቡድኖች ግን፤ ኢትዮጵያዊ ጨዋነት በጎደለው መልኩ በቤተሰባቸው ላይ ከፍተኛ ዛቻ ከማቅረባቸውም በላይ፣ ባለቤታቸው ከሥራ እንዲባረሩ ለማድረግ እንቅስቃሴ ሲያደርጉ እንደነበር ያስረዱ ሲሆን፤ ፕ/ር ኃይሌ ላሬቦ ላይ የሚደርሰው በደል የኛም በደል ነው በማለት ከጎናቸው ለቆሙት ሁሉም ምስጋናቸውን አቅርበዋል።

በመጨረሻም ዝግጅቱን በተመለከተ የተዘጋጀውን ኬክ የዕለቱ እንግዶች በአንድ ላይ ቆርሰው የፕሮግራሙ ፍፃሜ ሆኗል። (የፕ/ር ኃይሌ ላሬቦን ንግግር ለመመልከት የማጫወቻ ቁልፉን ይጫኑ!)

አዲስ ቪዲዮ

ዜና እና ፖለቲካ

ኪነ-ጥበብ

ቪዲዮ

መጻሕፍት

ስለእኛ

ይከተሉን!