An Ethiopian worker argues with a member of the Saudi security forces.
በደቡብ ሪያድ ኢትዮጵያዊ ሠራተኛ ከሳውዲ ጥበቃ ኃይሎች ጋር ሲከራከር፣ ኖቨምበር ፲፩፣ ፳፻፲፫ እ.ኤ.አ. (ፎቶ፣ REUTERS/Faisal Al Nasser)

ኢዛ (ኀሙስ ግንቦት ፲፯ ቀን ፳፻፱ ዓ.ም. May 25, 2017)፦ ሳውዲ ዐረቢያ ሕጋዊ የመኖሪያ እና የሥራ ፍቃድ ሳይኖራቸው በአገሪቱ የሚገኙ ኢትዮጵያውያንን ልታባርር ያወጣችውን አዲስ አዋጅ ተከትሎ የኢትዮጵያ ለ30 ሺህዎቹ ጊዜያዊ የመጓጓዣ ወረቀት (ሊሴ ፓሴ) ሰጠ። ከሳውዲ የሚባረሩት ኢትዮጵያውያን ቁጥር 300 ሺህ ነው። ወደ ሳውዲ ያቀኑት የውጭ ጉዳይ ሚንስትር ዶ/ር ወርቅነህ ገበየሁ የሳውዲ ባለሥልጣናትን በጉዳዩ ላይ ዛሬ ያነጋግራሉ።

የሳውዲ ዐረቢያ መንግሥት ካለፈው መጋቢት 21 እስከ መጭው ሰኔ 20 ቀን 2009 ዓ.ም. ድረስ በአገሪቱ ያሉ የመኖሪያ እና የስራ ፍቃድ የሌላቸው የውጭ ሀገራት ዜጎች ለቀው እንዲወጡ የዘጠና ቀናት የምህረት አዋጅ ማወጁ ይታወሳል። በተሰጠው የጊዜ ገደብ አገሪቱን ለቀው ለሚወጡት ስደተኞች ምህረት እንደሚያደርግና ወደ አገሪቱ ተመልሰው በሕጋዊ መንገድ የመግባት ዕድል እንዳላቸው የሳውዲ መንግሥት ገልጧል።

አዋጁ አንድ ሚሊዮን የሚጠጉ የተለያዩ አገራት ዜጎችን ከአገሪቱ የሚያባርር ሲሆን፣ ከእነዚህም ውስጥ ከሦስት መቶ ሺህ በላይ የሚሆኑት ኢትዮጵያውያኖች እንደሆኑ ዓለም አቀፉ የስደተኞች መብት ተቋም የተገኘው መረጃ ጠቁሟል።

ናይጄሪያን ጨምሮ የሌሎች አፍሪካን እስያ አገራት የመውጫ ጊዜው ገደብ ሳያልቅ ከአገሪቱ በብዛት እየወጡ የሚገኙ ቢሆንም፤ አገሪቱን ለቀው እየወጡ ያሉት ኢትዮጵያውያን ቁጥር ግን እጅግ ዝቅተኛ እንደሆነ ታውቋል። የተለያዩ ዓለም አቀፉ የስደተኞች ጅርጅትን ጨምሮ መንግሥታዊ ያልሆኑ ድርጅቶች አገሪቱን ለቀው ለሚወጡ ኢትዮጵያውን ድጋፋቸውን ለመለገስ ዝግጁ ቢሆኑም፤ የኢትዮጵያ መንግሥት እና ባለሥልጣናት ግን የሚጠበቅባቸውን ኃላፊነት እየተወጡ እንዳልሆነ ተደምጧል።

በኢትዮጵያ የውጭ ጉዳይ ሚኒስትር በዶ/ር ወርቅነህ ገበየሁ የሚመራ የልዑካን ቡድን ወደ ሳውዱ ዐረቢያ ያመራ ሲሆን፣ ሚኒስትሩ ዛሬ ማምሻውን ከሳውዲ ዐረቢያ የውጭ ጉዳይ ሚኒስቴር ባለሥልጣናት ጋር በኢትዮጵያውያን ስደተኞች ጉዳይ ላይ እንደሚነጋገሩ ታውቋል።

አዲስ ቪዲዮ

ዜና እና ፖለቲካ

ኪነ-ጥበብ

ቪዲዮ

መጻሕፍት

ስለእኛ

ይከተሉን!