Tesfay Sahlu
“ደህና ናችሁ ልጆች የዛሬ አበባዎች የነገ ፍሬዎች እንደምን አላችሁ ልጆች” በሚለው አባባላቸው በበርካቶች ዘንድ የሚታወሱትና የማይረሱት አባባ ተስፋዬ (አርቲስት ተስፋዬ ሳህሉ)

ኢዛ (ማክሰኞ ሐምሌ ፳፭ ቀን ፳፻፱ ዓ.ም. August 1, 2017)፦ “ደህና ናችሁ ልጆች የዛሬ አበባዎች የነገ ፍሬዎች እንደምን አላችሁ ልጆች” በሚለው አባባላቸው በበርካቶች ዘንድ የሚታወሱትና የማይረሱት አባባ ተስፋዬ (አርቲስት ተስፋዬ ሳህሉ) ትናንት ሐምሌ ፳፬ ቀን ፳፻፱ ዓ.ም. (July 31, 2017) ከሰዓት በኋላ በመኖሪያ ቤታቸው በዘጠና አራት ዓመታቸው ከዚህ ዓለም በሞት ተለዩ።

አርቲስት ተስፋዬ ሳህሉ ”አባባ ተስፋዬ” የሚለውን መጠሪያ ያገኙት፣ በኢትዮጵያ ቴሌቭዥን ድርጅት ውስጥ ”የልጆች ጊዜ” በተሰኘው ፕሮግራም ላይ ተረቶችን በማውራትና ለልጆች አባታዊ ምክር ሲለግሱ መሆኑ ይታወሳል። በዚህም ሥራቸው በብዙዎች ዘንድ እጅግ ተወዳጅ ነበሩ።

አባባ ተስፋዬ ከአባታቸው ኤጀርሳ በዳኔ እና ከእናታቸው ዮንዢወርቅ በለጤ የተወለዱት ሰኔ ፳፣ ፲፱፻፲፮ ዓ.ም. በቀድሞው ባሌ ክፍለአገር ልዩ ስሙ ከዶ በተባለ ስፍራ እንደሆነ ታሪካቸው ይናገራል።

በአምስት ዓመታቸው ከአባታቸው ጋር ወደ ጎባ ተጉዘው የቄስ ትምህርት ቤት ገብተው ነበር ትምህርታቸውን የጀመሩት። ወላጆቻቸው ለስራ በተለያዩ የአገሪቷ ክፍሎች ይዘዋወሩ ስለነበር፤ አባባ ተስፋዬም እንዲሁ አብረዋቸው በመሆን በጊኒር እንዲሁም በሐረር የኖሩ ሲሆን፣ በሐረር የፈረንሳዮች ትምህርት ቤትም ተምረዋል።

አዲስ አበባ በአስራ አራት ዓመታቸው በመሄድ በኮከበ ፅባህ ትምህርት ቤት ትምህርታቸውን የተከታተሉ ሲሆን፣ ለመጀመሪያ ጊዜ በተዋናይነት የተቀጠሩት በአዲስ አበባ ባህልና ቲያትር አዳራሽ (መዘጋጃ ቤት) እንደሆነ በታሪክ ማኅደራቸው ተመዝግቦ ይገኛል። በወቅቱ የሴት ተዋንያን ያልነበሩ በመኾኑ አርቲስቱ የሴት ገጸ ባህሪያትን ተላብሰው ይጫወቱ ነበር።

አርቲስቱ ከተዋናይነት ባሻገር ድምጻዊ፣ የሙዚቃ መሳሪያ ተጫዋች፣ የውዝዋዜ አሰልጣኝ፣ ደራሲ፣ የመድረክ መሪ እንደነበሩ ይታወሳል።

በድምጻዊነት ከሚታወቁባቸው ዘፈኖች ውስጥ ”ዓለም እንደምን ነሽ? ደህና ሰነበትሽ ወይ” እና ”ፀሐይ” የሚሉት ይጠቀሳሉ። አባባ ተስፋዬ፤ ክራር፣ መስንቆ፣ በገና፣ ትራምፔትና አኮርዲዮን የተባሉትን የሙዚቃ መሳሪዎች በመጫወት ይታወቃሉ።

አባባ ተስፋዬ ከአዲስ አበባ ባህልና ቲያትር አዳራሽ በኋላም በብሔራዊ ቲያትር ያገለገሉ ሲሆን፤ ከተወኑባቸው ተውኔቶች ውስጥ ደግሞ የሚከተሉት ይገኙበታል፤ ”ሀ ሁ በስድስት ወር”፣ ”አሉላ አባ ነጋ”፣ ”ኦቴሎ”፣ ”ኤዲፐስ ንጉሥ”፣ ”ዳዊትና ኦርዮን”፣ ”አስቀያሚዋ ልጃገረድ እና ሥነ ስቅለት”።

አባባ ተስፋዬ የልጆች መጻሕፍትን የጻፉ ከመሆናቸውም ባሻገር፤ ብጥልህሳ፣ ነው ለካ እና ጠላ ሻጯ የተሰኙ ተውኔቶችን ደርሰዋል።

አባባ ተስፋዬ ከባለቤታችወ ከወ/ሮ ደብሪቱ አይታገድ ጋር አንድ ልጅ ያላቸው ሲኖራቸው፣ አምስት የልጅ ልጆችን አይተዋል።

ዩኒቲ ዩኒቨርሲቲ ባለፈው ሳምንት መጨረሻ ላይ በኪነጥበብ ዘርፍ አባባ ተስፋዬ ያበረከቱትን አስተዋጽኦ በማክበር የክብር ዶክትሬት ማዕረግ እንደሰጣቸው ታውቋል።

የኢትዮጵያ ዛሬ ዝግጅት ክፍል፣ ለአባባ ተስፋዬ ዘመዶች፣ ወዳጆች እንዲሁም ለመላው አፍቃሪዎቻቸውና የኢትዮጵያ ሕዝብ መጽናናትን ይመኛል።

አዲስ ቪዲዮ

ዜና እና ፖለቲካ

ኪነ-ጥበብ

ቪዲዮ

መጻሕፍት

ስለእኛ

ይከተሉን!