Ethiopia Zare (ሰኞ ነኀሴ 19 ቀን 2000 ዓ.ም. August 25, 2008)፦ በአዲስ አበባ ከተማ ሊዝ ጽ/ቤት መምሪያ ኃላፊ የሆኑት አቶ ትንሣዔ ደነቀ፣ የቦሌ ክፍለ ከተማ መሬት ልማትና አስተዳደር መምሪያ ቡድን መሪ የሆኑት አቶ ዳንኤል ስዩም እና በቦሌ ክፍለ ከተማ መሐንዲስ የሆኑት ወ/ሮ ማኅሌት አምሳሉ ከሕጋዊ ገቢያቸው ውጭ ከ3 ነጥብ 7 ሚሊዮን ብር በላይ በግል የባንክ አካውንታቸው ውስጥ ተገኝቷል በሚል ታሰሩ።

 

እነዚህ ግለሰቦች የግል አካውንታቸው ውስጥ ከሕጋዊ ገቢያቸው ጋር ተመጣጣኝ ይልሆነ ከፍተኛ ገንዘብ ማካበታቸውንና በእያንዳንዳቸው ስም የመኖሪት ቤት እና የቤት አውቶሞቢል አላቸው በሚል የፌዴራሉ የሥነምግባርና የፀረ-ሙስና ኮሚሽን ባለፈው ኀሙስ ነኀሴ 15 ቀን 2000 ዓ.ም. ፍርድ ቤት ቀርቦ የምርመራ ጊዜ እንዲሰጠው ጠይቋል።

 

የአዲስ አበባ ከተማ ሊዝ ጽ/ቤት መምሪያ ኃላፊ የሆኑት አቶ ትንሣኤ ደነቀ በስማቸው በተመዘገቡ ሦስት የባንክ ቁጥሮች ውስጥ 2,643,866.91 ብር (ሁለት ሚሊዮን፣ ስድስት መቶ አርባ ሦስት ሺህ፣ ስምንት መቶ ስድሳ ስድስት ብር ከዘጠና አንድ ሣንቲም) ተንቀሳቅሷል፤ አንድ የቤት አውቶሞቢልና መኖሪያ ቤትም ተመዝግቦ እንደሚገኝ የፌዴራሉ የሥነ ምግባርና የፀረ-ሙስና ኮሚሽን የምርመራ መዝገብ እንደሚገልጽ ታውቋል።

 

በቦሌ ክፍል ከተማ መሬት ልማትና አስተዳደር መምሪያ ቡድን መሪ የሆኑትና ሁለተኛው ተከሳሽ አቶ ዳንኤል ስዩም፣ ከሕጋዊ ገቢያቸው በላይ በስማቸው ተመዝግበው በሚገኙ አራት የባንክ ሂሣብ ቁጥሮች፣ 390,840.84 ብር (ሦስት መቶ ዘጠና ሺ፣ ስምንት መቶ አርባ ብር፣ ከሰማንያ አራት ሣንቲም) ገንዘብ አንቀሳቅሰዋል፣ አንድ የቤት አውቶሞቢል ባለቤትም ናቸው ተብሏል።

 

በቦሌ ክፍለ ከተማ መሬት ልማትና አስተዳደር መሐንዲስ የሆኑት ሦስተኛዋ ተከሳሽ ወ/ሮ ማኅሌት አምሳሉ የተባሉ ግለሰብ፣ እሳቸውም በሦስት የተለያዩ የባንክ ሂሳባቸው 732,826.91 ብር (ሰባት መቶ ሠላሳ ሁለት ሺህ፣ ስምንት መቶ ሃያ ስድስት ብር ከዘጠና አንድ ሣንቲም) አንቀሳቅሰዋል፣ የአንድ የቤት አውቶሞቢልና የመኖሪያ ቤት ባለቤት ናቸው ሲል አመልክቷል።

 

የፀረ-ሙስን ኮሚሽን ባቀረበው የጊዜ ቀጠሮ መዝገብ ላይ ተጠርጣሪዎቹ ከሕጋዊ ገቢያቸው በላይ ገንዘብ ያካበቱ በመሆኑ ንብረታቸው ታግዶ፣ በጉዳዩ ላይ ምርመራ ለማድረግ እንዲፈቀድለት ጠይቋል።

 

አዲስ ቪዲዮ

ዜና እና ፖለቲካ

ኪነ-ጥበብ

ቪዲዮ

መጻሕፍት

ስለእኛ

ይከተሉን!