Solomon Deressa

ደራሲ፣ ገጣሚ፣ የፍልስፍና ምሁርና ተመራማሪ የነበረው ሰለሞን ዴሬሳ

ሰለሞን ዓለም ካፈራቻቸው ደራሲያን እኩል ነው! ከነሼክስፒር፣ ከነቫይነር ጭምርደራሲ ስብሃት ገ/እግዚአብሔር
ሰለሞን ቦታውን የማይለውጥ የሰሜን ኮከብ ነበርአምባሳደር ብርሃኑ ዴሬሳ (ወንድም)
ሰለሞንን የደረሰብኝን ችግር አማክሬው፤ ችግሩን በሌላ አቅጣጫ እንድመለከተው አድርጐ ፈውሶኛልማርክ ፖል ደራሲና የማርሻል አርት ባለሙያ (የሰለሞን የቀድሞ ተማሪ)
የኔን ንጹሕ ኦሮሞነት የሚያውቁት ሴት አያቴ ብቻ ናቸውሰለሞን ዴሬሳ

ኢዛ (እሁድ ጥቅምት ፳፮ ቀን ፳፻፲ ዓ.ም. November 5, 2017)፦ ደራሲ፣ ገጣሚ፣ የፍልስፍና ምሁርና ተመራማሪ የነበረው ሰለሞን ዴሬሳ፤ አሜሪካ በሚኒሶታ ግዛት ሚኒያፖሊስ በሚገኘው መኖሪያ ቤቱ ጥቅምት ፳፫ ቀን ፳፻፲ ዓ.ም. (Nov, 2, 2017) ከዚህ ዓለም በሞት ተለይቷል።

ሰለሞን ዴሬሳ በ፲፱፻፴ ዓ.ም. (1930) በወለጋ ጠቅላይ ግዛት ጩታ በተባለው ቦታ ከእናቱ ከወ/ሮ የሺእመቤት ዴሬሳና ከአባቱ ከአቶ ዳንኪ ሊንጊ የተወለደ ሲሆን፣ የአባት መጠሪያ ስሙን የወረሰው ከእናቱ አባት (የወንድ አያቱ) ከብላታ ዴሬሳ ነው።

ሰለሞን ከወለጋ ገና በአራት ዓመት ዕድሜው ወደ አዲስ አበባ በመሄድ ያደገው፤ በስድስት ኪሎና በአራት ኪሎ ”ቢስ ቤት” በሚባለው ቦታና በኋላም በጉለሌ ነበር።

አዲስ አበባ ውስጥ በሚገኙ ልዩ ልዩ ትምህርት ቤቶች እየተዘዋወረ የተማረው ሰለሞን፣ በትምህርቱ ሰነፍ ነው የሚባል ሲሆን፣ ዩኒቨርሲቲ ኮሌጅ የገባው ግን በአስራ ስድስት (፲፮) ዓመቱ ነበር። በዩኒቨርሲቲ ኮሌጅ ቆይታውም ቤተመጻሕፍቱን በወጉ ከተጠቀሙበት ተማሪዎች መሃል በዋንኛነት የሚጠቀስ ነበር። በትምህርቱ ዝቅተኛ ውጤት ያመጣ ቢሆንም፤ በስተመጨረሻ ባልተጠበቀ ሁኔታ ራሱን አሻሽሎ ጐበዝ ከሚባሉት ተማሪዎች ፊት ለመሰለፍ ችሏል።

ዩኒቨርሲቲ ኮሌጅ ውስጥ የሚታተም መጽሔት ዋና አዘጋጅና ፀሐፊም ሆኖ ከቆየ በኋላ፣ በመካከሉ ትምህርቱን አቋርጦ በኢትዮጵያ ራዲዮ የእንግሊዝኛ ዜና አንባቢ ሆኖ ተቆጥሮ ሠርቷል።

በኋላማ ወደ ፈረንሳይ አገር ትምህርቱን እንዲከታተል የተላከ ሲሆን፣ መደበኛ ትምህርቱን ከመማር ይልቅ ይበልጥ ጊዜውን ያሳለፈው በማንበብና በጊዜው ከነበሩት የፈረንሳይ ስመ ጥር ደራሲያን፣ ገጣሚያንና ሰዓሊያን ጋር ነበር። በዚህም ምክንያት ብዙዎቹን የፈረንሳይ የጥበብ ሰዎች በመጠጋት እውቀቱን ለማዳበር ችሏል። ከፈረንሳይ አገር ወደ አሜሪካን በማቅናት ትምህርቱን አሻሽሏል።

ወደ ኢትዮጵያም በመመለስ በኢትዮጵያ ራዲዮ ተቀጥሮ በፕሮግራም አዘጋጅነት፣ እንዲሁም በቴሌቭዥንና ራዲዮ ምክትል ዋና ሥራ አስኪያጅነት ደረጃ ድረስ የደረሰ ሠራተኛ ለመሆን የቻለ ነበር።

ከዚህ በኋላ እንደገና ወደ አሜሪካን አገር በ፲፱፻፷፭ (1965) ዓ.ም. ተመልሶ በመሄድ ትምህርቱን ተከታትሎ ጫፉ በመድረስ በዩኒቨርሲቲ ውስጥ ለረዥም ዓመታት የፍልስፍና ትምህርት እንዲሁም መፍትሔ በመፈለግ ሙያ ላይ ከፍተኛ አማካሪና አስተማሪ በመሆን ሠርቷል። ከዚህም በተጨማሪ የሃይማኖት ንጽጽርን በተመለከተ ሲያስተምር ቆይቷል።

ሰለሞን ልጅነት፣ እንዲሁም ዘመን እልፈቱ (ውለሎታት) የተባሉ ሁለት መጻሕፍት ጽፎ ለንባብ አብቅቶ፤ ዘመን በማይሽራቸው ግጥሞቹ ተደናቂነት ተጐናጽፏል።

ሰለሞን ዴሬሳ የአንዲት ሴት ልጅ አባት ሲሆን፣ በሕይወት በኖረበት ዘመን የልጅ ልጆችም ለማየት ችሏል። ሰለሞን ከዚህ ዓለም ከመለየቱ በፊት፤ ሕይወቱ ስታልፍ አስከሬኑ እንዲቃጠል በጠየቀው መሰረት፤ አስከሬኑ እንደሚቃጠል ታውቋል።

Solomon Deressa
ደራሲ፣ ገጣሚ፣ የፍልስፍና ምሁርና ተመራማሪ የነበረው ሰለሞን ዴሬሳ

እግዚአብሔር ነፍሱን በገነት ያኑራት!

አዲስ ቪዲዮ

ዜና እና ፖለቲካ

ኪነ-ጥበብ

ቪዲዮ

መጻሕፍት

ስለእኛ

ይከተሉን!