Dr. Tekeda Alemu

ዶ/ር ተቀዳ ዓለሙ

(ኢዛ) በኒው ዮርክ የተባበሩት መንግሥታት ድርጅት የኢትዮጵያ ቋሚ ተጠሪ ሆነው ሲያገለግሉ የነበሩት ዶክተር ተቀዳ ዓለሙ ከሥልጣናቸው ተነሱ። በምትካቸው አምባሳደር ታዬ አጽቀሥላሴ ተሹመዋል።

ዶ/ር ተቀዳ ትምህርታቸውን ከአሜሪካ ጨርሰው እንደመጡ በአዲስ አበባ ዩኒቨርሲቲ የፖለቲካ ሳይንስ ዲፓርትመንት የዓለም አቀፍ መምሪያ መምህር (ሌክቸረር) ሆነው ያገለገሉ ሲሆን፣ እዛው እየሠሩ በግማሽ የሥራ ግዜአቸው በውጪ ጉዳይ ሚኒስቴር መሥሪያ ቤት በምርምርና እቅድ መምሪያ ውስጥ ሠርትርዋል። ከዛም በዚሁ መሥሪያ ቤት በቋሚ ሠራተኛነት ተቀጥረው የመምሪያው አንደኛ ፀሐፊ በመሆን አገልግለዋል።

የደርግ መንግሥት ወድቆ አገሪቱን የኢሕአዴግ መንግሥት ሲቆጣተጠር፤ በዛው በውጭ ጉዳይ መሥሪያ ቤት ምክትል ሚኒስትር፣ በኋላም በሚኒስትር ዴኤታ ማዕረግ አገልግለዋል።

የእሳቸውን ቦታ የተኩት አምባሳደር ታዬ አጽቀሥላሴ በሳይንስና ቴክኖሎጂ መሥሪያ ቤት የሠሩ ሲሆን፣ ወደ ውጪ ጉዳይ መሥሪያ ቤት ተዛውረው በአፍሪካ መምሪያ ውስጥ በአንደኛ ፀሐፊነት፣ ከዛም በስዊድን የኢትዮጵያ ኤንባሲ አማካሪነት፣ እንዲሁም በካሊፎርንያ ቆንስላ ጽሕፈት ቤት በአንባሳደርነት ደረጃ የጽሕፈት ቤቱ ኃላፊ በመሆን ሠርተዋል።

ከካልፎርንያ መልስም በዋናው መሥሪያ ቤት በሚኒስትር ዴኤታ ማዕረግ፣ በመቀጠልም በግብጽ የኢትዮጵያ አምባሳደር ሆነው አገልግለዋል።

ኢትዮጵያ የተባበሩት መንግሥታት ድርጅት ከተመሰረተ አንስቶ በድርጅቱ ውስጥ ቆሚ ተጠሪ በመመደብ የቆየች አገር ስትሆን፤ ከመሥራች አባል አገሮችም መካከል ብቸኛዋ የአፍሪካ አገር እንደሆነች ይታወቃል። በኢትዮጵያ በኩል በተባበሩት መንግሥታት ድርጅት በቆሚ ተጠሪነነት ከቀዳማዊ ኃይለሥላሴ ዘመነ መንግሥት ጀምሮ ከሠሩት መካከል፤ ቢትወደድ ዘውዴ ገ/ሕይወት፣ አቶ አዲስ አለማየሁ፣ ዶ/ር ተስፋዬ ገ/እግዚ፣ ልጅ እንዳልካቸው መኮንን፣ አምባሳደር መሐመድ ሀሚድ እና አቶ ተስፋዬ ታደሰ የሚጠቀሱ ናቸው።

የተባበሩት መንግሥታት ድርጅት በሁለተኛው የዓለም ጦርነት ማብቂያ ላይ እንደ አውሮፓውያን ዘመን አቆጣጠር 1945 ዓ.ም. የዓለም ሰላምና ደኅንነትን ለመጠበቅ ከትላልቅና ከትናንሽ መንግሥታት መካከል በሶቬት ሕብረት፣ በአሜሪካ፣ በእስያና በደቡብ አሜሪካ መሪዎች የተመሠረተ ድርጅት ሲሆን፤ በወቅቱ ኢትዮጵያ ከመሥራች አገሮች ተርታ በመሰለፍ ስምምነቱን የፈጸመች አገር ነበረች።

በኢትዮጵያ በኩል የስምምነነቱን የፈጸሙትና ፊርማቸውን ያኖሩት ፀሐፊ ትዕዛዝ አክሊሉ ኃ/ወልድ ናቸው። አክሊሉ ኃ/ወልድ ከተማሪነታቸው ጊዜ ጀምሮ በውጭ አገራት የኢትዮጵያ መንግሥት ተጠሪና ጉዳይ ፍጻሚ በመሆን ያገለገሉ ሲሆን፤ በኋላም በውጭ ጉዳይ ሚኒስቴር በምክትል ሚኒስትርነት ተሹመው አገልግለዋል። ምክትል ጠቅላይ ሚኒስትር በነበሩበት ወቅት ጽሕፈት ሚኒስትርና አገር ግዛት ሚኒስትርነትን ደርበው ሠርተዋል። በመጨረሻም በጠቅላይ ሚኒስትርነት የጃንሆይ ዘመነ መንግሥት ፍጻሜ ድረስ አገልግለዋል። ጠቅላይ ሚኒስትር አክሊሉ በደርግ መንግሥት በጅምላ በግፍ ከተገደሉት ስድሳ ባለሥልጣናት መካከል አንዱ ናቸው።

አዲስ ቪዲዮ

ዜና እና ፖለቲካ

ኪነ-ጥበብ

ቪዲዮ

መጻሕፍት

ስለእኛ

ይከተሉን!