Former Imperial Hotel, now Amoraw Building, owned by Metal and Engineering Corporation (MetEC)

የቀደሞ ኢምፔሪያል ሆቴል የአሁኑ አሞራው ህንፃ

ሜቴክ በሚቀጥለው ወር ህንፃውን ይለቃል

ኢዛ (ቅዳሜ መስከረም ፲ ቀን ፳፻፲፪ ዓ.ም. September 21, 2019):- ቀድሞ “ኢምፔሪያል ሆቴል” በሚል ይታወቅ የነበረውንና እስካሁን በብረታብረት ኢንጂነሪንግ (ሜቴክ) ይዞታ ሥር የነበረውን፣ በአሁኑ አጠራሩ “አሞራው ህንፃ”ን የገቢዎች ሚኒስቴር ሊወርሰው ነው።

የገቢዎች ሚኒስቴር ይህንን የሽያጭ ስምምነቱ አወዛጋቢ ሆኖ የቆየውን ሕንፃ የሚወርሰው በሕንፃው ሽያጭና ግዥ ላይ መንግሥት ከግብር ሊያገኝ የሚገባውን ገቢ ባለማግኘቱ፤ ይህንን ክፍያ ገቢ ለማድረግ ሕንፃውን በሕግ አግባብ ለመረከብ ነው።

ይህ የገቢዎች ሚኒስቴር እርምጃ ከሚቀጥለው ወር በኋላ ተግባራዊ እንደሚደረግ በደብዳቤ ለሜቴክ የተገለፀ ሲሆን፣ በዚሁ መሠረት ሕንፃውን እንደሚለቅና ለገቢዎች ሚኒስቴር እንደሚያስረክብም ሜቴክ አስታውቋል።

መንግሥት አክሰስ ሪልስቴት ለሜቴክ ሲሸጥ መንግሥት ሊያገኝ ይገባ የነበረውን 32 ሚሊዮን ብር የገቢዎች ክፍያ ባለመክፈሉ በሕግ አግባብ እስከነወለዱ ገቢ ለማድረግ ሕንፃውን ይረከባል ተብሏል።

ሜቴክ ከገቢዎች ሚኒስቴር የደረሰውን ትዕዛዝ ተፈጻሚ ማድረግ ግድ የሚሆንበት ሲሆን፤ ነገር ግን ለዚህ ሁኔታ ያበቁትን አካላትን በሕግ እጠይቃለሁ ብሏል።
የዚህን ሕንፃ ሽያጭ በተመለከተ በአሁኑ ጊዜ የቀድሞ የሜቴክ ከፍተኛ የሥራ ኃላፊዎችና በሽያጭ ወደ ሜቴክ እንዲተላለፍ ያደረጉት የአክሰስ ሪልስቴት መሥራች አቶ ኤርሚያስ አመልጋ በአሁኑ ወቅት በእስር ላይ እንደሆኑ ይታወቃል።

በዚሁ ጉዳይ የተሰጡ መረጃዎች እንደሚያመለክቱት አክሰስ ሪልስቴት ለሜቴክ 72 ሚሊዮን ብር ሕንፃውን መሸጡን ነው። ህንፃውን ለመሸጥ ስምምነት ተደርሶበታል ከተባለው ዋጋ ውስጥ 24 ሚሊዮን ብር ለአክሰስ መከፈሉን ነው።

የሜቴክ ተጨማሪ መረጃ እንደሚያመለክተው ደግሞ፤ እስካሁን ለዚህ ሕንፃ 108 ሚሊዮን ብር ወጪ አውጥቶበታል። ሒድቱ ይህ ነው ቢባልም ሕንፃው ከቀድሞ ባለቤቱ ወደ ሜቴክ ስም ሳይዞር ቆይቷል። የመጀመሪያው የሜቴክ ክፍያ ከተፈፀመ በኋላ ሕንፃውን ተረክቦ በቢሮነት እየተገለገለበት ቆይቷል።

በዚህ ጉዳይ ጥር 2011 ዓ.ም. ክስ የመሠረተባቸው አቶ ኤርሚያስ አመልጋ ከሜቴክ ኃላፊዎች ጋር በመመሳጠር በ2003 ዓ.ም. ሆቴሉ ከ41 - 51 ሚሊዮን ብር የሚገመት ሆኖ ሳለ፤ እርሳቸው በ72 ሚሊዮን ብር ሜቴክ እንዲገባቸው በማድረግ መንግሥት ላይ 21 ሚሊዮን ብር ኪሣራ ማድረሳቸውን የሚያመለክት እንደነበር አይዘነጋም።

እንደዛሬው በአዲስ አበባ ከተማ ባለኮከብ ሆቴል ተበራክተው በማይታዩበት ወቅት፤ በከተማዋ ውስጥ ትላልቅ ተብለው ከሚጠቀሱ የግል ሆቴሎች አንዱ እንደነበር አይዘነጋም። (ኢዛ)

አዲስ ቪዲዮ

ዜና እና ፖለቲካ

ኪነ-ጥበብ

ቪዲዮ

መጻሕፍት

ስለእኛ

ይከተሉን!