PM Dr. Abiy Ahmed, EPRDF & TPLF

ሕወሓት በአዲሱ የኢሕአዴግና አጋር ፓርቲዎቹ ውህደት ውስጥ ይኖራል ወይስ አይኖርም? ካልኖረስ ምን ይደረጋል?

ኢዛ (እሁድ መስከረም ፲፩ ቀን ፳፻፲፪ ዓ.ም. September 22, 2019):- የኢሕአዴግ አባል ድርጅቶችንና እስካሁን “አጋር” በመባል የሚታወቁ ድርጅቶችን በማካተት ይመሠረታል ተብሎ የሚጠበቀው አዲስ ውህድ ፓርቲ ይፋ ይደረጋል ተብሎ እየተጠበቀ ነው። የኢሕአዴግ አባል ድርጅቶችና አጋር የፖለቲካ ፓርቲዎች መሪዎች በዚሁ ጉዳይ ላይ በአሁኑ ወቅት እየመከሩ ስለመሆናቸው የኢትዮጵያ ዛሬ ምንጮች ይጠቁማሉ።

እንደ ምንጮች ገለፃ ኢሕአዴግ እስካሁን የሚታወቅበትን ቅርፅና ይዘት ይቀይራል ተብሎ የሚጠበቀው አዲስ አደረጃጀት በቅርቡ ይፋ ይሆናል ተብሎ እየተጠበቀ ነው። ውህደቱ ኢሕአዴግ የሚለውን ስያሜ በመቀየር ጭምር ተፈፃሚ ይሆናል እየተባለ ነው።

በቅርቡ ከሸገር 102.1 ሬዲዮ ጣቢያ ጋር ቃለምልልስ ያደረጉት ጠ/ሚ ዶ/ር አብይ አህመድ፤ በዚህ ጉዳይ ላይ ኢሕአዴግ እየተወያየ መሆኑን መግለፃቸው ይታወሳል። “በቅርቡ አቋሙን ይገልጻል ብዬ አስባለሁ” ያሉት ዶ/ር አብይ፤ “አሁን ባለው ቁመና እንደማይቀጥል ግን በእርግጠኝነት መናገር ይቻላል። አሁን ባለው ስትራክቸር አይቀጥልም” በማለት ማረጋገጫ ሰጥተዋል። ምን ይሆናል? እንዴት ይጀመራል? እንዴት ይፈጸማል? በሚለው ጉዳይ እየተወያዩ መሆኑንም ገልፀዋል።

“እንግዲህ ዴሞክራሲን በውስጥ ካልተለማመድን በውጭ ልንተገብረው ስለማንችል፤ በውይይት፣ በምክክር፣ በንግግር የምናወጣው ነው። ግን በጥቂት ጊዜ ውስጥ ውይይታችንን ቋጭተን አንድ ዜና ይዘን እንወጣለን ብለን እናስባለን” በማለትም ኢሕአዴግ እስካሁን በነበረው መንገድ መጓዝ እንደማይችል ጠቅሰዋል። “ይህ ዜና አልትሜትሊ ምን ይሆናል የሚለውን የሚወስነው ውይይት ስለሆነ፤ ቀድመው መልኩንና ቅርፁን መናገር አልችልም” ያሉት ዶ/ር አብይ፤ ነገር ግን የሆነ ለውጥ ማድረጋችን አይቀርም ብዬ ተስፋ አደርጋለሁ ማለታቸው አይዘነጋም።

የኢሕአዴግ አባል ድርጅቶች መካከል ያለው ልዩነት እንደተባለው ውህደቱን ለመፍጠር ያስችላቸዋል ወይ? የሚለው ጥያቄ ግን አሁንም አነጋጋሪ መሆኑ አልቀረም። ጠቅላይ ሚኒስትሩ ግን ውህደቱ የማይቀር ስለመሆኑ እያረጋገጡ ነው።

በብዙዎች ዘንድ ግን አነጋጋሪ እየሆነ ያለው ሕወሓት በዚህ ውህደት ውስጥ ይኖራል ወይስ አይኖርም? ካልኖረስ ምን ይደረጋል የሚለው ጥያቄ ነው። (ኢዛ)

አዲስ ቪዲዮ

ዜና እና ፖለቲካ

ኪነ-ጥበብ

ቪዲዮ

መጻሕፍት

ስለእኛ

ይከተሉን!