Ethiopia Zare (ቅዳሜ ጥር 17 ቀን 2000 ዓ.ም. January 26, 2008) የነዳጅ ዋጋ ጭማሪ መደረጉ ከተሰማ በኋላ በአዲስ አበባ የነዳጅ ማደያዎች አካባቢ ረጅም ሰልፎች መታየታቸውን ከስፍራው የደረሰን መረጃ ጠቆመ። ጭማሪው 29.25 % (29 ነጥብ 25 በመቶ) መሆኑ ታውቋል።

በየጊዜው በመጨመር ላይ ያለው የነዳጅ ዋጋ በዛሬው ዕለት በሊትር 2 ብር ከ15 ሣንቲም ጨምሯል። 7 ብር ከ35 ሣንቲም የነበረው የአንድ ሊትር የቤንዚን ዋጋ ከዛሬ ጀምሮ ወደ 9 ብር ከ50 ሣንቲም እንዲጨምር ተደርጓል። በዚህም ሳቢያ የነዳጅ ማደያዎችም በከፍተኛ ሁኔታ ተጨናንቀው እንደነበር ከኢትዮጵያ የደረሰን ዘገባው አስረድቷል።

 

“የነዳጅ ጭማሪው የህዝቡን የነፍስ ወከፍ ገቢ ያላገናዘበ ነው” የሚሉ ታዛቢዎች፤ በፍጆታዎች ላይ የሚደረጉ የዋጋ ጭማሪዎች የከፍተኛ ገቢ ያላቸውን ዜጎች ብቻ እንጂ የአብዛኛውን ዝቅተኛ ገቢ ያላቸውን ዜጎች ከግንዛቤ ውስጥ ያላስገባ ነው ይላሉ።

 

ከነዳጅ ጋር የተያያዙ የትራንስፖርትና የተለያዩ የፋብሪካ ውጤቶች ላይ ሊደረጉ የሚችሉ የዋጋ ጭማሪዎች ከ90% በላይ የሚሆነውን የሀገሪቱን ዝቅተኛ ገቢ ያላቸውን ዜጎች ሕይወት አደጋ ላይ ሊጥል እንደሚችል እነዚሁ ታዛቢዎች ስጋታቸውን ጠቁመዋል።

 

አንዳንድ ስግብግብ ነጋዴዎችም አጋጣሚውን ለመጠቀም በቀድሞ ዋጋ ያከማቹትን ነዳጅ በአዲሱ ዋጋ ለመሸጥ ማደያዎቻቸውን “ነዳጅ ጨርሰናል” በሚል ሰበብ ዘግተው እንደሰነበቱ ለማወቅ ችለናል።

አዲስ ቪዲዮ

ዜና እና ፖለቲካ

ኪነ-ጥበብ

ቪዲዮ

መጻሕፍት

ስለእኛ

ይከተሉን!