National Bank Ethiopia

የኢትዮጵያ ብሔራዊ ባንክ ሕንፃ

ዲያስፖራው በውጭ ገንዘብ የገዛውን አክስዮን ሲሸጥም ኾነ ትርፍ ሲያገኝ በብር ይኾናል የሚለው የረቂቁ መመሪያ አከራካሪ ይኾናል ተብሎ ይጠበቃል

ኢዛ(ረቡዕ ጥቅምት ፳፮ ቀን ፳፻፲፪ ዓ.ም. November 6, 2019)፦ የውጭ ዜግነት ያላቸው ትውልደ ኢትዮጵያውያን (ዲያስፖራ) በኢትዮጵያ በየትኛውም የፋይናንስ ተቋማት ውስጥ በውጭ ምንዛሪ አክስዮን ገዝተው ባለድርሻ የሚያደርጋቸውና አጠቃላይ ሒደቱን የሚመለከት ረቂቅ ሕግ መዘጋጀቱ ታወቀ።

የውጭ ዜግነት ያለው ኢትዮጵያውያን በአገሪቱ የፋይናንስ ተቋማት ውስጥ ኢንቨስት እንዲያደርጉ የሚፈቅደው ሕግ በቅርቡ መውጣቱን ተከትሎ፤ ዝርዝር ጉዳዮችን የሚመለከተው ይህ ረቂቅ መመሪያ የተሰናዳው በኢትዮጵያ ብሔራዊ ባንክ ነው።

የኢትዮጵያ ብሔራዊ ባንክ ያዘጋጀው ይህ ረቂቅ መመሪያ በአሁኑ ወቅት ለባንኮች፣ ለኢንሹራንሶችና ለአነስተኛ የፋይናንሰ ተቋማት አስተያየት እንዲሠጡበት የተላከላቸው መሆኑ ታውቋል።

በዚህ ረቂቅ መመሪያ መሠረት የውጭ ዜግነት ያላቸው ትውልደ ኢትዮጵያውያን የአገሪቱ የፋይናንስ ተቋማት የሚሸጡላቸውን አክስዮን የሚገዙት በውጭ ምንዛሪ ሲሆን፣ የአክስዮን ድርሻቸውን የሚወስዱት ደግሞ በወቅቱ ባለው የውጭ ምንዛሪ ዋጋ በብር እንደሆነ የሚያሳይ ነው።

የውጭ ዜግነት ያላቸው ኢትዮጵያውያን በኢትዮጵያ በየትኛውም የፋይናንስ ተቋማት ውስጥ ኢንቨስት እንዲያደርጉ የሚከለክለው የባንክ ሕግ ከተነሳ የወራት ዕድሜ ኾኖታል። ሰሞኑን ደግሞ በመድንና በአነስተኛ ብድር ተቋማት ውስጥ ኢንቨስት ማድረግ የሚችሉበት ሕግ ፀድቋል። ከ25 ዓመታት በላይ በቆዩት የኢትዮጵያ የፋይናንስ ተቋማት ሕግጋቶች ውስጥ፤ የውጭ ዜግነት ያላቸው ትውልደ ኢትዮጵየውያን በምንም ዐይነት መሥፈርት ቢሆን በባንክ፣ በኢንሹራንስና በአነስተኛ የብድር ተቋማት ውስጥ መሣተፍ እንደማይችሉ ተደንግጐ መቆየቱ አግባብ እንዳልነበር ሲገልጽ መቆየቱ አይዘነጋም። ሌላው ቀርቶ በእነዚህ የፋይናንስ ተቋማት ውስጥ አክስዮን የነበራቸውና በኋላ ላይ ዜግነታቸውን የቀየሩ ቢኖሩ እንኳን የአክስዮን ድርሻቸውን የግድ እንዲሸጡ መደረጉም ትክክል እንዳልነበር ቢገለጽም፤ መታረም ያልቻለ ሆኖ ቆይቷል።

አሁን ግን በባንክ፣ በኢንሹራንስና በአነስተኛ የብድርና ቁጠባ ተቋማት ውስጥ ተሳታፊ እንዲሆኑ በመፈቀዱ፤ ይህንን ለማስፈፀም ያስችላል የተባለ መመሪያ ለማውጣት የኢትዮጵያ ብሔራዊ ባንክ ረቂቅ መመሪያ አዘጋጅቷል። በዚህ ረቂቅ መመሪያ ውስጥ የአገሪቱ ባንኮች የውጭ ዜግነት ያላቸውን ኢትዮጵያውያን በምን ዐይነት ሁኔታ ማስተናገድ እንዳለባቸው የሚያመለክቱ አንቀጾች ተካተውበታል።

እንዲህ ያለው የመንግሥት እርምጃ የኢትዮጵያ የፋይናንስ ተቋማትን የፋይናንስ አቅም ከማጠናከር በላይ፤ ትውልደ ኢትዮጵያውያን ኪሣራ የማያውቀው የፋይናንስ ኢንዱስትሪ ውስጥ እንዲቀላቀሉ ማድረጉ በበጐ የሚታይ ነው። ይሁን እንጂ የኢትዮጵያ ብሔራዊ ባንክ ባወጣው መመሪያ በተለይ የውጭ ዜግነት ያላቸው ኢትዮጵያውያን፤ በኢትዮጵያ የፋይናንስ ተቋማት ውስጥ አክስዮን መግዛት የሚችሉት በውጭ ገንዘብ መኾኑ በረቂቅ መመሪያው ውስጥ መካተቱ ግን፤ መመሪያው ከመፅደቁ በፊት ይደረጋሉ ተብሎ በሚጠበቁ መድረኮች ላይ ሊያከራክር ይችላል ተብሎ ተገምቷል። ከዚህም ሌላ በውጭ ምንዛሪ የገዙትን የአክስዮን ድርሻ በትርፍ ክፍፍል ወቅት ድርሻቸውን የሚወስዱት በብር መኾኑን ያመልክታል። በዚህ ረቂቅ ላይ እንደተቀመጠው ባንኮች በውጭ ምንዛሪ የሸጧቸውን አክስዮኖች ሽያጭ በብሔራዊ ባንክ ያስቀምጣሉ መባሉም ጥያቄ አስነስቷል። (ኢዛ)

ከአዘጋጁ

የውጭ ዜግነት ላላቸው ኢትዮጵያውያን የፋይናንስ ተቋማት ክፍት እንዲኾኑ መፈቀዱን ተከትሎ በወጣው ረቂቅ መመሪያ ላይ አንባብያን አስተያየት እንዲሠጡበት የኢትዮጵያ ዛሬ ድረገጽ ዝግጅት ክፍል ይጋብዛል። This email address is being protected from spambots. You need JavaScript enabled to view it. 

አዲስ ቪዲዮ

ዜና እና ፖለቲካ

ኪነ-ጥበብ

ቪዲዮ

መጻሕፍት

ስለእኛ

ይከተሉን!