Sirak TadesseEthiopia Zare (ዓርብ መስከረም ፱ (9) ቀን ፳፻፩ (2001) ዓ.ም. September 19, 2008)፦ ታዋቂው አርቲስት ሲራክ ታደሰ አርፎ የቀብር ሥነ ሥርዓቱ ትናንት ኀሙስ መስከረም 8 ቀን 2001 ዓ.ም. በወይብላ ማርያም ቤተ ክርስቲያን መፈጸሙን የኢትዮጵያ ዛሬ ምንጮች ገለጹ።

 

ከአባቱ ከአቶ ተደሰ ካሳ፣ ከእናቱ ከወ/ሮ ስረባት አሰፋው በወሎ ክፍለ ሀገር በዋድላ ደላንታ አውራጃ ልዩ ስሙ ወገል ጤና በተባለ ሥፍራ ግንቦት 21 ቀን 1939 ዓ.ም. የተወለደ ሲሆን፣ ዕድሜው ለትምህርት እንደደረሰ፣ በሀገሩ ባህል መሠረት ዜማና ቅኔ እንዲሁም ድጓና ፆመ ድጓ ከአቋቋም ጋር የቤተክርስቲያኒቱ አብነት የሆነውን ያሬዳዊ ዝማሬ ተምሮ ጨርሷል።

 

ከዚያም ወደ አዲስ አበባ በመሄድ በግቢ ገብርኤል ቤተክርስቲያ ከማገልገሉም በላይ በሊቃውንት ጉባዔ አባልነት ሲሰራ ቆይቷል።

 

ከዚያ በኋላ በተፈጠረለት የሥራ አጋጣሚ ወደ ምድር ጦር የሙዚቃ ክፍል በመግባት በቲያትር ተዋናይነት፣ በግጥምና ዜማ ደርሲነት ከ1959 ዓ.ም. ጀምሮ እስከ 1969 ዓ.ም. ድረስ ካገለገለ በኋላ፤ በኢትዮጵያ ብሔራዊ ቲያትር ተመርጦ ከ1969 ዓ.ም. ጀምሮ ጡረታ እስከወጣበት 1997 ዓ.ም. ድረስ በግጥም፣ በዜማ ደረሲነትና አጫጭር ልብወለዶችን በመፃፍ አገልግሏል። በተለይ ግጥምና ዜማ በመስጠት ለጥላሁን ገሠሠ፣ ማህሙድ አሕመድ፣ ታምራት ሞላ፣ ምኒሊክ ወስናቸው፣ መልካሙ ተበጄ፣ ለገሠ ቀናው፣ ዓባይ በለጠ፣ እና ለሌሎችም ታዋቂ የሀገሪቱ አርቲስቶች ትውልዱ የማይሰለቻቸውን የዘፈንና የግጥም ዜማዎች በመድረስ ለህዝብ እንዲሰማ አብቅቷል።

 

አርቲስት ሲራክ ታደሰ በትወናው ዘርፍ አሉላ አባ ነጋ፣ ሀሁ በ6 ወር፣ የአመፃ ልጆች፣ የአዛውንቶች ክበብ፣ ነፃ ወንጀለኞች፣ መርዛማ ጥላ እና በተለይም ደግሞ በህዝብ ዘንድ ከፍተኛ አድናቆትን ያተረፈበት በአምታታው በከተማ ጉልሽ ሆኖ የተጫወተበት ገፀ-ባህሪ ይታወሳል።

 

አርቲስት ሲራክ ታደሰ በአሁኑ ሰዓት በርካታ ተመልካቾችን በመሳብ ላይ ባለው የፊልም ጥበብ ውስጥ በመሥራት አድናቆትን ያተረፈ ሲሆን፣ ብዙ የሬድዮ እና የቴሌቪዥን ደራማዎችን ተጫውቷል። በተጨማሪም አርቲስቱ ባለው ከፍተኛ የተዋናይነት ችሎታና ተወዳጅነት የኢትዮጵያ ብሔራዊ ቲያትር ለ5 ዓመታታ የጡረታ ዘመኑ እንዲራዘምለት የተደረገ ምርጥ የጥበብ ፈርጥ ነበር።

 

አርቲስት ሲራክ ታደሰ ባለትዳርና የሁለት ሴት እና የሦስት ወንዶች ልጆች አባት ነበር። አርቲስት ሲራክ ባደረበት ሕመም ምክንያት በሕክምና ሲረዳ ቆይቶ መስከረም ስምንት ቀን 2001 ዓ.ም. በተወለደ በ63 ዓመቱ ከዚህ ዓለም በሞት ተለይቷል።

 

አዲስ ቪዲዮ

ዜና እና ፖለቲካ

ኪነ-ጥበብ

ቪዲዮ

መጻሕፍት

ስለእኛ

ይከተሉን!