Ethiopia Zare (እሁድ ጥር 18 ቀን 2000 ዓ.ም. January 27,2008)፦ በነገው ዕለት ኢትዮጵያ ውስጥ ለሚጀመረው  የአፍሪካ ህብረት መሪዎች ስብስባ የአፍሪካ መሪዎች አዲስ አበባ እየገቡ ሲሆን፣ የነሱን መግባት ተከትሎ ማንኛውም የጋዜጣና የሎተሪ አዟሪ እየታፈሰ ይገኛል። ጠዋት የታሰረ አዟሪ ሲመሻሽ ይለቀቃል።

ሪፖርተራችን ተዟዙሮ ያነጋገራቸው የጋዜጣ አዟሪዎች እንደገለጹት ሲቪል የለበሱ ሰዎች እየመጡ በተከለከለና ለመኪና ዕይታ በተጋለጠ ቦታ ላይ መሸጥ እንዲያቆሙ ይነገራቸዋል። የተባለውን ጥሶ የተገኘ አዟሪ ይታሰራል። ቀኑን ሙሉ ውሎ ማስጠንቀቂያ ከተሰጠው በኋላ መሸትሸት ሲል ይለቀቃል።

ይህም የሚደረገው የሀገሪቱን ገፅታ ለመጠበቅ በሚል ነው። ነገር ግን የማንኛውም አዟሪ ኑሮ ከእጅ ወደ አፍ መሆኑ ይታወቃል።

በትናነትናው ዕለት አዲስ አድማስ፣ አዲስ ነገር፣ ኢትዮ ቻናል፣ ሪፖርተር እንግሊዘኛ እና የስፖርት ጋዜጦች ገበያ ላይ የሚውሉበት ቀን ሲሆን፣ አብዛኞቹ አዟሪዎች በመታሰራቸው ጋዜጣዎቹ ሳይሸጡ ሊያድሩ ችለዋል።  

በዛሬው ዕለትም ስታዲየም፣ አምባሳደር፣ ሜክሲኮ፣ ሳሪስ እና በሌላ አካባቢ የነበሩ አዟሪዎች በመታሰራቸውና እንዳይሸጡ በመከልከላቸው ለወትሮው በጋዜጣ ተጨናንቆ ይታይ የነበሩ አካባቢዎች ጭር ብለዋል።

በጉዳዩ ላይ አስተያየት እንዲሰጡት ሪፖርተራችን የጠየቃቸው የከተማው ነዋሪዎች “ይሄ’ኮ ሁሌ ስብሰባ ሲኖር ይደረጋል። ኑሯቸውን ለማሸነፍ ውር ውር ሲሉ ‘ታሳፍራላችሁ የአፍሪካ መሪዎች እናንተን ማየት የለባቸውም’ በሚል ይመስላል መከልከሉ። ይህ ደግሞ ከፍተኛ የመብት ጥሰት ነው” ይላሉ አስተያት ሰጪዎቹ።

“ገና ለገና መሪዎች መጡ ተብሎ ለፍቶ አዳሪ የሆኑትን አዟሪዎች ጾም ማሳደር ከአንድ ህዝብን በዲሞክራሲያዊ ስርዓት አስተዳድራለሁ ከሚል መንግስት የሚጠበቅ ተግባር አይደለም” ብለዋል አንድ አስተያየት ሰጪ አዛውንት።

“መንግስት እንግዳ የሚያስተናግደው ህዝብን እያገለለና ሥራ እያስፈታ አይደለም። በርግጥ መሪዎቹ እስካሉ ድረስ መንገድ እየዘጉ ማሳለፍ የጸጥታውን ሁኔታ መቆጣጠር ይችላል። ደሃ ማፈስ ግን ፍጹም ሕገ-ወጥ ተግባር ነው” ሲሉ አስተያት ሰጪዎች ጨምረው ገልፀዋል።

 

አዲስ ቪዲዮ

ዜና እና ፖለቲካ

ኪነ-ጥበብ

ቪዲዮ

መጻሕፍት

ስለእኛ

ይከተሉን!