Ethiopia Zare (ቅዳሜ መስከረም ፲፯ /17 ቀን ፳፻፩/2001 ዓ.ም. September 27, 2008)፦ በድንበርና በግጦሽ መሬት ምክንያት ተቀስቅሶ ባልበረደው በጉጂና ቡርጂ ዳግም የብሔረሰብ ግጭት ስድስት ሰው መሞቱን የአካባቢው ምንጮች ገለጹ።

 

ከ50 ቀናት በፊት በኦሮሚያ እና በደቡብ ክልል ባሉት የጉጂና ቡርጂ ብሔረሰቦች መካከል በተቀሰቀሰ ግጭት ስምንት ሰዎች የሞቱ ሲሆን፣ ይኼው ግጭት ባለመብረዱና በወቅቱ ዘላቂ መፍትሔ ሊፈለግለት ባለመቻሉ፣ እንደገና በመስከረም 7 ቀን 2001 ዓ.ም. በተደረገ የተኩስ ልውውጥ ከሁለቱም ወገኖች ስድስት ሰዎች መቁሰላቸውን የአካባቢው ምንጮች ጠቁመዋል።

 

ረብሻው ከተቀሰቀሰና ሰዎች ከሞቱበት ከኀምሌ ወር የመጨረሻው ቀን ጀምሮ ነዋሪዎቹ ከብቶቻቸውን አላሠማሩም፣ እርቅም አልወረደም፣ ድንበር ተካሎም አልተሰጣቸውም እንዲሁ እየተጠባበቁ በመቆየታቸውም በድጋሚ ለመስከረም ሰባቱ ረብሻ ተዳርገዋል ይላሉ ምንጮች።

 

መንግሥት ዜጎች እርስ በርስ ሲገዳደሉ ተመልካች መሆን የለበትም፣ ወደ አካባቢው በመግባት የማረጋጋትና የማስማማት ሥራ በመሥራት ግጭቱን ማስቆም፣ መንስዔውንም ከስሩ ማስወገድ ነበረበት ሲሉ የአካባቢውን ነዋሪዎች ይወቅሳሉ።

 

ግጭቱ የተከሰተው በቡርጂ ልዩ ወረዳ በራሌያ፣ በሙሬና አካባቢዋ ገጠር ቀበሌዎች ሲሆን፤ አሁንም በቀበሌዎቹ አስፈሪ ፀጥታ እንደነገሠ የአካባቢው ነዋሪዎች ይገልፃሉ።

 

የጉጂና የቡርጂ ፖሊሶች በበኩላቸው ረብሻውን ለማብረድና የአካባቢውን ሠላም ለማረጋጋት የፌደራል፣ የመከላከያ፣ አድማ በታኝና የክልል ፖሊስ ወደ አካባቢው ገብቶ ቁጥጥር እያደረገ መሆኑን ገልጿል።

 

አዲስ ቪዲዮ

ዜና እና ፖለቲካ

ኪነ-ጥበብ

ቪዲዮ

መጻሕፍት

ስለእኛ

ይከተሉን!