Ethiopia Zare (ዓርብ ጥቅምት ፯ ቀን ፳፻፩ ዓ.ም. October 17, 2008)፦ የሚኒስትሮች ምክር ቤት የመንግሥት ባለሥልጣን የሀብት ምዝገባን በተመለከተ ውይይት እንደሚያካሂድ ጠቅላይ ሚኒስቴር መለስ ዜናዊ ገለጹ።

 

ጠቅላይ ሚኒስትሩ ትናንት የህዝብ ተወካዮች ም/ቤት 4ኛ መደበኛ ስብሰባ ላይ፣ የመንግሥት ባለሥልጣናት ሀብትና ንብረትን በሚመለከቱ ጥናት መካሄዱን ተናግረው የጥናት ውጤቱ የቀረበለት የሚኒስትሮች ም/ቤት በዛሬው ዕለት ውይይት ያካሂድበታል ብለዋል።

 

የህዝብ ተወካዮች ምክር ቤት 4ኛ መደበኛ ስብሰባው ዋና አጀንዳ የነበረው የኢፌድሪ ፕሬዝዳንት መስከረም 26 ቀን 2001 ዓ.ም. ባደረጉት የመክፈቻ ንግግር ዙሪያ በቀረቡት የማሻሻያ ሞሽኖች ላይ መወያየት፣ የመንግሥትን አቋም ማዳመጥ እና የድጋፍ ሞሽንን ማፅደቅ ናቸው።

 

የፕሬዝዳንቱን የመከፈቻ ንግግርን አስመልክቶ ባለፈው ማክሰኞ ተቃዋሚ ፓርቲዎች ያቀረቡት የማሻሻያ ሞሽኖች 15 የነበሩ ሲሆን፣ ከነዚህም ውስጥ የሀገሪቱን ኢኮኖሚ ዕድገት ቀስፈው ከያዙት ምክንያቶች ዋነኛ ሙስና እና ብክነት በመሆናቸው ከዚያ አኳያ ከፍተኛ የመንግሥት ባለሥልጣናት የሀብት ምዝገባ ሥርዓት እንዲበጅለት የሚጠይቅ ይገኝበታል።

 

ጠቅላይ ሚኒስትሩ ከተቃዋሚዎች በቀረቡ የማሻሻያ ሞሽኖች የመንግሥታቸውን አቋም በገለፁበት ወቅት፣ የመንግሥት ባለሥልጣናት ሀብትና ንብረት አስመልክቶ ከተቃዋሚዎች የቀረበውን ጥያቄ ሲመልሱ የሚኒስትሮች ም/ቤት በቀረበለት ጥናት ዙሪያ ውይይት አድርጎበት እንዲፀድቅ ወደ ፓርላማ ይልከዋል ብለዋል።

 

ሀብትና ንብረት ማስመዝገብ ከሚገባቸው ባለሥልጣናት መካከል ሚኒስትሮች፣ በመንግሥት የሲቪል ሰርቪስ ውስጥ በኃላፊነት ላይ የሚገኙ ግለሰቦች እንደሚመለከት ገልፀው፣ ፓርላማው ባለው ሥልጣን ተጠቅሞ ሊያጸድቀው እንደሚችል ተናግረዋል።

 

የፕሬዝዳንቱ የመክፈቻ ንግግርን አስመልክቶ ከተቃዋሚዎች የቀረቡ የማሻሻያ ሞሽኖች ላይ መልስ የሰጡት ጠ/ሚ/ር መለስ፣ በመንግሥት አቋም የፕሬዝዳንቱ ንግግር አጠቃላይ ይዘት ያለው ንግግር መሆኑን ተናግረው ተቃዋሚዎች ካቀረቡት የማሻሻያ ሞሽኖች ውስጥ በተወሰኑት ላይ ልዩነት የለኝም ብለዋል።

 

በተለይ በተቃዋሚዎች ከቀረቡት የሥነ ህዝብ፣ የተማረ የሰው ኃይል ፍሰት፣ የባለሥልጣኖች የሀብትና የንብረት ምዝገባ፣ የሸማቾች መብትን በተመለከተ ገዢውን ፓርቲና ተቃዋሚዎችን ያቀራረበ ሃሳብ ነበር።

 

አዲስ ቪዲዮ

ዜና እና ፖለቲካ

ኪነ-ጥበብ

ቪዲዮ

መጻሕፍት

ስለእኛ

ይከተሉን!