Ethiopian AirlinesEthiopia Zare (ኀሙስ ጥቅምት 20 ቀን 2001 ዓ.ም. October 30, 2008)፦ የኢትዮጵያ አየር መንገድ ባለፈው ዓመት 2000 ዓ.ም. (2007/2008 እ.ኤ.አ.) የ9 ነጥብ 2 ቢሊዮን ብር (941 ሚሊዮን የአሜሪካ ዶላር) ሽያጭ እንዳካሄደና የ507 ሚሊዮን ብር የተጣራ ትርፍ እንዳገኘ አስታወቀ።

 

አየር መንገዱ ባለፈው ዓመት (2007/2008 እ.ኤ.አ.) 2 ነጥብ 5 ሚሊዮን መንገደኞችን ያጓጓዘ ሲሆን፣ እ.ኤ.አ. በ2010 ያቀደው የአንድ ቢሊዮን ዶላር ሽያጭ ከተሳካለት፤ በ2015 እ.ኤ.አ. የአንድ ነጥብ አምስት ቢሊዮን ዶላር ሽያጭ ለማከናወን እንዳቀደ የአየር መንገዱ ዋና ሥራ አስፈፃሚ አቶ ግርማ ዋቄ ለመገናኛ ብዙኃን ገልፀዋል።

 

ባለፈው ዓመት 53 ዓለም አቀፍ የበረራ መስመሮች የነበሩት ሲሆን፣ እ.ኤ.አ. 2010 የበረራ መስመሩን ወደ 60 ለማድረስ እንዳቀደ አስታውቋል። እ.ኤ.አ. 2015 ደግሞ የበረራ መስመሩን 75 ለማድረግ ማቀዱ ታውቋል።

 

ከ53 የበረራ መስመሮች ውስጥ አየር መንገዱ ወደ 32 የአፍሪካ ከተሞች የሚበር ሲሆን፣ ቀሪዎቹ ደግሞ ወደ አውሮፓ፣ ወደ እስያ፣ ወደ መካከለኛው ምስራቅ እና ወደ ሰሜን አሜሪካ የሚያደርጋቸው በረራዎች ናቸው። እነዚህን በረራዎች የሚያካሂደው በ27 አውሮፕላኖች ሲሆን፣ እ.ኤ.አ. በ2015 የአውሮፕላኖቹን ቁጥር ወደ 45 ለማሳደቅ ዕቅድ እንዳለው ታውቋል።

 

ምንም እንኳን በዓለም የነዳጅ ዋጋ ከመቼውም ጊዜ በላይ የናረ ቢሆንም፤ አየር መንገዱ ከ1999 ዓ.ም. ዓመታዊ የተጣራ ትርፉ ጋር የ2000 ዓ.ም. ሲወዳደር በ290 በመቶ በላይ ዕድገት እንዳለው ለማወቅ ተችሏል።

 

አዲስ ቪዲዮ

ዜና እና ፖለቲካ

ኪነ-ጥበብ

ቪዲዮ

መጻሕፍት

ስለእኛ

ይከተሉን!