Homer Simpson & Obama, APየማኬይን ደጋፊዎች ”ዘ ሲምፕሰንስ”ን ተቹ

Ethiopia Zare (እሁድ ጥቅምት 23 ቀን 2001 ዓ.ም. November 2, 2008)፦ በዓለም ላይ ካሉት ታዋቂ የቴሌቭዥን ተከታታይ ፊልሞች ውስጥ ”ዘ ሲምፕሰንስ” የተሰኘው የካርቱን ፊልም ላይ ያለው ዋና ገፀ-ባህሪ ሆመር ሲምፕሶን በእሁዱ ትዕይንት ለባራክ ኦባማ ድጋፉን በመስጠቱ ከጆን ማኬይን ደጋፊዎች ከፍተኛ ተቃውሞና ትችት ደረሰበት።

 

በዩናይትድ ስቴትስ እሁድ ዕለት በተላለፈው በዚሁ ”ዘ ሲምፕሰንስ” (The Simpsons) ተከታታይ ፊልም ላይ ባለቢጫ ቀለሙ አባት ሆመር ሲምፕሰን በኤሌክትሮኒክስ ድምፅ መስጫው ላይ ለኦባማ ድምፁን ሲሰጥ፤ ማሽኑ የሲምፕሰንን ድምፅ የቆጠረው ለጆን ማኬይን ነበር። በዚህም ምክንያት ደጋግሞ ስድስት ድምፆችን ለኦባማ ቢሰጥም ማሽኑ ለማኬይን ይሰጥና በመጨረሻ ማኬይን ፕሬዝዳንት መሆኑን ያበስራል።

 

ይህንን ክፍል የሚያሳየው የቪዲዮ ክሊፕ በኢንተርኔት የተሰራጨው በሴፕቴምበር ወር አካባቢ ትዕይንቱ በቴሌቭዥን ሳይለቀቅ በፊት ነበር። በዩ ቲዩብ ላይ ሴፕቴምበር 29 ላይ የተለቀቀው ይኸው ቪዲዮ በዛሬው ዕለት ከ1.5 ሚሊዮን በላይ ተመልካቾች እንዳዩት ለማወቅ ችለናል። ባራክ ኦባማ ከዘ ሲምፕሶንስ ያገኘው ድጋፍ ያልተጠበቀ ቢሆንም፣ በርካታ ታዋቂ አሜሪካውያን አርቲስቶች ከጆን ማኬይን ይልቅ ድጋፋቸውን የለገሱት ለባራክ ኦባማ መሆኑ ይታወቃል።

 

የፊልም ተውኔቱ ፀሐፊ ላይ በአንድ የሪፑብሊካን ድረ ገጽ ላይ ከተሰነዘሩት ትችቶች ውስጥ የሪፑብሊካን ፓርቲ የድምፅ ማጭበርበር ሊያደርግ እንደሚችል በማሳየት በተዘዋዋሪ ለኦባማ ድጋፉን ሰጥቷል የሚል ይገኝበታል።

 

የፊልም ተውኔቱ ፀሐፊ አል ዤን ”ዘ ሲምፕሶንስ” ለኦባማ ድጋፉን እንዳልሰጠ ተናግሯል። ”እኛ የሞከርነው በማኅበረሰቡ ላይ አሽሙር ለመሥራት ነው። ብዙኀኑ የኅብረተሰባችን ክፍል በድምፅ አሰጣጡ ላይ ጥርጥር እንዳለሁ አምናለሁ። በተለይም የኤክትሮኒክስ ድምፅ መስጫ መሣሪያውን በጥርጣሬ ነው የሚመለከተው፤ እኛም በዚህ ጉዳይ ላይ ነው ያሸሞርነው” ሲል አል ዤን ገልጧል።

 

 

አዲስ ቪዲዮ

ዜና እና ፖለቲካ

ኪነ-ጥበብ

ቪዲዮ

መጻሕፍት

ስለእኛ

ይከተሉን!