Ethiopia Zare (ቅዳሜ ኅዳር 13 ቀን 2001 ዓ.ም. November 22, 2008)፦ በኢትዮጵያ የመድብለ ፓርቲ ዲሞክራሲያዊ ሥርዓትን ለመገንባት ፓርቲዎች ተደራጅተው ትግላቸውን የቀጠሉ ቢሆንም፤ ኢህአዴግ የፖለቲካ ምህዳሩን ከመቼውም ጊዜ የበለጠ እያጠበበ፣ ተቃዋሚ ፓርቲዎች ጠንክረውና ደርጅተው እንዳይወጡ የሚያደርግባቸው ጫና እየከፋ ይገኛል በማለት መድረክ ለዲሞክራሲ ምክክር በኢትዮጵያ አስታወቀ።

 

የምክክር መድረኩ ሰሞኑን ባወጣው መግለጫ እንደገለፀው፣ መንግሥትና ገዢው ፓርቲ በሠላማዊ መንገድ እንታገላለን የሚሉትን ወገኖች ማሰርና ማንገላታት እርምጃ የፖለቲካ ምህዳሩ ለሠላማዊ ትግል አይመችም በማለት የትጥቅ ትግል የሚያንቀሳቅሱትን ወገኖች የሚያጠናክር፣ የሀገራችንን ችግሮች ያባብስ እንደሆነ እንጂ ከዚህ ያለፈ ፋይዳ አይኖረውም ብሏል።

 

በኢትዮጵያ የተሳካ ዲሞክራሲያዊ የፖለቲካ ሽግግር ኖሮ የጦርነትና የድህነት አዙሪቱ እንዲቆም የድርሻችንን ለመወጣት በምንንቀሳቀስበት ወቅት፣ የመድረኩን የድርጅት ኮሚቴ ሰብሳቢን አቶ በቀለ ጅራታ ራባን ያለ ፍርድ ቤት ትዕዛዝ ማሠሩ፣ መንግሥትና ገዢው ፓርቲ ለመድረኩ በጎ አመለካከት የሌላቸውን መሆኑን የሚጠቁም መሆኑን መድረኩ በመግለጫው ላይ ጠቅሷል።

 

አቶ በቀለ ጅራታ ራባ የመድረክ መሥራች ከሆኑት አራት ፓርቲዎች አንዱ የሆነው የኦሮሞ ፌዴራሊስት ዲሞክራሲያዊ ንቅናቄ (ኦፌዲን) ዋና ፀሐፊ ሲሆኑ፣ በፖሊስ የተያዙት ጥቅምት 21 ቀን 2001 ዓ.ም. ነው። ከአቶ በቀለ ጋር አብረዋቸው ከታሰሩት በርካታ ወገኖች ውስጥ የምክክር መድረኩ አባል የሆነው የኦሮሞ ኮንግረስ አባላትም ይገኙበታል በማለት መግለጫው ጠቅሷል። የምክክር መድረኩ የተቋቋመው በአራት ፓርቲዎችና በሁለት ታዋቂ ግለሰቦች ባለፈው ዓመት ሰኔ ወር መሆኑ ይታወቃል።

 

አዲስ ቪዲዮ

ዜና እና ፖለቲካ

ኪነ-ጥበብ

ቪዲዮ

መጻሕፍት

ስለእኛ

ይከተሉን!