Ethiopia Zare (እሁድ ኅዳር 14 ቀን 2001 ዓ.ም. November 23, 2008)፦ ዛሬ እሁድ ኅዳር 14 ቀን 2001 ዓ.ም. ”ታላቁ ሩጫ” ለስምንተኛ ጊዜ በአዲስ አበባ የተካሄደ ሲሆን፣ በውድድሩ ወደ 32 ሺህ የሚጠጉ ሰዎችና 480 አትሌቶች መሳተፋቸው ታወቀ።

 

በዚሁ በኢትዮጵያ በተደረገው የታላቁ ሩጫ የ10 ሺህ ሜትር ውድድር ላይ በሴቶች አትሌት ወዴ አያሌው ውድድሩን በ33፡31፡25 ደቂቃ በአንደኝነት ስታጠናቅቅ፣ አትሌት ወርቂቱ አያኖ በ33፡34፡01 ደቂቃ ሁለተኛ ወጥታለች። ውድድሩን በሦስተኝነት ጨረሰችው አትሌት ጠይባ ኤርኬሶ ደግሞ በ33፡56፡49 ደቂቃ ውድድሩን አጠናቅቃለች።

 

አንደኛ የወጣችው አትሌት ውዴ አያሌው ባለፈው ዓመት ተደርጎ የነበረውን የታላቁን ሩጫም በአንደኝነት እንደጨረሰች አይዘነጋም።

 

በወንዶች ደግሞ አትሌት ጫላ ደቻሳ በ28፡54፡47 ደቂቃ አንደኛ ሲወጣ፣ አትሌት ፈይሳ ሌሊሳ በ29፡06፡37 ደቂቃ ሁለተኛ፣ አትሌት ድሪባ መርጋ በ29፡09፡87 ደቂቃ ሦስተኛ ወጥተዋል።

 

በታላቁ ሩጫ ከአንድ እስከ ሦስተኛ ለወጡት አሸናፊዎች ሽልማት ተዘጋጅቶ የነበረ ሲሆን፣ በዚህም መሠረት አንደኛ ለወጡት 25 ሺህ ብር፣ ሁለተኛ ለወጡት የ15 ሺህ ብር እና ሦስተኛ ለወጡት ደግሞ የ10 ሺህ ብር የገንዘብ ሽልማት ተበርክቶላቸዋል። ሁለተኛና ሦስተኛ ለወጡት ተወዳዳሪዎች የተሰጠው የዘንድሮው ሽልማት ከባለፈው ዓመት ያደገ ሲሆን፣ ባለፈው ዓመት ሁለተኛ የወጡት ተወዳዳሪዎች የ12 ሺህ 12 ሺህ ብር፤ ሦስተኛ የወጡት ደግሞ የ6 ሺህ ብር ሽልማት አግኝተው እንደነበር አይዘነጋም። አንደኛ የወጡት ግን አልተቀየረም።

 

በዚሁ ውድድር ላይ ነዋሪነታቸው በኢትዮጵያ የሆኑ የሌሎች ሀገሮች አምባሣደሮች መካከል በተደረገው የ10 ሺህ ሜትሩ (10 ኪሎ ሜትሩ) የሩጫ ውድድር ላይ ከተሳተፉት አምባሣደሮች ውስጥ በሴቶች የፖርቹጋል አምባሣደር የሆኑት ቬራ ፈርናንዴዝ አንደኛ ወጥተዋል። በወንዶች ደግሞ በኢትዮጵያ የኖርዌይ አምባሣደር የሆኑት የንስ ፒተር ኬምፕሩድ ውድድሩን በአንደኝነት አጠናቅቀዋል። ባለፈው ዓመትም የኖርዌይ አምባሣደር በውድድሩ ላይ ተሳትፈው ከነበሩት 15 አምባሣደሮች ውስጥ አንደኛ ወጥተው እንደነበር አይዘነጋም።

 

በዘንድሮው የታላቁ ሩጫ አሜሪካ ኢትዮጵያ ውስጥ የሚገኙ ዜጎችዋ በታላቁ ሩጫ እንዳይሳተፉ ከሣምንት በፊት አስጠንቅቃ እንደነበር ይታወቃል። በኢትዮጵያ የሚገኘው የአሜሪካ ኤምባሲ ኅዳር 4 ቀን 2001 ዓ.ም. (November 14, 2008) ለዜጎቹ በላከው መልዕክት በመዲናዋ (አዲስ አበባ) ተደጋጋሚ የቦንብ ጥቃቶች እንደነበሩ በማስታወስ የሽብር አደጋ ሊኖር ይችላል በሚል እንደነበር ታውቋል።

 

”ታላቁ ሩጫ” በመባል የሚታወቀውና ዛሬ የተካሄደው በኢትዮጵያም ሆነ በአፍሪካ ከፍተኛ ቁጥር ያለው ህዝብ ከሚሳተፍባቸው የሩጫ ውድድሮች ቀዳሚውን ሥፍራ ይዞ የሚገኘው ይኸው ውድድር በአትሌት ሻለቃ ኃይሌ ገብረሥላሴ የተጀመረና በእሱ እየተመራ ያለ መሆኑ ይታወቃል። ውድድሩ በብዙ ኢትዮጵያውያን ዘንድ እና በዓለምም ደረጃ ከጊዜ ወደ ጊዜ እየታወቀ መጥቷል።

 

አዲስ ቪዲዮ

ዜና እና ፖለቲካ

ኪነ-ጥበብ

ቪዲዮ

መጻሕፍት

ስለእኛ

ይከተሉን!