Ethiopia Zare (ዓርብ ኅዳር 19 ቀን 2001 ዓ.ም. November 28, 2008)፦ የመላው ኢትዮጵያ አንድነት ድርጀት (መኢአድ) በትናንትናው ዕለት ከሰዓት በኋላ በምዕራብና በምስራቅ አዲስ አበባ ቅስቀሳ ማካሄዱን ገለጸ።

 

የፓርቲው ህዝብ ግንኙነት ኃላፊ ወ/ሮ መሶብወርቅ ቅጣው እንደገለጹት በሁለት አይሱዙ መኪና፤ መነሻቸውን ቸርቸል ጎዳና ላይ ከሚገኘው የመኢአድ ጽ/ቤት ያደረገው የቅስቀሳ ሂደት በምስራቅ በኩል በወሎ ሰፈር ሩዋንዳ፣ አድርጎ እስከ ቦሌ ኤርፖርት የዘለቀ መሆኑንና በምዕራብ ቀጠናም ከቸርችል ብሔራዊ ትያትር በማድረግ ቤተልና ዘነብወርቅ የደረሰ መሆኑን ለመረዳት ተችሏል።

 

ከትናንት ኅዳር 18 ቀን እስከ የፊታችን እሁድ ኅዳር 21 ቀን 2001 ዓ.ም. ድረስ "ሞረሽ" የተባለው የቀድሞ የመኢአድ የሙዚቃ ቡድን የሠላማዊ ትግል ጥሪ መልዕክት ያላቸው በራሪ ወረቀቶችን በመበተን በአዲስ አበባ ከተማ የተለያዩ አካባቢዎች በመኪና ይንቀሳቀሳል።

 

በትላንትናው ዕለት ባደረገው ቅስቀሳም "ሞረሽ" ባንድ የኢንጅነር ኃይሉ ሻውልን ፎቶ ይዞና፤ በእስር ላይ በሚገኘው በታዋቂው ድምፃዊ ቴዎድሮስ ካሳሁን (ቴዲ አፍሮ)፤ "ጃ ያስተሰርያል" የሚለውን ዜማ በማሰማት በራሪ ወረቀቶችን እየበተኑ ቅስቀሳ ሲያደርጉ ታይቷል።

 

ቅስቀሳው ሊደረግ የታሰበበው ባለፈው ሣምንት የነበረ ቢሆንም፤ በታላቁ ሩጫና በሌሎች ዝግችቶች ምክንያት ወደዚህኛው ሣምንት መዛወሩን ወ/ሮ መሶብወርቅ ተናግረዋል።

 

ቅስቀሳውን ለማድረግም ፍቃድ ከማዘጋጃ ቤት መጠየቃቸውንና ማዘጋጃ ቤቱም ምርጫ ቦርድ የሰጣቸውን ፍቃድ ይዘው መንቀሳቀስ እንደሚችሉ እንደተገለጸላቸው አስረድተዋል።

 

አዲስ ቪዲዮ

ዜና እና ፖለቲካ

ኪነ-ጥበብ

ቪዲዮ

መጻሕፍት

ስለእኛ

ይከተሉን!