Artist Menilik Wossenachew, (1941 - 2008)1933 - 2001 ዓ.ም.

Ethiopia Zare (ረቡዕ ታህሳስ 15 ቀን 2001 ዓ.ም. December 24, 2008)፦ እውቁና አንጋፈው ድምፃዊ ምኒልክ ወስናቸው ዛሬ ረቡዕ ታህሳስ 15 ቀን 2001 ዓ.ም. አዲስ አበባ ውስጥ በኢትዮጵያ ሰዓት አቆጣጠር ከንጋቱ አስራ አንድ ሰዓት ተኩል ላይ በ68 ዓመቱ ከዚህ ዓለም በሞት መለየቱን የኢትዮጵያ ዛሬ ሪፖርተር ዘገበ። ነገ የቀብሩ ስነሥርዓት ይፈፀማል።

 

አርቲስት ምኒልክ ወስናቸው ታምሞ በሕክምና ሲረዳ መቆየቱንና በሕመሙ ምክንያት በአልጋ ላይ ውሎ እንደነበር ለመረዳት ችለናል።

 

ድምፃዊ ምኒልክ ወስናቸው በ1957 ዓ.ም. አካባቢ በግርማ በየነ አማካኝነት በተቋቋመው ሁለተኛው የ“ራስ ባንድ” ተብሎ የሚታወቀውና የራስ ሆቴል ባንድ ውስጥ ከእነ ግርማ በየነ፣ ተስፋማሪያም ኪዳኔ፣ ኃይሉ (ዝሆን) ከበደ፣ ግርማ ዘማሪያም እና ሠይፉ ዮሐንስ ጋር የሙዚቃ ቡድኑ አባል እንደነበረ ይታወቃል።

The 2nd Ras Band 1968 Left to Right-Girma Zemariam, Menelik Wossenachew, Girma Beyene, Seyfu Yohannes, Hailu “Zehon” Kebede, & Tesfamariam Kidane

ሁለተኛው ራስ ባንድ፣ ከግራ ወደ ቀኝ - ግርማ ዘማሪያም፣ ምኒልክ ወስናቸው፣ ግርማ በየነ፣ ሰይፉ ዮሐንስ፣ ኃይሉ ከበደ እና ተስፋማሪያም ኪዳኔ (በ1960 ዓ.ም. አካባቢ)

“አምሃ ሪከርድስ” የተሰኘው የሙዚቃ አሣታሚ ድርጅት “መቃብሬን ልየው” የሚለውን የምኒልክን ሸክላ እንዳሳተመለት ስለድምፃዊው የተፃፉ መዛግብት ይጠቁማሉ። የዚህ አልበም የሙዚቃ አቀናባሪ ታዋቂው የሙዚቃ ባለሙያ ሙላቱ አስታጥቄ እንደሆነ መረጃዎች ይጠቁማሉ።

 

ድምፃዊ ምኒልክ ወስናቸው ከዘፈናቸውና በህዝብ ዘንድ ከፍተኛ ተደናቂነትን ካተረፉለት ውስጥ “ትዝታ አያረጅም”፣ “ጋሽ ጀምበሬ”፣ “ፍቅር ባስተርጓሚ”፣ “ስኳር ስኳር”፣ “እንገናናለን”፣ “ፍቅር አያረጅም”፣ “አደረች አራዳ”፣ ... የሚሉት ጥቂቶቹ ናቸው። ድምፃዊው ምኒልክ በሱዳንኛም ይዘፍን እንደነበር ይታወቃል።

 

ድምፃዊ ምኒልክ የአራት ልጆች አባት ሲሆን፣ አብዮቱ የፈነዳ አካባቢ ለስደት ተዳርጎ ነበር። ድምፃዊው በሱዳንና በአሜሪካን ሀገር ለ22 ዓመታት በስደት ሲኖር ቆይቶ የዛሬ 12 ዓመት ገደማ ወደ ኢትዮጵያ ተመልሶ መግባቱ ይታወቃል።

 

የአርቲስት ምኒልክ ወስናቸው የቀብር ስነሥርዓት ነገ ታህሳስ 16 ቀን 2001 ዓ.ም. በአዲስ አበባ በሚገኘው የየካ ሚካኤል ቤተክርስቲያን ከቀኑ ስድስት ሰዓት ጀምሮ የሚፈጸም መሆኑ ታውቋል። የኢትዮጵያ ዛሬ ድረ ገጽ በዚህ አጋጣሚ ለቤተሰቦቹ፣ ለወዳጅ ዘመዶቹና ላድናቂዎቹ "ጽናቱን ይስጣችሁ!" ለማለት ይወዳል። (ከዚህ በታች ሁለት የእውቁንና አንጋፋውን አርቲስት ምኒልክ ወስናቸው የቪዲዮ ክሊፖች አያይዘናቸዋል።)

 

 

አዲስ ቪዲዮ

ዜና እና ፖለቲካ

ኪነ-ጥበብ

ቪዲዮ

መጻሕፍት

ስለእኛ

ይከተሉን!