Ethiopia Zare (ዓርብ ጥር 8 ቀን 2001 ዓ.ም. January 16, 2009)፦ የፌደራሉ ከፍተኛ ፍርድ ቤት በደርግ ሥርዓት ከቀይ ሽብር ጋር በተያያዘ በዘር ማጥፋት ወንጀል ዓቃቤ ሕግ ክስ መስርቶባቸው የነበሩትንና በሌሉበት የዕድሜ ልክ ፅኑ እስራት ተፈርዶባቸው የነበሩትና ጉዳያቸው በድጋሚ ሲታይላቸው የቆዩት አቶ ቀልቤሳ ነገዎ ረቡዕ ጥር 6 ቀን በዋለው ችሎት “ጥፋተኛ” ተብሎ ተፈረደባቸው።

 

በስደት ይኖሩበት በነበረው አሜሪካን ሀገር ዜጋ ሆነው ይኖሩ የነበሩትን አቶ ቀልቤሳ ነገዎን አሜሪካን በ1997 ዓ.ም. ለኢትዮጵያ አሳልፋ እንደሰጠቻቸው አይዘነጋም። በአሜሪካ ነዋሪ የሆኑ በቀይ ሽብር ተበዳይ ሴቶች በአሜሪካ በአቶ ቀልቤሳ ላይ በፍትሐ ብሔር በመሰረቱባቸው ክስ የቅጣት ካሣ እንዲከፍሉ ፍርድ ቤቱ ፈርዶባቸው ነበር። በመጨረሻም የአሜሪካ ዜግነታቸው ተነጥቆ ወደ ኢትዮጵያ እንዲመለሱ ተደርጓል።

 

አቶ ቀልቤሳ ነገዎ በደርግ ሥርዓት በአዲስ አበባ ውስጥ በከፍተኛ ዘጠኝ የአብዮትና ዘመቻ አስተባባሪ ሊቀመንበር የነበሩ ሲሆን፣ ቀይ ሽብርንና በደርግ ሥርዓት የደረሰውን የዘር ማጥፋት አስመልክቶ ኢህአዲግ ሥልጣን እንደጨበጠ የተቋቋመው የልዩ ዓቃቤ ሕግ ክስ በሌሉበት መስርቶባቸው ነበር። ጉዳዩን ሲያየው የነበረው ፍርድ ቤት በ1989 ዓ.ም የዕድሜ ልክ ፅኑ እስራት ፈርዶባቸው እንደነበር አይዘነጋም።

 

ረቡዕ ዕለት አቶ ቀልቤሳ ነገዎን "ጥፋተኛ" ሲል የፈረደባቸው የፌደራሉ ከፍተኛ ፍርድ ቤት የጥፋተኝነት ውሳኔ ለመስጠት ለፊታችን ኀሙስ ጥር 14 ቀን 2001 ዓ.ም. ቀጠሮ ሰጥቷል።

 

አዲስ ቪዲዮ

ዜና እና ፖለቲካ

ኪነ-ጥበብ

ቪዲዮ

መጻሕፍት

ስለእኛ

ይከተሉን!