Paris Marathon, 20090405በሴቶች አንደኛና ሁለተኛ፣ በወንዶች ሁለተኛ ሆነዋል

Ethiopia Zare (እሁድ መጋቢት 27 ቀን 2001 ዓ.ም. April 5, 2009)፦ በ33ኛው የፓሪስ ማራቶን ኢትዮጵያውያኖቹ ሴት አትሌቶች አፀደ ባይሳ እና አሰለፈች መርጊያ አንደኛና ሁለተኛ ሲወጡ፣ በወንዶች ደግሞ አትሌት በዙ ወርቁ ኬንያዊውን ቪንሰንት ኪፐሩቶን ተከትሎ ሁለተኛ ወጥቷል።

 

በየዓመቱ አፕሪል ወር ላይ በፈረንሣይ ዋና ከተማ ፓሪስ በሚደረገው፣ 37 ሺህ ሯጮች በተሳተፉበትና እሁድ መጋቢት 27 ቀን (April 5, 2009) በተደረገው 33ኛው የፓሪስ ማራቶን ላይ አትሌት አፀደ ባይሳ ውድድሩን በአንድኝነት የጨረሰችው 2 ሰዓት ከ24 ደቂቃ፣ ከ52 ሰከንድ ሲሆን፣ አትሌት አሰለፈች መርጊያ ደግሞ 2፡25፡02 ሰዓት በመግባት ሁለተኛ ወጥታለች። ፈረንሣዊትዋ ክሪስቴሌ ዳውኒ ደግሞ በ2፡25፡43 ሰዓት በሦስተኝነት ውድድሩን ጨርሳለች።

 

የ21 ዓመቱ ኬንያዊው ቪንሰንት ኪፕሩቶ 42 ነጥብ 195 ኪሎ ሜትሩን በ2 ሰዓት ከ5 ደቂቃ ከ47 ሰከንድ በመግባት ውድድሩን በአንደኝነት አጠናቅቋል። አትሌቱ የፓሪሱን ክብረወሰንም ሰብሯል።

 

ኬንያዊውን ተከትሎ በ2፡06፡15 ሰዓት በመግባት ውድድሩን በሁለተኝነት የጨረሰው ኢትዮጵያዊው አትሌት በዙ ወርቁ ሲሆን፣ ኬንያዊው አትሌት ዳቪድ ኪየንግ ደግሞ 2፡06፡26 ሰዓት በመግባት ውድድሩን በሦስተኝነት ጨርሷል።

 

ያለፈውን ዓመት የፓሪስ ማራቶን ያሸነፈው ኢትዮጵያዊው አትሌት ፀጋዬ ከበደ ሲሆን፣ ውድድሩን የጨረሰው 2፡06፡39 ሰዓት ነበር። የዓለም የማራቶን ክብረወሰን እ.ኤ.አ. ሴፕቴምበር 28 ቀን 2008 ጀርመን ዋና ከተማ በርሊን ላይ በአትሌት ኃይሌ ገብረሥላሴ የተመዘገው 2 ሰዓት፣ ከ3 ደቂቃ፣ ከ59 ሰከንድ እንደሆነ ይታወቃል።

 

አዲስ ቪዲዮ

ዜና እና ፖለቲካ

ኪነ-ጥበብ

ቪዲዮ

መጻሕፍት

ስለእኛ

ይከተሉን!