Ethiopia Zare (ሰኞ መጋቢት 28 ቀን 2001 ዓ.ም. April 6, 2009)፦ የጠቅላይ ሚኒስትር መለስ ዜናዊ ባለቤት ወ/ሮ አዜብ መስፍን የህወሓት የሆነው (ኤፈርት) ምክትል ሥራ አስኪያጅ ሆነው መሾም በፓርቲው አመራሮች መካከል ቅሬታ መፍጠሩን ምንጮች ጠቆሙ።

 

የህወሓት የንግድ ድርጅቶች ስብስብ የሆነው ኤፈርት ያስተዳድሩ ከነበሩት የቀድሞው የመከላከያ ሚኒስትር ስዬ አብርሃ በኋላ ለረጅም ዓመታት አቶ ስብሃት ነጋ በኃላፊነት ሲያስተዳድሩት የነበረ ሲሆን፣ ከወራት በፊት በሳቸው ምትክ የህወሓት ከፍተኛ አመራር የሆነው አቶ አባዲ ዘሙ መተካታቸው ይታወቃል።

 

ወ/ሮ አዜብ መስፍን በሥሩ ከፍተኛ ካፒታል ያላቸው 25 ኩባንያዎችን ያቀፈው የህወሓት ንግድ ድርጅት “ኤፈርት” ምክትል ሥራ አስኪያጅ ተደርገው መሾማቸው የፓርቲው ሥልጣን በአንድ ቤተሰብ እጅ እንዲወድቅ የሚያደርግ ነው ሲሉ አንዳንድ የፓርቲው አመራሮች ተቃውሞአቸውን ለጠቅላይ ሚኒስትር መለስ ማሰማታቸውን ምጮች ጠቁመዋል።

 

የመጀመሪያው የወ/ሮ አዜብ መስፍን ሹመት በአቶ ስብሃት ነጋ ምትክ የነበረ መሆኑን የጠቆሙት ምንጮች፤ ይህ በፓርቲው አመራሮች ዘንድ ቅሬታው ከፍተኛ የነበረ በመሆኑ ዘግየት ብሎ ምክትል ሥራ አስኪያጅ እንዲሆኑ የሚያዘው የሹመት ደብዳቤ ደርሷቸዋል።

 

የህወሓት ማዕከላዊ ኮሚቴ አባል፣ የፓርላማው የማኅራዊ ጉዳዮች ቋሚ ኮሚቴ አባል የሆኑት ወ/ሮ አዜብ የፓርቲውን ትልቅ ድርጅት እንዲያስተዳድሩ መሾማቸው ቅሬታ እንደፈጠረባቸው የፓርቲው አመራሮች መግለጻቸውን ምንጮቻችን ጠቁመውናል።

 

ጠ/ሚሩ ቅሬታውን ችላ ብለው ማለፋቸው ድርጅቶቹን የማስተዳደር ሥልጣን በእጅ አዙር በራሳቸው ቁጥጥር ስር ለማድረግ ሳያስቡ እንዳልቀረ ምንጮች ጠቁመዋል።

 

“ኤፈርት” በህወሓት ስር የሚንቀሳቀስና የኢህአዴግ ከፍተኛ የኢኮኖሚ የጀርባ አጥንት ሲሆን፣ የሀገሪቱ ኢኮኖሚ 60 በመቶው በኢህአዴግ እጅ እንደሆነ ይነገራል።

 

አዲስ ቪዲዮ

ዜና እና ፖለቲካ

ኪነ-ጥበብ

ቪዲዮ

መጻሕፍት

ስለእኛ

ይከተሉን!