Ato Bereket Semeon, አቶ በረከት ስምዖንEthiopia Zare (አርብ ሚያዝያ 23 ቀን 2001 ዓ.ም. May 1, 2009)፦ “የግንቦት 7 ንቅናቄ ዓላማ መፈንቅለ መንግሥት ማካሄድ ሳይሆን ባለሥልጣናቶችን መግደል ነበር” ሲሉ የመንግሥት ኮምዩኒኬሽን ጉዳዮች ጽ/ቤት ኃላፊ አቶ በረከት ስምዖን በዛሬው ዕለት ለጋዜጠኞች መግለጫ ሰጡ።

 

አቶ በረከት የመንግሥትን አቋም በሚገልፀው በዚሁ መግለጫቸው ላይ ከግንቦት 7 ጋር በተያያዘ ተጠርጥረው የታሰሩትን ግለሰቦች “ግንቦት 7 የተባለ አሸባሪ ቡድን ያደራጃቸው ቀቢጸ ተስፋ ቡድን አባላት ናቸው” ብለዋል።

 

የታሳሪዎቹ ቁጥር 40 የደረሰ ሲሆን፣ ከእነዚህም ውስጥ ስድስቱ የመከላከያ ሠራዊት አባላት ናቸው። ቀሪዎቹ 34ቱ ደግሞ ቀደም ሲል ከመከላከያ አባልነታቸው የተባረሩ፣ ወንጀል ሲሠሩ የተገኙ የአመራሮቹ ዘመዶች እንዳሉበትና ከቀድሞ የቅንጅት አባላት መካከልም መኖራቸውን አቶ በረከት ገልፀዋል።

 

በዚሁ ጋዜጣዊ መግለጫ ላይ አቶ በረከት “ቡድኑ ይህ ነው የሚባል አቅም ካለመኖሩ በላይ የት ቦታ እንዳለ፣ ምን እያደረገ እንደነበር ከመጀመሪያው ጀምሮ ተደርሶበት ነበር” ብለዋል።

 

የተጠርጣሪዎቹን ቀጣይ ሁኔታ አስመልክቶ ደግሞ፤ የፍርድ ሂደቱ ነፃና ግልጽ ሆኖ የሚታይና ግለሰቦቹ ድርጊቱን ስለመፈጸማቸው የሚያረጋግጡ ማስረጃዎቻቸውን ለፍርድ ቤት እንደሚያቀርቡ ተናግረዋል።

 

አቶ በረከት በጋዜጣዊ መግለጫው ላይ ዶ/ር ብርሃኑ ይቅርታ ጠይቀው ከእስር መፈታታቸውንና ግንቦት 7 የተባለ ሕገ-ወጥ ድርጅት ያቋቋሙ ዕለት ሕጉ ‘ጥፋት ሠርተው በተገኙ ይቅርታቸው ይነሳል’ እንደሚለው ወዲያውኑ ይቅርታቸው መነሳቱን ገልፀዋል።

 

ተስፋ የሚቆርጡ ተቃዋሚዎች የሚያተኩሩት አሸባሪ እርምጃዎች በመውሰድ ነው ያሉት አቶ በረከት፤ እንደዚህ ያሉ ሰዎች ደግሞ አንዳቸውም እሳት ውስጥ ገብተው አብረው ለመንደድ የተዘጋጁ ባለመሆናቸው ንቅናቄው ግምት የሚሰጠው አይደለም ብለዋል።

 

አዲስ ቪዲዮ

ዜና እና ፖለቲካ

ኪነ-ጥበብ

ቪዲዮ

መጻሕፍት

ስለእኛ

ይከተሉን!