Happy Ethiopian Newy Year! መልካም አዲስ ዓመት ይሁንልዎ!

International Media

ዓለም አቀፍ የመገናኛ ብዙኃን

እነዚህ ሚዲያዎች ለምን በተሳሳተ ጐዳና ለመራመድ ፈለጉ? ለምንስ የሕወሓት ፕሮፖጋንዳን የሙጥኝ አሉ?

ኻሊድ አብዲ (ኢዛ)

ስም አላቸው የሚባሉ ዓለም አቀፍ የመገናኛ ብዙኃን በወቅታዊ የኢትዮጵያ ጉዳዮች ላይ የሚያሰራጩዋቸውን ዘገባዎች ብዙዎቹን ተመልክቻቸዋለሁ። በተለይ በትግራይ ክልል የኢትዮጵያ መንግሥት ሕግ ለማስከበር ዘመቻ ከመጀመሩ በፊትም ኾነ በኋላ የሚዘግቧቸው ዘገባዎች ሁሉ ፍጹም የተንሻፈፉ ኾነው መገኘታቸው ብቻ ሳይኾን፤ ሽብርተኛውን የሕወሓት ቡድን በግልጽ የሚደግፉ ኾነው ተገኝተዋል።

ነገሩን በጣም አስገራሚ የሚያደርገው ደግሞ በግልጽ የሚታወቁ፤ እኛ እዚህ በተጨባጭ የምናውቀውን እውነታ ሳይቀር አጣምመው ለማቅረብ የሚያደርጉት ጥረት ሁሉ በግሌ ለእነዚህ ሚዲያዎች ለዓመታት ሲሰጥ የነበረውን አክብሮት ሁሉ ንዶብኛል። ይህ ብቻ አይደለም፤ በእነዚህ ሚዲያዎች የተዛቡ ዘገባዎች ስንቶች ተጠቅተው ይሆን? ሁሉ ብዬ እንዳስብ አድርጐኛል።

ከሚዲያ አንጻር አንድ ዘገባ ሚዛናዊነቱን ጠብቆ እንዲሰራጭ በሙያው የሚጠበቅበትን ሥራ ማለትም በዘገባው የተጠቀሱ አካላትን በማነጋገር፤ ከዚያም አልፎ ስለዛ ዘገባ እርግጠኛ ስለመኾኑ መረጃ መያዝ የሚጠበቅበት ቢኾንም በእነዚህ ሚዲያዎች ላይ ግን ኢትዮጵያን በሚመለከቱ ዘገባዎች ይህንን ሲያደርጉ አይታይም።

ይህ ኾን ተብሎ የሚፈጸም ደባ ሰለመኾኑ የሚያሳየው ደግሞ ምንጭ የሚያደርጉት ከሕወሓት የተገኙ “መረጃዎችን” ነው።

በዘገባቸው ትንታኔ ለሚሰጡት ሲሹም ከኢትዮጵያ መንግሥት በተጻራሪ የቆሙ ግለሰቦችን ጭምር መኾኑ ከጋዜጠኝነት ሥነምግባር በእጅጉ ያፈነገጡ፤ ብሎም አንድ ወገንን ደግፈው ሌላውን ለማጥቃት በዘመቻ የተነሱ ስለመኾኑም በደንብ የሚያሳብቅ ነው።

እንዲህ ባሉ በተወላገዱ አመለካከቶች ተቃኝተው የሚዘገቡ ዘገባዎች በተደጋገሙ ቁጥር እውነትን መለወጥ ባይችሉ እንኳን፤ ብዙዎችን የሚበርዝ በመኾኑ አደገኛነቱ እንዲህ በቀላሉ የሚታይ አይደለም።

አንዳንድ ዓለም አቀፍ ተቋማት ደግሞ እነዚህ በዓለም የናኘ ስም ያላቸው ሚዲያዎችን መረጃ ይዘው ሲቀላምዱ የምናይበቱ ምክንያት ጥሩ ማሳያ ይኾናል።

እነዚህ ሚዲያዎች ለምን በተሳሳተ ጐዳና ለመራመድ ፈለጉ? ለምንስ የሕወሓት ፕሮፖጋንዳን የሙጥኝ አሉ? የሚለው ጥያቄ ብዙ ሊያነጋግር ቢችልም፤ ይህንን ተግባራቸውን ለማስቀልበስ ምን ይደረግ? በሚለውና ተያያዥ ጉዳዮች ላይ እስቲ እንወያይ? ኢትዮጵያ ዛሬ መድረኩን ክፍት አድርጋ ሐሳብ ብንለዋወጥበት እላለሁ።

ኢትዮጵያ ዛሬም ይህንን መድረክ በመክፈት ሐሳቦችን ታስተናግዳለች ብዬ አምናለሁ።

አዲስ ቪዲዮ

ዜና እና ፖለቲካ

ኪነ-ጥበብ

ቪዲዮ

መጻሕፍት

ስለእኛ

ይከተሉን!