Happy Ethiopian Newy Year! መልካም አዲስ ዓመት ይሁንልዎ!

President Abdul Fattah al-Sisi

ፕሬዝዳንት አብደል ፋታህ አልሲሲ

የኢትዮጵያን አሸናፊነት ያረጋገጠው የአልሲሲ ንግግር

መስፍን ተክለማርያም (ኢዛ)

ዛሬ ዓርብ ሐምሌ 9 ቀን 2013 ዓ.ም. ከወደ ግብጽ ከፕሬዝዳንት አብደል ፋታህ አልሲሲ የተደመጠው ድምፅ ለየት ያለ ነው። ፕሬዝዳንት አልሲሲ ግብጽ እስከ ዛሬ ኢትዮጵያ ላይ ከምታደርገው መረን የለቀቀ ተቃውሞና ውንጀላ ወጣ ያለ ቃል ወጥቷቸዋል።

ታላቁ የህዳሴ ግድብ ለኢትዮጵያውያን ልማትና ደኅንነት ይውል ዘንድ ከኢትዮጵያውያን ጐን እንቆማለን ማለታቸው አስደማሚ ጉዳይ ኾኗል።

ይህ አንደበት ኢትዮጵያ በህዳሴ ግድብ ዙሪያ በዓለም አቀፍ መድረክ አሸናፊ መኾንዋን በመረዳት አሁን ያለው አማራጭ ነገሮች በሰላም ማካሔድ ይቻላል በሚል የተናገሩትም ይመስላል።

የፕሬዝዳንቱ የዛሬ መልእክት ይህ ብቻ አልነበረም። ለሦስቱ የተፋሰስ አገሮች መልእክት አለ ብለውም “በግድቡ ዙሪያ የጋራ ስምምነት ላይ እንድንደርስ በሰላምና በብልጽግና እንኑር” ብለዋል።

እውነት ይህ ቃል ከግብጽ ፕሬዝዳንት የወጣ ነው ወይ? እስኪባል ድረስ ዛሬ የተሰማው መልእክት ሌላም ነገር አለው። ይህም “በታላቁ ህዳሴ ግድብ የልማት እንጂ ሌላ ጉዳይ የለም” በማለት የገለጹት ነው።

ሌሎችም ይወቁልን በማለት የገለጹት ደግሞ፤ “ሥጋት ቢኖረንም ያን ያህል አሳሳቢ አይደለም” ማለታቸው ነው።

ይህ የዛሬው የግብጽ ፕሬዝዳንት መልእክት በእርግጥም ከአንጀት ከኾነ በእጅጉ የሚደገፍ ነው። ይህ ማለት ግን ለዘመናት ግብጽ በዓባይ ወንዝ ላይ ያላት ስግብግብ አቋሟን እንዲህ በአንዴ ቀይራ በዚሁ መንገድ መራመዷን ትቀጥላለች ተብሎ ስለማይታመን፤ ኢትዮጵያ በተጠንቀቅ መቆሟን ለአፍታ መዘንጋት እንደሌለበት ይታመናል።

ምንም ቢኾን ምን ግን በህዳሴ ግድብ ዙሪያ ጸጥታው ምክር ቤት ድረስ አጀንዳ ኾኖ በቀረበበት መድረክ በኢትዮጵያ አቋም ዓለም እንዲያውቀው እድል የሰጠ እውነት በብዙዎች ዘንድ እንዲሰርጽ ያስቻለ መኾኑ፤ ግብጽ የአቋም ለውጥ እንድታደርግ ሳያስገድዳት አልቀረም። ይህ ደግሞ ለኢትዮጵያና ለኢትዮጵያውያን ድል ነው። ኢትዮጵያ አሁንም ስታራምደው የነበረውን የሰላም መንገድ ትቀጥልበታለች፤ ግድቡም ይጠናቀቃል። ብርሃንም ይፈነጥቃል።

እዚህ ላይ ግን መታሰብ ያለበት የግብጽ ፕሬዝዳንት የግብጽ የውኃ ድርሻ ፈጽሞ አይነካም ማለታቸው ደግሞ፤ ግብጽ የዛሬውን ንግግራቸውን የተሳከረ እንዲኾን ማድረጉን ግን ልብ ይሏል።

አዲስ ቪዲዮ

ዜና እና ፖለቲካ

ኪነ-ጥበብ

ቪዲዮ

መጻሕፍት

ስለእኛ

ይከተሉን!