Happy Ethiopian Newy Year! መልካም አዲስ ዓመት ይሁንልዎ!

Birtukan Mideksa

የቦርዱ ሰብሳቢ ወይዘሪት ብርቱካን ሚደቅሳ ዛሬ ሐሙስ ሰኔ 24 ቀን 2013 ዓ.ም. በሰጡት መግለጫ በሰጡበት ወቅት

የአዲስ አበባ የምርጫ ውጤት በአሥረኛውም ቀን አልታወቀም
የሁሉንም ውጤት መግለጽ ቢኖርብኝም በተለያዩ ምክንያቶች አልቻልኩም ብሏል

ኢዛ (ሐሙስ ሰኔ ፳፬ ቀን ፳፻፲፫ ዓ.ም. July 1, 2021)፦ የኢትዮጵያ ብሔራዊ ምርጫ ቦርድ በዚህ ሳምንት የሁሉንም የምርጫ ክልሎች ውጤት ይገልጻል ተብሎ ሲጠበቅ የነበረ ቢኾንም፤ ቦርዱ ዛሬ እንዳስታወቀው ግን፤ በተለያዩ ምክንያቶች አልቻልኩም ብሏል። የተረጋገጡ የምርጫ ውጤቶችን ግን ይፋ ማድረጉን ቀጥሏል።

ዛሬ ሐሙስ ሰኔ 24 ቀን 2013 ዓ.ም. ቦርዱ ለሁለተኛ ጊዜ የምርጫ 2013 ውጤቶችን ይፋ ያደረገ ሲሆን፤ የቦርዱ ሰብሳቢ ወይዘሪት ብርቱካን ሚደቅሳ ዛሬ በሰጡት መግለጫ የሁሉንም የምርጫ ክልሎችን ውጤት መግለጽ ቢኖርብንም፤ በተለያዩ ምክንያቶች ይህን ማድረግ አለመቻሉን አመልክተው፤ ለዚህም የምርጫ ድምፆችን የመደመር ሒደቶች አለመጠናቀቅ አንዱ ምክንያት ነው ብለዋል።

ከዚህም ሌላ በትራንስፖርት ችግር ወደ ማዕከል ውጤት ተጠቃሎ ያልደረሳቸው ክልሎች መኖራቸውም የሁሉንም የምርጫ ውጤቶች መግለጽ አለመቻሉን አመልክተዋል።

የፖለቲካ ፓርቲዎች ያቀረቡዋቸው የተለያዩ ቅሬታዎች በተወሰኑት ላይ ለመዘግየት ምክንያት እንደነበር ተገልጿል።

በቦርዱ የዛሬ መግለጫ መሠረት በአፋር የሰባት የምርጫ ክልሎችና በጋምቤላ አሶሳ የምርጫ ክልሎች ውጤት መግለጽ እንዳልተቻለም በዛሬው መግለጫ ተገልጿል።

በአዲስ አበባም የመደመር ሒደት ባልጨረሱ ምርጫ ክልሎች ውጤት መግለጽ ያልተቻለ ስለመኾኑም ቦርዱ አስታውቋል።

ከዚህም ሌላ በኦሮሚያ ክልል በቄሌም ወለጋ አራት የምርጫ ክልሎች፣ በአማራ ደግሞ በሦስት የምርጫ ክልሎች ውጤት ማሳወቅ ስላለመቻሉ ይኸው የቦርዱ የዛሬ መግለጫ አመልክቷል።

በሌላ በኩል ግን 73 የሚደርሱ የምርጫ ክልሎችን ውጤት ቦርዱ ዛሬ ማምሻውን በድረገጹ የሚያሳውቅ መኾኑንም ገልጿል። ቦርዱ በእጁ ያሉና ውሳኔ የሰጠባቸውን የተረጋገጡ የምርጫ አሸናፊዎችንም በዛሬው ዕለት ማስታወቁን ቀጥሏል። እነዚህ የተረጋገጡ ውጤቶችን ወይዘሪት ብርቱካን በጋዜጣዊ መግለጫቸው ላይ ገልጸዋል።

ቦርዱ የመጀመሪያውን ውጤት ትናንት ረቡዕ ሰኔ 23 ቀን 2013 ዓ.ም. ማስታወቅ መጀመሩን መዘገባችን አይዘነጋም።

ይህ በእንዲህ እንዳለ ቦርዱ ዛሬ በምርጫው ሒደት ቅሬታ ካቀረቡ የፖለቲካ ፓርቲ ተወካዮች ጋር ተወያይቷል።

ምርጫ ቦርድ የምርጫውን ውጤት ቢያንስ በአሥር ቀናት ውስጥ ማሳወቅ መጀመር ያለበት ሲሆን፤ የምርጫውን ጠቅላላ ውጤት ግን በሃያ ቀናት ውስጥ የማሳወቅ የሕግ ግዴታ አለበት። ቦርዱ የመጀመሪያውን የምርጫ ውጤት በዘጠኝ ቀን ውስጥ ትናንት ያሳወቀ ሲሆን፤ በሕጉ መሠረት ሙሉውን ውጤት እስከ ሐምሌ 4 ቀን የማሳወቅ ግዴታ አለበት። (ኢዛ)

አዲስ ቪዲዮ

ዜና እና ፖለቲካ

ኪነ-ጥበብ

ቪዲዮ

መጻሕፍት

ስለእኛ

ይከተሉን!