Happy Ethiopian Newy Year! መልካም አዲስ ዓመት ይሁንልዎ!

Awash Bank & Awash Insurance Company

አዋሽ ባንክና አዋሽ ኢንሹራንስ ኩባንያ ከግል የፋይናንስ ተቋማት ብልጫ ያለውን ውጤት በማስመዝገብ 25ኛ ዓመታቸውን ሊያከብሩ ነው

አዋሽ ባንክ ዓመታዊ ትርፍ 3.3 ቢሊዮን ብር ደርሷል

ኢዛ (ረቡዕ መስከረም ፳፩ ቀን ፳፻፲፪ ዓ.ም. October 2, 2019):- የግል የፋይናንስ ተቋማት እንደ አዲስ መቋቋም የሚያስችለው ሕግ ተግባራዊ ከሆነ ወዲህ ቀድመው ከተቋቋሙት የፋይናንስ ተቋማት መካከል አዋሽ ባንክና አዋሽ ኢንሹራንስ ኩባንያ ከግል የፋይናንስ ተቋማት ብልጫ ያለውን ውጤት በማስመዝገብ 25ኛ ዓመታቸውን ሊያከብሩ ነው።

ሁለቱ እኅትማማች ኩባንያዎች በ2011 በጀት ዓመት ከግል የፋይናንስ ተቋማት ከፍተኛ የሚባለውን ትርፍ በማስመዝገብ ዓመቱን ያጠናቀቁ ሲሆን፣ ከአንድ ወር በኋላም በጋራ 25ኛ ዓመታቸውን ያከብራሉ።

ሁለቱ ኩባንያዎች በየራሳቸው ይፋ ካደረጉት መረጃ እንደሚያመለክተው አዋሽ ባንክ በ2011 በጀት ዓመት ከታክስ በፊት ያስመዘገበው 3.3 ቢሊዮን ብር ነው። ይህም በአገሪቱ ውስጥ ከሚንቀሳቀሱ 16 የግል ባንኮች በ2011 በጀት ዓመት ከፍተኛ የሆነ ትርፍ ማስመዝገቡን ያመላከተ ነው። አዋሽ ባንክ ባለፉት ተከታታይ ዓመት ከግል ባንኮች ከፍተኛ የሚባለውን ትርፍ በማስመዝገብ መዝለቅ የቻለ ሲሆን፣ በ2011 በጀት ዓመት ከታክስ በፊት ያገኘው ትርፍ ከ2010 ዓ.ም. ካተረፈው ትርፍ ከ1.3 ቢሊዮን ብር ብልጫ ያለው ነው።

ከአዋሽ ባንክ ቀጥሎ ከፍተኛ ትርፍ ያገኘው ዳሸን ባንክ ሲሆን፣ በ2011 ከታክስ በፊት ያገኘው ትርፍ 1.3 ቢሊዮን ብር ነው።

በተመሳሳይ አዋሽ ኢንሹራንስ ኩባንያም በ2011 በጀት ዓመት ያገኘው ትርፍ መጠን ከ17ቱ የግል ኢንሹራንስ ኩባንያዎች ከፍተኛ የሚባል ነው።

አዋሽ ኢንሹራንስ በ2011 በጀት ዓመት ያገኘው የትርፍ መጠን ከ160 ሚሊዮን ብር በላይ ሲሆን፣ ይህ የትርፍ መጠኑም ከግል ኢንሹራንስ ኩባንያዎች በመጀመሪያ ደረጃ ላይ የሚቀመጥ ነው።

በ2011 በጀት ዓመት ሁለቱም እኅትአማች ኩባንያዎች በፋይናንስ ዘርፉ ከግል ባንክና ኢንሹራንስ ኩባንያዎች ቀዳሚ የሚባለውን ውጤት ይዘው ለ25ኛ ዓመት በዓላቸው እየተዘጋጁ መኾኑ ታውቋል። አዋሽ ባንክ ከ4 ሺሕ በላይ ባአክሲዮኖች ያሉት ሲሆን፣ በአሁኑ ወቅት ጠቅላላ ሀብቱ ከ65 ቢሊዮን ብር በላይ ደርሷል።

በ1983 ዓ.ም. የደርግን ውድቀት ተከትሎ በወቅቱ ሥልጣኑን ተቆጣጥሮ የነበረው ኢሕአዴግ በቀየሰው አዲስ የኢኮኖሚ ፖሊሲን ተከትሎ በወጣው ሕግ መሠረት፤ ከ1966 ዓ.ም. በኋላ በድጋሚ የግል ባንኮችና ኢንሹራንሶች መመሥረት ችለዋል። ከደርግ ውደቀት ወዲህ አዋሽ ባንክ የመጀመሪያው የግል ባንክ ሆኖ በ1987 ዓ.ም. ሥራ የጀመረ ሲሆን፣ አዋሽ ኢንሹራንስ ደግሞ በዚያው ዓመት ሁለተኛው የግል ኢንሹራንስ ኩባንያ ነው። የመጀመሪያው የግል ኢንሹራንስ ኾኖ የተመዘገበው ብሔራዊ የኢትዮጵያ ኢንሹራንስ ኩባንያ (ናይስ) እንደሆነ አይዘነጋም።

ለግንዛቤ፣

በኢትዮጵያ የመጀመሪያው ባንክ፣ “አቢሲኒያ ባንክ” (Bank of Abyssinia) ሲሆን፣ የተቋቋመውም በ1897 ዓ.ም. በአጤ ምኒልክ ዘመነ መንግሥት በእንግሊዞች ይዞታ ሥር በነበረው የግብጽ ብሔራዊ ባንክና በኢትዮጵያ መንግሥት በተደረገው ስምምነት መሠረት ነበር። ስምምነቱ በአገሪቱ ሌሎች ባንኮችን መመሥረትን ይከለክል የነበረ ሲሆን፣ የባንኩ መነሻ ካፒታል አንድ ሚሊዮን ሽልንግ እንደነበር የታሪክ ማስረጃዎች ይመሰክራሉ።

“አቢሲኒያ ባንክ” ስምምነቱ ከተፈረመ ከአንድ ዓመት በኋላ ሥራውን የጀመረ ሲሆን፣ የመጀመሪያዎቹን ቅርንጫፎች በሐረር፣ በድሬዳዋ፣ በደንቢዶሎ፣ በጎሬ፣ በጋምቤላና በጅቡቲ ከፍቶ ሥራውን ጀምሮ እስከ 1926 ዓ.ም. ሲያገለግል ቆይቷል። አጤ ኃይለሥላሴ በአቢሲኒያ ባንክ ውስጥ የአክስዮን ባለቤት ለነበሩት ባለሀብቶች የድርሻቸውን ሠጥተው፤ ባንኩን በማፍረስ ሙሉ በሙሉ በሙሉ በኢትዮጵያ መንግሥት ሥር የኾነውን የኢትዮጵያ ባንክ፣ በኋላም የኢትዮጵያ ብሔራዊ ባንክ የሚል ስያሜ የተሰጠውን ባንክ አቋቋሙ። (ኢዛ)

አዲስ ቪዲዮ

ዜና እና ፖለቲካ

ኪነ-ጥበብ

ቪዲዮ

መጻሕፍት

ስለእኛ

ይከተሉን!