National Bank of Ethiopia

የኢትዮጵያ ብሔራዊ ባንክ

በሥራ ላይ ካሉት 16 የግል ባንኮች አንዱ ብቻ ነው ከ5 ሚሊዮን ብር በላይ የተከፈለ ካፒታል ያለው

ኢዛ (ሐሙስ ሚያዝያ ፱ ቀን ፳፻፲፫ ዓ.ም. April 17, 2021)፦ የኢትዮጵያ ብሔራዊ ባንክ ከዚህ በኋላ ባንክ ለማቋቋም የሚጠየቀውን የካፒታል መጠን አምስት ቢሊዮን ብር ማድረሱን አስታውቋል። በሥራ ላይ ካሉት 16 የግል ባንኮች አንዱ ብቻ ነው ከ5 ሚሊዮን ብር በላይ የተከፈለ ካፒታል ያለው።

ብሔራዊ ባንክ በዚህ ሳምንት ባወጣው መመሪያ የባንክ ማቋቋሚያ የተከፈለ ካፒታሉን ከ500 ሚሊዮን ብር ወደ አምስት ቢሊዮን ብር እንዲያድግ በማድረግ ባንኮችም ይህንን ካፒታል አሟልተው መገኘት ያለባቸውንም የጊዜ ገደብ አስቀምጧል።

በመመሪያው መሠረት ነባሮቹ 16ቱ የግል ባንኮች በአምስት ዓመት ውስጥ አምስት ቢሊዮን የተከፈለ ካፒታል እንዲይዙ ሲያስታውቅ፤ አሁን በምሥረታ ላይ ያሉት ደግሞ ሰባት ዓመት ተሰጥቷቸዋል።

አሁን በሥራ ላይ ካሉ ባንኮች ከአምስት ቢሊዮን ብር በላይ የያዘው አዋሽ ባንክ ሲሆን፤ ቀሪዎቹ ባንኮች በሙሉ የተከፈለ ካፒታላቸው ከአራት ቢሊዮን ብር በታች ስለኾነ፤ 15ቱ የግል ባንኮች ተጨማሪ አክሲዮኖችን በመሸጥ ወይም ዓመታዊ ትርፋቸውን ወደ ካፒታል በመቀየር በመመሪያው መሠረት በአምስት ዓመት ውስጥ የተከፈለ ካፒታላቸውን አምስት ቢሊዮን ብር ማድረስ ይጠበቅባቸዋል።

በምሥረታ ላይ የሚገኙ ባንኮች ደግሞ በሰባት ዓመት ውስጥ ካፒታላቸውን አምስት ቢሊዮን ብር ማድረስ ይኖርባቸዋል ተብሏል።

 

አሁን በሥራ ላይ የሚገኙት 16ቱ ባንኮች በድምር የተከፈለ ካፒታላቸው ወደ 60 ቢሊዮን ብር አካባቢ ነው። ከ16ቱ ባንኮች አብዛኛዎቹ የተከፈለ ካፒታላቸው ከ2.5 በታች ነው። ስለዚህ በቀጣዩ አምስት ዓመት ይህንን ካፒታል መሙላት ወይም እርስ በርሳቸው እንዲዋሃዱ ሊያደርግ ይችላል የሚል ግምት አለ።

መረጃዎች እንደሚያሳዩት ወደ 20 የሚጠጉ አዳዲስ ባንኮች ለመመሥረት ጥያቄ ያቀረቡና ከእነዚህ ውስጥም 16 የሚኾኑት በቅርቡ ወደ ሥራ የሚገቡ ናቸው ተብሎ ይጠበቃል። በቅርብ ከተመሠረቱት ባንኮች ውስጥ አማራ ባንክ በ5.9 ቢሊዮን ብር ይተከፈለ ካፒታል መመሥረቱን መዘገባችን አይዘነጋም። (ኢዛ)

አዲስ ቪዲዮ

ዜና እና ፖለቲካ

ኪነ-ጥበብ

ቪዲዮ

መጻሕፍት

ስለእኛ

ይከተሉን!