Dexamethasone, Total coronavirus cases in Ethiopia, June 19, 2020

ዴክሳሜታዞን የተባለው መድሃኒት፤ በኢትዮጵያ የኮሮና ቫይረስ የሁኔታ መግለጫ (ዓርብ ሰኔ 12 ቀን 2012 ዓ.ም.፤ በጤና ሚኒስቴር እና በኢትዮጵያ ሕብረተሰብ ጤና ኢንስቲትዩት የተዘጋጀ)

የተጠቂዎች ቁጥር አራት ሺህን ተሻገረ
ያገገሙ ሰዎች ከአንድ ሺህ በላይ ኾኗል
የሟቾች ቁጥር በሰባት ጨምሮ 72 ደርሷል

ኢዛ (ዓርብ ሰኔ ፲፪ ቀን ፳፻፲፪ ዓ.ም. June 19, 2020)፦ ለኮሮና ቫይረስ ጽኑ ሕሙማን ያግዛል የተባለውን ዴክሳሜታዞን የተባለውን መድሃኒት እንደ ድንገተኛ ሕክምና ለመጠቀም የኢትዮጵያ ጤና ሚኒስቴር መወሰኑ ተገለጸ።

ይህንን መድሃኒት በተመለከተ የጤና ሚኒስትር የኾኑት ዶ/ር ሊያ ታደሰ በፌስቡክ ገጻቸው እንዳሰፈሩት፤ መድሃኒቱን በተመለከተ በእንግሊዝ መንግሥት የተካሔደውን ጥና እና ሪፖርት በዝርዝር በመመልከት የተወሰነ መኾኑን የሚያመለክት ነው።

“የሕክምና ጉዳዮች አማካሪ ቡድናችን እና የጤና ባለሙያዎች አማካሪ ምክር ቤት የሰጠንን ምክረ ሐሳብ መሠረት በማድረግ፤ ከኦክስጅን ወይም የመተንፈሻ መሣሪያ እገዛ ለሚያስፈልጋቸው የኮርቪድ 19 ሕሙማን የሕክምና ባለሙያዎች በሚያዙት መሠረት ዴክሳሜታዞን እንደ ድንገተኛ ሕክምና ለመጠቀም ተወስኗል” በሚል ገልጸዋል።

አያይዘውም ሕክምናውን አስመልክቶ ዝርዝር መመሪያ በቅርቡ እንደሚወጣም ሚኒስትሯ አመልክተዋል።

ይህ በእንዲህ እንዳለ በኢትዮጵያ በኮሮና ቫይረስ የተያዙ ሰዎች ቁጥር ከአራት ሺህ በላይ መድረሱ ተመለከተ። ዛሬ ዓርብ ሰኔ 12 ቀን 2012 ዓ.ም. በጤና ሚኒስቴር ዕለታዊ መረጃ መሠረት፤ ባለፉት 24 ሰዓታትት ውስጥ ለ4,809 ሰዎች ምርመራ ተደርጎ 116 አዳዲስ ተጠቂዎች በመገኘታቸው፤ በኢትዮጵያ የቭቫይረሱ ተጠቂዎች ቁጥር 4,070 ሊደርስ ችሏል።

በዛሬው ሪፖርት መሠረት በአንድ ቀን ማገገማቸው የተገለጸ 93 ሰዎች በመገኘታቸው፤ ከበሽታው ያገገሙ ሰዎች ቁጥር 1,037 ደርሷል። በአንጻሩ በቫይረሱ ተጠቅተው የሞቱ ሰዎች ቁጥር በሰባት ጨምሮ 72 ደርሷል። በጽኑ ሕመም ላይ የሚገኙ ደግሞ 32 መኾናቸውን የሚያመለክተው ዕለታዊው ሪፖርት፤ በኢትዮጵያ የላቦራቶሪ ምርመራ የተደረገላቸው ሰዎች ጠቅላላ ቁጥር 207,023 መድረሱን ያመለክታል። (ኢዛ)

አዲስ ቪዲዮ

ዜና እና ፖለቲካ

ኪነ-ጥበብ

ቪዲዮ

መጻሕፍት

ስለእኛ

ይከተሉን!