ለምን ብለን

ውሸትን ቻል አ'ርገን

እንደ እርጎ ተግተን

እንደ ሱረት ምገን

ዝም ብለን ምናልፈው

ባለሥጣንን ነው

ፈርተን አጎብድደን

አንድም ለሆድ ብለን

ውሸት እስከሞት

ፍቅርን ነበረ ይጓዛል እስከሞት

ብለን የምናውቀው ያነበብነው በፊት

ውሸትም እስከሞት ለካ አብሮ ይጓዛል

እንዲህ ያለ ተአምር በዚህ ዘመን ታይቷል

ሁለት ዐይነት ገጽታ አለው

ይኼ ኑሮ የምንለው

ሁለት ዐይነት ገጽታ አለው

አንድ ለ'ራስ

ለመንተራስ

አንድ ለአገር

ለመማገር

ወለላዬ ከስዊድን

“አዎን! ኢትዮጵያዊ ነኝ!” በለኝ

መቼም አፍህ ከተግባርህ አይከብደኝም

ካልኾንክም ግድ የለም

እቅጩን ሐቁን ንገረኝ

ያንተ ነገር ቁርጡ ይግባኝ።

የኔነቴን የአገሬን ትዝታ

የቀዬው የአድባሩን ሽታ

የፍቅሬን የአንድነት ጥላ

ለዘመናት ያኖረኝን ከለላ

ወዲያ ጥለኸው ሰባብረህ

ከናት ካባትህ ቃል ኪዳን ርቀህ

እንዲህ ኾነህ ያገኘሁህ

ማነህ?

እውነት አንተም ኢትዮጵያዊ ነህ?!

የማይኾን አይኾንም

ሰኔ ከሰኞ ጋር ገጠመ አልገጠመ

እማይመጣው መጥቶ ሚመጣው መቼ ቆመ

አሥሩ ቢወራ በዛ በዚህ ቢባል

የማይኾን አይኾንም የሚኾን ይኾናል