TPLF

ሕወሓት

ተቃዋሚዎቹ 20 በመቶ ወንበር በችሮታ ይሰጣቸዋል

ኢዛ (ዓርብ መስከረም ፩ ቀን ፳፻፲፫ ዓ.ም. September 11, 2020)፦ በፌዴሬሽን ምክር ቤት አስቸኳይ ስብሰባ ተቀባይነት የሌለውና እንዳልተደረገ ይቆጠራል የሚል ውሳኔ በተላለፈበት የትግራይ ክልል ምርጫ 2012፤ ሕወሓት 98.2 በመቶውን ድምፅ አግኝቶ አሸነፈ ተባለ።

ጳጉሜን 4 ቀን 2012 ዓ.ም. የተካሔደውን ምርጫ በተመለከተ፤ የክልሉ የምርጫ ኮሚሽነር ለቢቢሲ እንደገለጹት፤ ከአጠቃላይ የመራጮች ድምፅ 98.2 በመቶ በማግኘት አሸናፊ መኾኑንና ከዚህ ቀደም ተደረገ በተባል የውክልና ማሻሻያ ውሳኔ መሠረት 20 በመቶ መቀመጫውን በምርጫ ለተወዳደሩ ተቃዋሚ ፓርቲዎች እንደሚሰጥ፤ በዚህም ምክንያት የክልሉ ምክር ቤት ካለው 190 መቀመጫዎች ውስጥ 152 የሚኾነው በሕወሓት ይያዛል።

እንደ ቢቢሲ ዘገባ፤ በምርጫው ውጤት መሠረት ሕወሓት 98.2 በመቶ የሚኾነውን የመራጮች ድምፅ መያዙና ሙሉ በሙሉ በሚባል ደረጃ የክልሉ መቀመጫዎችን በመያዙ 38 ወንበሮችን ለተቃዋሚ ፓርቲዎች ያከፋፍላል የሚል ነው።

በዚህ ምርጫ ተሳትፈዋል የተባሉት ተቃዋሚ ፓርቲዎች ምን ያህል ወንበር እንደሚከፋፈሉ ባይጠቀስም፤ ይህንን ምርጫ ለማድረግ ወጣ በተባለ መመሪያ ሕወሓት ካገኘው ወንበር 20 በመቶውን ለእነዚህ ተቃዋሚ ፓርቲዎች በችሮታ ያከፋፍላል ተብሏል።

በዚህ ምርጫ 2.6 ሚሊዮን ሕዝብ ለመምረጥ ስለመመዝገቡ የተገለጸ ሲሆን፤ ዛሬ መስከረም አንድ ቀን 2013 ዓ.ም. የሕወሓትን አሸናፊነት የሚገልጸው መረጃ በዝርዝር ያልቀረብ ሲሆን፤ በብዙዎች ዘንድ ሕወሓት የተለመደውን ሥራ የፈጸመበት ተግባር መባሉ ግን አልቀረም።

እስከ ውጤት ማሰማት ደረጃ የደረሰውና እንዳልተካሔደ የሚቆጠር ነው የተባለው ይህ ምርጫ፤ በቀጣይ ምን አንደምታ ይኖረዋል የሚለው ጉዳይ የብዙዎች ጥያቄ ኾኗል።

ሰሞኑን ጠቅላይ ሚኒስትር ዶ/ር ዐቢይ አሕመድ በዚህ ምርጫ ዙሪያ በሰጡት መግለጫ፤ “የጨረቃ ምርጫ” በማለት ሕገወጥነቱን በማጉላት መግለጻቸው የሚታወስ ሲሆን፤ ምርጫው ምንም ይሁን ምን እንደጨረቃ ቤት የሚታይ ሕገወጥ ተግባር እንደኾነም አመልክተዋል። “የጨረቃ ቤት” ደግሞ መቼም ይሁን መቼ መፍረሱ አይቀርም በሚል በምርጫው ዙሪያ ያላቸውን አመለካከት መሰንዘራቸው ይታወሳል። (ኢዛ)

አዲስ ቪዲዮ

ዜና እና ፖለቲካ

ኪነ-ጥበብ

ቪዲዮ

መጻሕፍት

ስለእኛ

ይከተሉን!