Total coronavirus cases in Ethiopia, May 21, 2020

በኢትዮጵያ የኮሮና ቫይረስ የሁኔታ መግለጫ (ሐሙስ ግንቦት 13 ቀን 2012 ዓ.ም.፤ በጤና ሚኒስቴር እና በኢትዮጵያ ሕብረተሰብ ጤና ኢንስቲትዩት የተዘጋጀ)

እስካሁን ለ69 ሺሕ 519 ሰዎች ምርምር የተደርጓል

ኢዛ (ሐሙስ ግንቦት ፲፫ ቀን ፳፻፲፪ ዓ.ም. May 21, 2020)፦ የጤና ጥበቃ ሚኒስቴር ዛሬ ሐሙስ ግንቦት 13 ቀን 2012 ዓ.ም. ይፋ ባደረገው መረጃ፤ ባለፉት 24 ሰዓት ውስጥ ለ3,747 ሰዎች የላብራቶሪ ምርመራ ተደርጐ አስር ሰዎች የኮሮና ቫይረስ እንደተገኘባቸው አስታውቋል። ይህም በኢትዮጵያ ቫይረሱ በምርመራ የተገኘባቸው ሰዎች ቁጥር 399 መድረሱን አመላክቷል።

ቫይረሱ የተገኘባቸው ሰዎች ሁሉም ኢትዮጵያውያን ሲሆኑ፣ ዕድሜያቸውም ከ20 እስከ 49 ዓመት ውስጥ ያሉ መኾኑን የሚገልጸው ሪፖርቱ፤ ከአስሩ ዘጠኙ ወንዶችና አንድ ሴት ናቸው።

አምስቱ ሰዎች የውጭ የጉዞ ታሪክ ያላቸው፣ ሁለቱ ሰዎች ደግሞ በበሽታው ከተያዘ ሰዎች ጋር ግንኙነት ያላቸው መኾኑ ታውቋል። ሌሎች ሦስቱ ደግሞ የውጭ አገር የጉዞ ታሪክ እና በበሽታው ከተያዘ ሰው ጋር ግንኙነት የሌላቸው መኾኑን የጤና ሚኒስቴር አስታውቋል።

ጤና ሚኒስቴር ማምሻውን እንዳስታወቀው አስረኛ የቫይረሱ ተጠቂ በሐረሪ ክልል በተደረገ 12 የላቦራቶሪ ምርመራ አንድ የ37 ዓመት ዕድሜ ያለው ኢትዮጵያዊ የክልሉ ነዋሪ ቫይረሱ ተገኝቶበታል። ይህ ግለሰብ የውጭ አገር የጉዞ ታሪክም ኾነ በበሽታው ከተያዘ ሰው ጋር ንክኪ የሌለው መኾኑ ታውቋል።

ቫይረሱ በምርመራ ከተገኘባቸው ሰዎች ውስጥ ሦስቱ ሰዎች ከአዲስ አበባ ሲሆኑ፣ ሁለቱ ሰዎች በአፋር ክልል፣ አንድ ሰው በሶማሌ ክልል፣ አንድ የተገኙ ሰው ደግሞ በሐረሪ ክልል ናቸው። በትናንቱ ሪፖርት ሰባት ሰዎች የተገኙበት የትግራይ ክልል፤ በዛሬው ሪፖርት ደግሞ አንድ ተጨማሪ ሰው መገኘቱን አመላክቷል። ከአማራ ክልል ደግሞ አንድ ተገኝቷል። እስካሁን በኢትዮጵያ ለ69 ሺሕ 519 ሰዎች ምርምር የተደረገ ሲሆን፣ ከቫይረሱ ያገገሙ ሰዎች ቁጥር ደግሞ 123 መድረሱ ተገልጿል። (ኢዛ)

አዲስ ቪዲዮ

ዜና እና ፖለቲካ

ኪነ-ጥበብ

ቪዲዮ

መጻሕፍት

ስለእኛ

ይከተሉን!